حدث الأن ... الجزء التاني
السلام عليكم
محمود
عيل من التلاتة الي إنضربوا من يومين
حواجبه معمولة عن الحلاق... رفيعة أوي أوي أوي وكأنها حواجب بنت مايصة
المهم
دخل عليا النهاردة..أول حاجة عملها باس راسي ييجي 20 بوسة
" حجك عليا يادكتور..إنت لو تعرف محمود هتحبه"
" أنا كنت رافع ومش عارف أني كنت بعمل إيه .. ربنا جعلك ف جلبي حب لله في لله كده"
ويطلب مني إني أطلع معاه بره علشان يكلمني براحته
أطلع معاه
" إنت عارف ياداكتور إيه سبب إلي أنا فيه ..أنا ماشي في سكة مش بتاعتي وربنا"
أرد أقوله : أكيد أصحابك يامحمود
يقفل عين ويفتح عين ويرفع حاجب.. " لا لا لا لا لا لا لا لا لا لا لا لا لا لا لا لا لا لا لا ياداكتور"
" خد بالك أنا فايج وواعي لكل حاجة .. ماتفتكرش إني مسطول .. أنا في ميت ابوعربي..وده عمود .. ودي عربية .. وواقف بكلم الدكتور أحمد .. وده رصيف .. ودي قطة بتجري ورا كلب"
" أنا واعي لكل حاجة .. بس خد مني الكلام وإعقله "
قول يامحمود
" هي بنت الـ ...... إلي عملت فيا كده .. كنت بحب واحدة وجه واحد تاني خطبها ..ومن ساعتها وأنا ماشي في سكة الحرام"
" إوعى تفكر إني مسطول وللا بهزر .. إوعى ماتصدقنيش ,, أنا فايق وواعي لكل حاجة .. دي عربية وده عمود وده رصيف ودي قطة بتجري ورا كلب "
"أنا عندي ليك معزة في جلبي .. الله وحده إلي عرفها دونن عن الخلق..إنت راجل طيب وبتعمل معانا الصح"
ويغمض عينه ثواني ويفتحها
" والله أنا كنت بجوم في عز التلج..وأعزب نفسي علشان تتوب وأستحمى بالميه الساجعة علشان صلاة الفجر والبهايم نايمة "
" خد بالك .. لا لا لا لا لا لا لا لا لا لا لا لا لا لا لا أنا واعي لكل حاجة .. دي عربية وده رصيف وده عمود ودي قطة بتجري ورا كلب.. بسك إوعى الهوو " هاأ هاأ هاأ هاأ
" شوفت أديك إفتكرت إني مسطول أهه .. أنا بهزر معاك ياعسل"
"بس إوعى تزعل مني"
" ويوم ماربنا يهديني للطريق الصح .. لك عندي هدية صح تليق بمقامك في جلبي ياداكتور"
مساءك عسل..
ويطلع من جيبه إتنين جنيه فكة ( جنيه + نص+نص).. وفضل يعد فيهم شوية
وف الأخر سألني
" كام دول يادكتور ؟"
إتنين جنيه يامحمود
" مايجبوش علبة سجاير دوول "
مش عارف يامحمود
" طيب ماتجيب سيجارتين ياعسل"
نصيبك يامحمود..خد العلبة كلها ..
وإديته العلبة كلها إلي كنت لسه شاريها .. علشان موضوع إني بحاول أبطل
بسسسس