هل الضرائب و الرشاوي و الواسطه....حلال ام حرام في هذا الزمن!!!!!!!!

**3mr Farrag** · 26-05-2008 03:03 PM

سوءال بيتكرر كتير في ذهني....
و مش عارف بصراحه ايه الصح من الغلط في الزمن الحالي
فكره الضرائب و الرشاوي و الواسطه ....
احب اتكلم عنهم ...و نتكلم بالعقل...هل هي حرام ام حلال في الزمن ده
وليس هل هي قانونيا ام غير قانونيا........

يعني اولا الضرائب......المفروض ان الدوله مطبقاها لأنها بتديلك في مقابلها خدمات....
هل انت شايف انك بتاخد الخدمات ديه.....طيب انا دلوقتي شايف اني مش باخد خدمات باللي بدفعها في الضرائب...
يعني المستشفيات ذي الزفت و الطرق زفتين....و كله بقي ير ادمي
هل لو انا اتهربت من الضرائب ...يبقي حرام شرعا.....؟؟؟؟؟؟
طيب انا كتير بقول لنفسي....دلوقتي جمارك السيارات مرتفعه بطريقه غير طبيعيه...
بينما في جميع الدول اسعار الجمارك اقل بكثير....غير كده كمان انا بدفع ضريبه عاليه جدا و مش باخد حاجه في مقابلها
يعني نفس الفكره ...مش باخد في مكانها طرق مرصوفه كويس ...ولا باخد مكانها اي خدمه ....
فانا بحللها بكلمه......اتاااااوه... وليس ضرائب
فحسبتها مع نفسي كده....(بس محدش ياخد كلامي ثقه....علشان مش عايز افتي...ديه مناقشه)
ان لو عرفت اتهرب من الجمارك ديه ...يبقي حلال ...لأني بدفع زياده في حاجه اقل من ثمنها....
وفي نفس الوقت بقول حرام....لأني باخد حاجه زياده عن بقيه الناس اللي حوليا...

ثانيا الرشاوي.....وكلمه رشاوي ليها مفهومين
واحده حلال و التانيه حرام........

و الفكره هي ليه حرام الرشاوي؟؟؟؟
لأنك بتاخد حاجه مش من حقك بسهوله....او حاجه زياده عن بقيه البشر اللي حوليك ...عن طريق دفع ضريبه(من تحت لتحت يعني)
يعني مثلا اللي بيطلع الرخصه بالفلوس او بواسطه....يعتبر انه اخد حاجه زياده من غير ما يتعب فيها....
(بس في نقطه منها صح ...ازاي تكون حلال)

اما ازاي تكون الرشاوي او الواسطه حلال....(سألنا السوءال ده لمفتي)
تبقي حلال لما تمشي بالطرق الطبيعيه لأخذ الخدمه المطلوبه....ذي بقيه الناس العاديه
و من غير وساطه .....بس لما توعدد فتره كبيره مش عارف تنجز المهمه ديه ....و بقي خلاص استحاله تنجزها بالطرق العاديه
ممكن تستخدم اسلوب الواسطه او الدفع.....(بس ده فقط في حاله عدم استطاعتك انجزها بالطرق العاديه)
و انها خدمه طبيعيه مش حاجه زياده بتاخدها عن بقيه الناس من غير حق....
يعني دلوقتي دخلت امتحان السواقه عشروميت مره و كل شويه تسقط....مع انك بتسوق كويس و حافظ الاشارات
بعد فتره ماتكون خلاص مافيش فايده تطلعها ....ممكن تستغل نقطه الواسطه او الدفع(مش هنقول عليها رشاوي هنا)

طيب واحد ذي حديد عز....ده مش برضوا اسمه احتكار...و الاحتكار معروف انه حرام شرعا
اولا الحديد و الصلب من الصناعات الاستراتيجيه في اي دوله....
يعني لما تتباع لشخص عادي و يتحكم بالسوق مش ده اسمه احتكار.....و عمال يغلي في الاسعار كل شويه
طيب انا لو عرفت بطريقه ما اشتري الطن ارخص بكتير من عز نفسه.....و في نفس الوقت مايكونش بيخسر...
و هقول عن طريق الدفع مش الرشاوي.....
هل كده يبقي حرام ام حلال

ياريت نناقش الفكره ديه....لأن اكيد معظمنا فكر في الموضوع ده...
و انا عارف ان مش صح اننا نفتي.....بس انا بقول مناقشه وليس فتوي
و ياريت اي حد فاهم ودارس فقه و شريعه ...يناقش معانا في النقط ديه

و اسف علي الاطاله....بس دماغي بدأت تتعب من التفكير:(

**abou_ruqi** · 26-05-2008 03:20 PM

أنا أعتقد أن الوقت و الزمان الذي نعيش فيه الآن يحتاج لفقه جديد , مبقولش نغير في ثوابت العقيدة ولا ما هو معلوم من الدين بالضرورة

