معاد (قطع غيار المازدا 3) و الرغبة فى شرائها و التخوف منها فى ذات الوقت
دلوقتى يا جماعة انا لسع بايع عربيتى النترا 2005, و قبليها كنت ركب بورا, و الحمد لله عارف اسعار قطع غيار العربتين و ادائهم العام و مشاكلهم.
طيب انا دلوقتى بدور على عربية استعمال,و كل شوية بحاول ارسى على موديل بس بتراجع ياما عشان اسعار قطع غيار او عيب فى بعض السيارات, او سعر السيارة لا يناسبنى و هدى أمثلة:
البيجو 406: عربية جبارة فى رأيى الشخصى و معظم قطع الغيار من الممكن تدبرها و أهمها الفتيس الأوتو الكان مشكلة عامة فى السيارة و ده سعره كان 10,000 استيراد و نزل ل 7000 من بق التاجر و من غير فصال, طيب المشكلة فى رأيى انى عرفت ان زيت الفتيس لازم يتغير كل "20,000" ك و ده زيت غالى بيكلف فى حدود 1000 ج, يعنى السكودا و الفولكس بنفس السعر بس بيتغير كل 60,000 ك, فعموما قلت ابعد عن الشر و غنيلو.
سكودا A5: عربية ممتازة فى رأيى و حبى لها لا يقل عن ال 406, لكن هيا ليها بعض الهفوات تتلخص فى كومبريسور التكييف, و الفتيس لو مغيرتش الزيت, طيب انا هشترى مستعمل يعنى مضمنش موضوع الفتيس و لقيته استيراد بسعر خزعبلى "20,000 ج من غير الفصال" ده اغلى بكتير من 406 و البورا و أوكتافيا a4 الفتيس بيتكلم ب 5000 ج من غير الفصال لسه.
الميجان : من ضمن معشوقاتى المتعددة (اه لو المدام تعرف انى قلت معشوقتى ديه), بس حتى الأن رغم ان ارتحت نسبيا من مشكلة قطع الغيار لسماعى بتوافرها باسعار مناسبة جدا, لكن تيجى نقطة الاعتماديه عائق بالنسبة ليه, لأن متخوف من حركاتها القلة خصوصا لو على طريق سفر.
و أخيرا و ليس أخرا, حبيبتى المازدا 3 (لازم اعمل الموضوع ده hidden من على اللاب توب المدام بتعد على الجهاز كتير): احد السيارات البثق فى ادائها الى حد كبير و اعجابى الباهر بتصميمها خصوصا من الداخل (التابلوه و انواره الداخليه), و السيارة يمتلكها أحد الأصدقاء لى, و عموما هو جاهل الى حد كبير فى موضوع السيارات ف مش قادر اعتمد على ارائه فى موضوع قطع الغيار, يعنى مثلا قلى ان تيل الفرامل جابو ب 350 ج من (مركز الصيانة بتاع مازدا الفى المعادى) و الدايما بنسى اسمو, لكن اسمع ان التيل بيتكلم فى 600 ج و يمكن اكتر, طب دلوقتى عربيتو عاوزه مساعدين امامى و سألنا عليهم فى مونرو مش لقيناهم, و مركز المعادى قلو سعر خزعبلى للمساعد الواحد حاجة بتاعت 1400 ج تقريبا, قلتلو تعالى ننزل الحرفيين و اهى فرصة نسال على بعض قطع الغيار الأخرى.
للأسف نزلنا امبارح متأخر, و محلات كتير كانت قفلت, و رغم وجود لكذا محل معلق علامة مازدا و نص امامى او خلفى ليها, لكن واحد بس الكان عندو قطع الغيار ساعتها (ده الشارع الفيه الشهابى بتاع فولكس و اخر الشارع يمين تدخل على شارع المرسيدس) المهم سألت احد الأفاضل عن سعر المساعدين قلى 700 ج استغربت (انا قلت اخرهم 500) قلتلو ال 2 قالى لأأأأأأأ ده الواحد قلتلو نعمممممممممم, المساعد الواحد استيراد ب 700 ج, قالى اه بس كامل, قلتلو كامل ازاى يعنى قلى (المساعد و البطاحة و السوسته) قلتلو دول سلام عندى هعمل بيهم ايه يعنى, قلى هو بيتباع كده, قلتلو امال الكبالن تعمل كام؟؟؟؟؟؟؟؟؟؟
قالى 2000 ج الكوبلن الواحد (يا للهولل) طبعا سمعت الأسعار ديه قفلت على فكرة المازدا بالضبة و المفتاح (معأنى عامل الموضوع ده على أمل انتعاش الفكرة من اول و جديد).
