معلش يا شباب انا اتاخرت عليكم فى حل المشكلة طبعا انا كنت روحت التوكيل وكعادتهم معملوش حاجه انا بصراحة دمى اتحرق لانى روحت للسمكرى بتاعى وقالى ده عيب تقفيل فى بنط الصاج قلت انا مش هاتاقلم ولا حاجة انا مش هاسيب حقى
كلمت الولد بتاع المبيعات اللى اشتريت منه العربية وقلتلو انا عايز ارجع العربية لان معداش عليها 14 يوم وفيها عيب تصنيع البيه رد وقالى لو مكنتش رخصت كنت ظبتك يا باشا بس دلوقتى مقدرش اعملك حاجه " طبعا لو كنت مارخصتش كان قالى بس لو ماكنش جواب المرور طلع " المهم رديت علية انا ماينفعنيش الكلام الفارغ ده دى غلطتك وانا طلبت منك تفحص العربية قبل ما استلمها وتتاكد انها مفيهاش عيوب قالى طب بص كلم مدير عام المبيعات وهو يحاول يساعدك
طبعا مراتى منكدة عليا طول الفترة ديه وضربت على عربيتي لحد ماشوفلها حل للمشكلة دية بتضغط عليا لانها عارفة انى مابحبش حد يركب عربيتى
المهم كلمت مدير عام المبيعات اسمه عمرو صدقى الراجل طلع محترم وادانى رقم مدير عام الجوده والشكاوى فى المصنع وقالى كلمه ولو موصاتش لحل المشكلة كلمنى ونشوف هنعمل ايه
المهم كلمته وانا يائس من الوصول لحل بصراحه كانت مفجأة بالنسبالى
راجل قمه الاحترام اسمه المهندس معتز موسى رد عليا كالتالى
قابلنى بكرة فى مركز الهرم 9 صباحا هاكشف بنفسي على العربية وهنشوف هيعرفوا يصلحوا العيب ولا لا
لو ميتصلحش فى الهرم هندخلها المصنع تانى بشرط انها تتصلح بدون اى تاثير على قيمتها او جودتها ولو العيب مؤثر على اى حاجه من دول هارجع للادارة علشان الاستبدال او التعويض المادى
كلامه مرتب ومنظم وبصراحه اللى قالوا ده خلانى مقلوش غير اشكرك على تفهمك للموقف قالى متشكرنيش ده شغلى وربنا بيحاسبنى عليه
المهم قابلنى تانى يوم طبعا بتوع الهرم قالك ده من الفيبر بتاع الابواب والقايم قولتلو فكهم ونجرب لقيتوا تنح!! المهم المهندس معتز قالوا اه فكهم المهم فكناهم الصوت زى ما هو المهندس معتز قالى بعد اذنك هندخلها المصنع
كلمنى تانى يوم وحدد ميعاد ودخلت المصنع فى 6 اكتوبر
انا كان كل املى ان الصوت يروح ودعيت ربنا يارب انا فلوسى حلال وتعبان فيها
المهم بهد 3 ايام كلمنى وقالى احنا حلينا المشكلة كان في صاج مفارق واتعملو لحام حرارى بدون اى تاثير على العربية ومفيش دهان وخلافه روح استلم العربيه وقلى ايه رايك
اه نسيت اقلكم تانى يوم كلمت المهندس اللى استلمها فى المصنع قالى العربيه فرشها وابوابها مفكوكين بالكامل انا قلت بس هاروح الاقيها خرابة
المهم روحت استلمت والحمدلله العيب راح والتقفيل كويس جدا ويارب مايرجعش ويبارك فى عربيتنا كلنا لان بجد كلنا بنتعب اوى علشان نجيب الفلوس ديه
انا حبيت اشارك معاكو علشان محدش يستسلم قدام اى مشكلة لازم تحاول تجيب حقك وحتى لو معرفتش يبقى على الاقل حولت لان التوكيلات بتعتمد على طيبتنا واستسلامنا وبياكلوا حقوقنا واكيد فى ناس محترمة جوا التوكيلات زى المهندس معتز والمهندس عمرو صدقى اللى ساعدونى على الرغم من كبر موقعهم واكيد مسئوليتهم بس ده واجبهم زى مالمهندس معتز قالى وانا بشكره فى الاخر
المفضلات