إنما معروف إن الشافعي كان له توجه فقهي في الإفتاء لما كان في العراق , ولكن لما جاء مصر تغير تماما وأصبح له منهج مختلف ده لإختلاف الزمان و المكان

علشان كده فقهالسعودية مايمشيش في مصر وفقه مصر مايمشيش في تركيا وهكذا

في الخليج اللي بيعرف يسوق بيعرف يطلع رخصة واللي ما يعرفش استحالة يطلعها
علشان كده اللي يدفع رشوة هناك يستاهل قطع إيده

أما في مصر قلي إزاي حترخص عربية من غير بقشيشات بالهبل علشان تخلص ؟؟
قولي إزاي تدفع مخلفات لم ترتكبها لإنك لم تكن تملك السيارة أصلا في ذلك التاريخ , ويكون الواسطة حرام ؟؟؟؟

قولي إزاي حتدخل لوكيل نيابة المرور (رغم إن ده حققك كمواطن ) من غير ما تدي العسكري اللي واقف برة المكتب حاجة , ولم معطيتوش أدي دقني لو عرفت تدخل !!

قولي إزاي تدخل أي بضاعة لمصر من غير ما يكون لك واسطة في الميناء وتدفع رشاوي علشان التخليص ؟؟؟

أنا متأكد إن الواسطة حرام و الرشاوي حرام
بس الظاهر إننا إتولدنا في الزمان الغلط و المكان الغلط ومافيش مفر من قرف الدنيا و نار الأخرة

وكل ده واللي ينى مصر حلواني , أمال لو كان فسخاني كنا حنعيش إزاي ؟؟

**Islam_galal** · 26-05-2008 03:24 PM

أنا حاتكلم علي نفسي
الضرائب و الجمارك . . . . إتاوة و أنا مستحل التهرب منها لو قدرت بس عادة صعب

الرشاوي كل ما هو جلب منفعة حرام و كل ما هو لدفع الضرر حلال

**Ahmed Samy** · 26-05-2008 03:44 PM

يااااااااه يا عمرو

دا انتا كأنك بتطلع من دماغي و تكتب

تسلم ايدك

بس في حل بسيط انا وصلتله في النهاية بعد سنين من التفكير في اللي انت بتقوله ده

البلد دي و حشة و العيشة فيها هاتركبك ذنوب أو تعيش مش بني آدم

سيبها ...
خلص و سيبها

هاتروح بلد تانية تدفع كل حاجة و انت مرتاح (مع انها كتير مش شوية) بس اللي هاتدفعه هاتلاقيه قدام عينيك و تحت رجلك و حواليك

**abou_ruqi** · 26-05-2008 03:57 PM

المشاركة الأصلية كتبت بواسطة Ahmed Samy

يااااااااه يا عمرو

دا انتا كأنك بتطلع من دماغي و تكتب

تسلم ايدك

بس في حل بسيط انا وصلتله في النهاية بعد سنين من التفكير في اللي انت بتقوله ده

البلد دي و حشة و العيشة فيها هاتركبك ذنوب أو تعيش مش بني آدم

سيبها ...
خلص و سيبها

هاتروح بلد تانية تدفع كل حاجة و انت مرتاح (مع انها كتير مش شوية) بس اللي هاتدفعه هاتلاقيه قدام عينيك و تحت رجلك و حواليك

فكرة وصانا عليها القرآن

وعلى الأقل هناك حتعيش مواطن درجة تانية و أنت عارف ليه , إنما هنا إنت عايش مواطن درجة ثالثة ومش عارف ليه !!!!

بِسْمِ اللَّهِ الرَّحْمَنِ الرَّحِيمِ

إِنَّ الَّذِينَ تَوَفَّاهُمُ الْمَلَائِكَةُ ظَالِمِي أَنْفُسِهِمْ قَالُوا فِيمَ كُنْتُمْ قَالُوا كُنَّا مُسْتَضْعَفِينَ فِي الْأَرْضِ قَالُوا أَلَمْ تَكُنْ أَرْضُ اللَّهِ وَاسِعَةً فَتُهَاجِرُوا فِيهَا فَأُولَئِكَ مَأْوَاهُمْ جَهَنَّمُ وَسَاءَتْ مَصِيرًا (97) إِلَّا الْمُسْتَضْعَفِينَ مِنَ الرِّجَالِ وَالنِّسَاءِ وَالْوِلْدَانِ لَا يَسْتَطِيعُونَ حِيلَةً وَلَا يَهْتَدُونَ سَبِيلًا (98) فَأُولَئِكَ عَسَى اللَّهُ أَنْ يَعْفُوَ عَنْهُمْ وَكَانَ اللَّهُ عَفُوًّا غَفُورًا (99) وَمَنْ يُهَاجِرْ فِي سَبِيلِ اللَّهِ يَجِدْ فِي الْأَرْضِ مُرَاغَمًا كَثِيرًا وَسَعَةً وَمَنْ يَخْرُجْ مِنْ بَيْتِهِ مُهَاجِرًا إِلَى اللَّهِ وَرَسُولِهِ ثُمَّ يُدْرِكْهُ الْمَوْتُ فَقَدْ وَقَعَ أَجْرُهُ عَلَى اللَّهِ وَكَانَ اللَّهُ غَفُورًا رَحِيمًا (100)

