الموضوع: انسب زيوت التشحيم والسوائل (كيا سيراتو)

المشاركة الأصلية كتبت بواسطة aymona80

السلام عليكم عندى سيارة كيا سيراتو 2017 وضعت فيها زيت موتور ايسن 0w30 بطريق الخطأ
اعمل ايه انزلوه من العربيه ؟؟ ولوسيبتوه فى العربيه هيعمل مشاكل للموتور مع العلم ان مهندس التوكيل قالى سيبوه الف كليو وتعالى ابص عليه؟

المشاركة الأصلية كتبت بواسطة aymona80

الزيت الموصى به فى الكتالوج 5w30

قبل ما نفكر ننزله ولا لأ.. لازم نتأكد إن الزيت مطابق للمواصفات ولا لأ...

هنعرف المواصفات منين.. زي ما حضرتك قلت.. من الكتالوج..

الحاجة المهمة اللي حضرتك لازم تعرفها إن مواصفة الزيت مهياش اللزوجة وبس.. فيه حاجة أهم منها اسمها كود مستوى الأداء (أو الجودة)..

والكود ده لازم يكون زي الكتالوج على الأقل أو أحسن منه ...


في كتالوج السيراتو 2017... الكتالوج طالب مواصفات مختلفة حسب الموتور المستخدم..

شوف الصورة دي من كتالوج السيراتو 2017 (مواصفات الشرق الأوسط):



طبعا احنا هنا بنتكلم على الموتور الـ1600 MPI...

حسب الكتالوج ده.. الزيت المناسب لازم يكون مستوى جودته كالتالي:

واخد تصنيف API SM على الأقل.. وواخد تصنيف ILSAC GF-4 على الأقل
أو
واخد تصنيف ACEA A5 على الأقل

يعني حضرتك لما تشتري علبة الزيت لازم تلاقي الزيت مكتوب عليه تصنيف API و ILSAC ... أو تلاقي عليه تصنيف ACEA... زي المكتوب فوق بالضبط

لو لقيت بقى زيت عليه الـ3 مواصفات يبقى ده زيت ممتاز لعربيتك.

فبالطريقة دي مش كل زيوت الـ5W-30 اللي في السوق تمشي معاك.. فلازم تختار كويس


أما بالنسبة للزوجة

دي اللزوجات المسموح بيها للعربية:


من الصورة .. ينطبق علينا المجموعة اللي تحت بس

للأسف .. مفيش من ضمن الاختيارات لزوجة 0W-30

المشكلة إن الكتالوج كاتب ملحوظة في آخر سطر تحت على الشمال إن استخدام أي لزوجة غير المذكور في الكتالوج ممكن يسبب تلفيات وأضرار في الموتور.

علشان كده يفضل تنزل الزيت دلوقتي.. خصوصا إني متوقع إن الزيت ما يكونش مطابق لمواصفات الجودة اللي الكتالوج عايزها... وده الأهم.


لو تصورلنا علبة الزيت اللي حضرتك حطيته (ظهر العلبة).. ممكن نعرف إذا كان الزيت مناسب ولا لأ.

ولو محتاج أي مشورة في اختيار الزيت المناسب .. أنا تحت أمرك.


أنصحك بردو تعدي على المواضيع ده لو حابب تعرف أكتر عن زيوت السيارات..

القواعد الذهبية لاختيار زيت العربية.... موسوعة مبسطة لأساسيات زيوت المحركات

إمتى تغير زيت الموتور؟؟؟

الزيوت التخليقية ... هل هي تخليقية فعلا؟؟

مستوى الزيت في المحرك .. إيه أسباب نقص الزيت؟؟؟

تبخر الزيت... هل هو حقيقة أم خرافة؟؟

أسطورة الـ100 ألف كيلومتر... هل لها أصل؟؟؟


...