الفكرة ان الانترا مثلن الكوبلن كامل فى التوكيل ب 3500 ج ماشى يولعوا ب جاز, بس رحت جبت جوز استيراد ب 500 ج, لكن عشان اجيب جوز استيراد ب 4000 ج للمازدا طبعا ده هبل.
لييه طيب, أقولكو يعنى انا اعرف ان توكيل فولكس و سكودا و رينو حرامية و اسعارهم مش اقل كتير من اسعار المازدا, لكن والله المش عاجبو التوكيل ممكن يتصرف من بره سواء جديد او استيراد , يعنى انا فاكر البورا لما سألت عن الكبالن كانت فى حدود 1500 الجوز و اكيد كان فى كلام, المساعدين أعتقد الجوز كانوا بيتكلموا فى 300 ج مثلن, غير ان فيه المونرو ب 700 ج, و لما حبيت اتنفنعظ, جبت 2 مساعدين امامى اصلى جداد بتاع بلادهم Hard duty ب 1500 ج الاثين من أشرف الشهابى (ده غير الشهابى بتاع الاستيراد الفى الحرفيين) و هو فى رأيى احسن محل قطع غيار لفولكس و لكن اغلاهم على الاطلاق و ش بيبيع غير الأصلى و لو مفيش الأصلى هينصحك تجيب الصينى من بره أفضل.
المهم اعتقادى الشخصى الراجل كان بيستهبلنا لحد كبير, و بصراحة كنت مضايق انى مخدتش لفتى على مزاجى هناك بسبب قفل المحلات, فالعندو خبرة فى أسعار الاستيراد يا ريت يصحللى الأسعار و يقولى من المحلات المناسبة النجيب منها, العربية عاجبانى و كنت ناوى على الأيرو كاملة بفتحة سقف و هيئت نفسى بصراحة, بس لو الأسعار فعلن بالمنظر ده طب ماتجه للبورا (اعتراضى عليها يتمثل فى ارتفاع صوت الموتور و ال RPM على السرعات يعنى على 100 ك ال RPM بيتكلم فى 3200 لفة تقريبا رغم ان الانترا كانت بتتكلم فى 2300 لفة تقريبا, و كمان البورا و الباسات القديم غالبا بيكون فى صوت زقزقة مزج شويتين من التابلوه و الأبواب, و تشترك مع المازدا فى ضيق المساحة الخلفية بس مش مشكلة كبيرة بالنسبة ليا و طبعا سحب الماتور مرضى الى حد كبير و تصل لسرعة قصوى فى حدود 180 ل 190 فى الأوتو و تتمتع بثبات على الطريق و المناورات المختلفة) و ممتعة جدا فى قيادتها بالنسبة ليا.
اعجابى بالمازدا للأتى : قوة اداء الموتور سواء سحب او سرعة قصوى - ثباتها على الطريق و المناورات -جمال التصميم الداخلى او الخارجى خصوصا لو تمكنت من شراء الكاملة ذات فتحة السحب (ناوى على مبلغ فى حدود 85,000 ج و كانت النية فى موديل 2008 و تكون ماشية قليل حاجة بتاعت 50,000 ك مثلن) - اعتماديتها العالية.
منتظر الأراء بحيادية و تعديل اى خطأ فى معلوماتى, و رأيى سبب استهبال بتوع الاستيراد يتمثل فى علمهم باستهبال الوكيل فى أسعاره ,و قلة المعروض فى الحرفيين (ده الحسيتو بس بردو مش معيار لأنى ملفتش كتير)
و شكرا مقدما