سورة النساء

**3mr Farrag** · 26-05-2008 03:58 PM

المشاركة الأصلية كتبت بواسطة Ahmed Samy

يااااااااه يا عمرو

دا انتا كأنك بتطلع من دماغي و تكتب

تسلم ايدك

بس في حل بسيط انا وصلتله في النهاية بعد سنين من التفكير في اللي انت بتقوله ده

البلد دي و حشة و العيشة فيها هاتركبك ذنوب أو تعيش مش بني آدم

سيبها ...
خلص و سيبها

هاتروح بلد تانية تدفع كل حاجة و انت مرتاح (مع انها كتير مش شوية) بس اللي هاتدفعه هاتلاقيه قدام عينيك و تحت رجلك و حواليك

تصدق....كلمت خلص و سابها شلتها من قاموسي
انا دلوقتي بقول .....سيبها و بعدين اخلص
و ادعيلي ربنا يفكها عليا ...و اعرف اسافر

**Powert** · 26-05-2008 04:12 PM

لو كلنا بطلنا الرشاوي

الكلمة هتتلغي من قاموس حياتنا لوحديها

بس كل واحد بستسهلها ويقولك ما بيجيش غير بكده

**MoToRiZeR** · 26-05-2008 06:07 PM

البلد باظت خلاص يا عمرو .. و كل التغييرات اللي بتحصل فيها للأسوأ
و انا موافق جدا علي مبدأ ان اللي عايز يستفيد بحياته يسيبها .. ارض الله واسعة

**abou_ruqi** · 26-05-2008 06:22 PM

المشاركة الأصلية كتبت بواسطة amir_ezzat

يا جماعه مش من السهل قول حرام او حلال إلا عن علم
ده لو واحد سال عن حاجة فى العربية محدش بيجاوب غير اللى بيعرف يبقى بلاش كل واحد يقول راية ونستنى راى واحد اعلم بما يقول علشان كدة حرام

اما الاخ اللى قال محتاج فقه جديد ربنا يسامحة علشان الدين ده لكل وقت ولكل زمان
بالله عليكو بلاش اى افتاء فى الدين بدون علم

يا باشمهندس يا ريت حضرتك -زي ما بتقول- تكون عارف أنت بتتكلم علي ايه

أنا طالبت بتغيير في الفقه مش تغيير في الدين زي ما حضرتك إدعيت عليا
والمشاركات قدام الناس وشايفين المصطلحات

عارف يعني إيه فقه يا باشمهندس ؟؟؟
يعني أراء الفقهاء اللي هما بشر زيي و زيك و بيغلطوا

والإمام أحمد وقف عن قبر رسول الله صلى الله عليه و سلم وقال :
"كل عالم يؤخذ منه و يرد إلا صاحب هذا القبر"

يعني كلام العلماء يرد والفقه يرد وهناك فقه و فقه مقارن
وفي ناس حنابلة و في ناس شافعية وفي ناس مالكية وفي ناس حنيفية

هما دول الفقهاء الأربعة الأساسيين غير المئات الفرعيين

والسلفيين لهم فقههم والإخوان لهم فقههم و الأزهر له فقهه
ده كل ده و إحنا أبناء المذهب الواحد مذهب أهل السنة و الجماعة مش حنتكلم عن الشيعة

فهمت حاجة ؟؟؟

عرفت يعني إيه تغيير فقه و يعني إيه تغيير دين ؟؟؟

يا أستاذ أنت رميتني بالكفر , وإن لم أكن كافر فعلا وكان رميك لي كذب و قصف عارف أنت وضعك إيه دلوقتي عند ربنا ؟؟؟؟

استغفر ربك وأندم على ما قلته

-

الموضوع: هل الضرائب و الرشاوي و الواسطه....حلال ام حرام في هذا الزمن!!!!!!!!

LinkBack

أدوات الموضوع

عرض

هل الضرائب و الرشاوي و الواسطه....حلال ام حرام في هذا الزمن!!!!!!!! - انشر الموضوع فى :

-

-

-

-

المواضيع المتشابهه

هو كدة حلال ولا حرام

فوايد البنوك حرام و لا حلال, و لو حلال, أنهى أفضل بنك ؟؟؟

هل التامين حلال ام حرام؟

حد يفهمني حلال ده و لا حرام؟

التأمين حرام ولا حلال؟؟؟

الكلمات الدلالية لهذا الموضوع

المفضلات

المفضلات

ضوابط المشاركة