الموضوع: فرامل الفيرنا

المشاركة الأصلية كتبت بواسطة BLACKVERNA

اعتقد موضوع رجة الدريكسيون مع الفرملة

دى مشكلة طنابير عايزة تتخرط او تتغير

تحياتى

بالفعل مشكلة رجة الفرامل الطنابير يا صديقي

المشاركة الأصلية كتبت بواسطة unks

السلام عليكم: حضرتك لما بتيجي تفرمل فوق ال120 او اعلى وتيجي تدوس فرامل تلاقي الطاره بتتهز وتلاقي دواسة الفرامل كمان بتتهز وتحس ان الفرامل مزحلقه اوي صح انا عندي العيب ده وحاولت مرارا وتكرارا ان الاقي حل مش لاقي انا مش بحبط حضرتك بس هوه ده للاسف مشكله وياريت حد يفيدنا في الموضوع ده وياريت كل اللي معاهم فيرنا يلاقو حل ياريت يفيدونا

انا بفرمل على 150 وبدون اي هزة في الطارة وكل حاجة مظبوطة الحمد لله
طبيعي جدا انك تلاقي الفرامل مزحلقة بسبب السرعة لاعالية والاحتكاك بين التيل والطنبورة
أفضل حل في المواقف دي لو مضطر تفرمل جامد انك تسقط نقلة وترفع رجلك مفاجيء عن الدبرياج هتلاقي سرعة العربية نزلت ودا هيساعد أداء الفرامل


*للأسف يا شباب بنظلم الفيرنا بقصة الفرامل دي
ايه مواصفات الفرامل القوية؟!
انك لما تضغط الفرامل لحد آخرها العربية تزحف منك ويحصل انغلاق تام complete blocking
طب هل دا بيحصل في الفيرنا؟!
ايوة بيحصل ودا ان دل بيدل على ان منظومة الفرامل قوية
طيب ايه المشكلة بقا؟!
المشكلة ان وزن العربية خفيف فمع قوة الفرامل دي بتخليك تشعر ان الفرامل مش فعالة اوي وطبعا هتقولولي ازاي فرامل قوية وعربية خفيفة يعني المفروض تقف اسرع !
الكلام دا سليم عمليا طول مانت موصلتش لدرجة الفرملة اللي تخلي الكاوتش يقفش منك او يزحف
كدة عربيتك تقف اسرع
لكن اللي بيحصل في المواقف المفاجئة اننا بنكبس فرامل للنهاية فالكاوتش بيقفش والعربية تزحف في الاسفلت ونلاقينا هوب قمنا لابسين في اللي قدامنا ونيجي نشتكي ونقول فيرنا !
مع ان العيب مش في العربية العيب في اللي سايق انه معرفش يطلع أقصى استفادة من الفرامل
استخدام الفرامل مهارة زيها زي السواقة ويمكن اهم من مهارة السواقة بكتير لأنك لو بتعرف تستخدم الفرامل كويس هتعرف امتى وازاي تقف
طيب عايز استفيد من الفرامل اعمل ايه؟!
*أولا لما تيجي تفرمل متضغطش دبرياج عشان متفصلش منظومة الفتيس وتخلي التروس متعشقة ودا هيساعدك انك تقف اسرع ولو لقيت ان دا مش هيسعفك تقدر تسقط نقلة عكسية يعني تنزل نقلة من الخامس للرابع او للتالت حسب سرعتك وترفع رجلك مفاجيء من على الدبرياج وانت ضاغط فرامل هتلاقي انخفاض كبير في سرعة العربية
*ثانيا متفرملش لنهاية الفرامل عشان متوصلش ان الفرامل يحصلها انغلاق تام
ولكن اوصل لل threshold بتاع الفرامل والللي عندها بتخلي الفرامل بتاعت عربيتك تشتغل كأن فيها ABS نظام مانع انغلاق ! طب ازاي؟!
وظيفة نظام مانع الانغلاق ان الكاوتش ميقفشش وبالتالي العربية متزحفش ولو انت في موقف صعب تقدر تحرك الدروكسيون بكل سهولة وانت متحكم في العربية وهو بكدة بيوصل أقصى قوة فرملية ومبيعملش انغلاق تام
هل نقدر نعمل دا في عربياتنا بصورة مانيوال؟! -يدوية-
ايوة طبعا نقدر بس محتاجة شوية تدريب وتبقا عارف النقطة دي في عربيتك امتى وفين!
فرمل وجرب انك تفرمل بأقصى حاجة بس الكاوتش ميقفشش وشوف هتقف في قد ايه وعلى نفس السرعة فرمل تاني وخلي الكاوتش يقفش وشوف هتقف في قد ايه !
قطعا في حالة ان الكاوتش ميقفشش هتقف اسرع
يبقا :-
*نخلي الفتيس معشق
*منوصلش للانغلاق التام في الفرامل ولكن نوصل لأقصى استفادة منها بدون ما تكسح معانا
*نسقط نقلة عكسية لو كان الموقف مستدعي
*نضبط النفس عشان منتصرفش تصرف غلط يخلينا نخبط في المواقف الحرجة !
وربنا يوفقكم جميعا

المشاركة الأصلية كتبت بواسطة ashraf_ibrahim

*أولا لما تيجي تفرمل متضغطش دبرياج عشان متفصلش منظومة الفتيس وتخلي التروس متعشقة ودا هيساعدك انك تقف اسرع
وربنا يوفقكم جميعا

كده مش غلط على الفتيس؟
للاسف انامنالنوع اللى بيدوس دبرياج على طول مش عارف اخلص من العاده الزباله دى