الموضوع: انا في مشكله ومحتاج رأيكم

المشاركة الأصلية كتبت بواسطة a7med_pharma

لو مافيش سابق معرفة بين العيلتين
يبقا يمكن هما حاسبنها إن ده تأمين للبنت مش أكتر
والله أعلم

يعتبر فعلا مفيش معرفه

المشاركة الأصلية كتبت بواسطة member

أنا شايف ده عادي .. لو البنت كويسة ماتخسرهاش عشان شوية ماديات بسيطة

صحابي بيقولولي كده بس انا الصراحه مش عاجبني وضع التخوين

المشاركة الأصلية كتبت بواسطة mr_sameh

انا اللي اعرفه ان كل الفرش بيتكتب في القايمه باسم الزوجه

المشاركة الأصلية كتبت بواسطة m.zaher

ممكن يكون قصده بكتابه كل العفش للبنت ان كل العفش يتكتب في القايمة وده الطبيعي

باباها قال انا مش هكتب قايمه بس فواتير العفش اللي هنجيبه بالنص باسم البنت


و نصيحة مدام انت بره و بتجربه اصحابي كتير في الغربه كانوا بيدفعوا دم قلبهم بس لمجرد انهم بره
انشف في التعامل ومش كل حاجة حاضر

منا مش قايل حاضر انا محتار ومن الاول وقايل للبنت لا حتى من قبل ما اعرف راي اخوالي وانهم جوزوا بناتهم ازاي

المشاركة الأصلية كتبت بواسطة شريف

+1

دخل حد كبير و اسحب نفسك من سكه الاتفاقات دي خالص
خلي دايما الوسيط او الاهل هما اللي يتفقوا

ما ده اللي حاصل رديت عليه قولتله هكلم اخوالي هما ادرى منى وعندهم بنات ومجوزينهم

المشاركة الأصلية كتبت بواسطة أحمد كمال

ماهو التفكير ده اللي بيودي الراجل في داهية ...... تخليك large بس ده بيخليك تتركب

المشاركة الأصلية كتبت بواسطة أحمد كمال

ما تلفش حبل المشنقة بايدك على رقبتك

القايمة حبل مشنقة

دي ممكن في اي خلافات و انت مش موجود في مصر اساسا العفش يتنقل لمكان تاني و يترفع عليك قضية تبديد امانة و تاخد حكم غيابي و تيجي نازل بالسلامة تلاقي نفسك بتتكلبش في المطار

معلش التخوين مالوش لزمة

و قول له انا لو ماحصلش نصيب مش هتبقى خناقتنا عالعفش و الكلام الفاضي ده

قال لك يعني ايه قول له يعني حضرتك عامل حساب الانفصال من دلوقتي و انا باقول لك لو حصل كده لا قدر الله ساعتها العفش مش هيبقى اكبر مشاكلنا .......

و اللي عاجبه عاجبه اللي مش عاجبه البنات اللي عايزة تتجوز مالية البلد و خش عالمواقع النسائية اياها و شوف و هما هيموتوا على عريس ازاي !!!

و المؤخر شرعا دين عليك سواء طلقت ام لم تطلق يعني المفروض تسده فماتكتبش على نفسك رقم ما تقدرش تسده او رقم يعضلك .......

و اللي مخون أو متعب من اولها مالوش لزمة و انت ما تحسسهمش انك ميت عالجوازة لان ساعتها هيخلوك تمشي تكلم نفسك خليك برنس (و خلي بالك فيه شعرة رقيقة بين انك تبقى برنس و انك تبقى تنك ...... بلاش تناكة كله بالاحترام و الذوق و الادب بس تبقى مالي مركزك ....) ...... و الا شوية و هتخش في الشقة دي بيئة و الفرح مكانه بيئة و مش عارف ايه و مابصرش ايه و الكلام ده

ده رااي الشخصي وانا مش موافق على فكره قايمه ومؤخر من الاساس فلقيت صحابي بيقولوا غلط وبتاع وانا فاهم كويس ان المؤخر ده دين عليك مش لما يحصل طلاق و بس من كلام حضرتك انتا شايف اني لازم اكون كاتب مؤخر ؟؟؟

بس اللي محيرني اراء الناس اللي حواليا هوا الجواز كده ولازم قايمه ولازم مؤخر وكلام تييت مش بالعه منا لو واحد واطي وكاتب على نفسي مليون جنيه - على اساس انهم فاكرين ان ده تقدير للبنت -وحبيت اطلق منا هطلع عينيها لغاية ما تقول حقي برقبتي