الموضوع: دكتور ورشة امبابة

اولا السلام عليكم ورحمة الله وبركاته

قبل ما اتكلم عن الكهربائي والشغل الي كان عندي في الكهرباء انا هقول Hint عن ورشة امبابة

الورشة عبارة عن توكيل فولكس صغيور
من اول لما تدخل وتلاقي عليها علامة فولكس لحد لما تدخل وتلاقي علامة فولكس فكل حتة ومتعلق علي كل حيطة فيها بوسترات لعربيات فولكس وعلي الدولايب وكل فتفوتة فيها بتقول فولكس وقطع الغيار والطابلوه والفوانيس والشبكة الأمامية وحاجات كتير اوي مرمية فولكس

المهم

انا روحت لقيت التالي
جولف 2
جولف 1
جيتا 2
2 بيتلز
اوكتافيا A4
جولف 3
وطبعا الأبيزا بتاعتي
ووانا هناك جه بعدي كوردوبا 96 وبولو 97

المهم

انا كان عندي طبعا المشكلة الي اتكلمت عليها في الموضوع بتاع حكاية الأبيزا المفصلة
http://www.nilemotors.net/Nile/26032...post3874030002

انا طبعا في المشاركة دي عامل high light علي كام نقطة كدة
زي اني اشتريت الموتور وسيبت الحاجات الي موجودة عندي زي الأسبراتير والكنترول والضفيرة

وزي اني بشتكي من الفيشة العمومية والفيشة الي بتدي كهربا للرشاشات
وزي ان عوامة البنزين فيها مشاكل
وعداد الكيلو متر

وهي دي كل مشاكلي الظاهرة حاليا

المهم

وقفت شوية لحد لما مصطفي خلص الي فأيده وفضيلي

عصام المكانيكي كان كلمه اساسا وقاله علي مشكلة عربيتي وبالتالي انا روحتله وهو كان منتظرني وعارف ايه الي في عربيتي من قبل الكشف

وفعلا

بمجرد النظر

دخل الورشة وجابلي مسطرة كاملة
المسطرة دي عبارة عن الجراب البلاستيك الي جواه اسلاك كتير وخارج منها الفيش بتاعة الرشاشات

اكتشفت بقي انها ضفيرة كاملة للأنجيكشن
خارج منها الفيش العمومية كلها بتاعة الموتور

فيش لمعظم الحساسات في العربية

قالي المفروض اغير المسطرة دي والضفيرة بتاعة الموتور

ليه ؟؟؟؟

لأن الفيش عندي مهربة كهربا ودة الي مبرجل العربية تماما

نسيت اقولكم اني ماشي بالعربية من الهرم لأمبابة وهي مهيسة تماما وبتبطل لوحدها صحيح ماشية 4 سلندر وكل البوجيهات شغالة ولكن مش بتعلي عن 2 ار بي ام وبتبطل لوحدها

المهم

قالي هتسيبهالي وتيجي تاخدها بكرة (الي هو النهاردة)
قولتله مش هينفع

قالي خلاص هتسهر معايا

وفعلا مشيت من عنده الساعة 1 بليل

اول حاجة عملها انه فك المسطرة القديمة وطلعها برة

ركب المسطرة الجديدة

كان في عندي فيشة في الضفيرة وهي الفيشة المسؤلة عن الكهربا الي رايحة للرشاشات

فعلا فكها وجابلي من عنده فيشة تانية

طبعا الموضوع مش بالبساطة الي انا بكتبها دي
كونك تفك فيشة في الضفيرة فيها 20 pin وتغيرها بواحدة تانية دة حوار غير عادي

مصطفي الكهربائي شكله العام صنايعي عادي

لما بدأ الشغل واثناء وقفتي هناك

أكتشفت انه دكتور في هيئة كهربائي

حد بيفهم اوي
عبقري اوي

صنايعي اوي

المدهش والداعي للدهشة انه فعلا دكتور مش كفتجي
يعني الموضوع مش قص اسلاك ولحام فيشة مكان فيشة

لا

انا لقيته بيقص اول سلك (رقمه في الفيشة 1) وراح مطلع اول سلك في الفيشة الجديدة (رقمه في الفيشة 1) وراح لاحم - بردو الألمان ولاد جنية مش سهلين ما عندهمش تهريج قتالين قتلي
طلع سلك 2 وراح لاحم
طلع 3 و4 و5 و6 و7

بعد كدة لاحظت انه بيقص بأطوال مختلفة

طب ليه ياعم مصطفي ؟؟؟

قالي لو كل الأسلاك طول واحد لما الحم واجي اغطي هتكلكع في الجراب بتاع السلك

اااااااااااااااااه

اتارية ابن الجنية مارماش الجراب (الجراب الأسود الي عامل زي خرطوم الكهرباء الفلكسيبل)

وراح مطلع شريط لحام مخصوص (زي الكشري المخصوص) شريط لحام قماش اسود !!!!!!!!!!!!
شغل فبريكة ؟؟؟؟؟؟؟؟؟؟؟؟؟؟

يا ابن الجنية

انا ماقدرتش اتمالك نفسي وفضلت اضحك بهيستريا

المهم

خلص العملية الجراحية (دكتور مش تهريج عمل عملية نقل شرايين)

قالي لازم تجيلي تاني لأن ضفيرة عربيتك مش عجباني ولازم اعيد عليها كلها

في السكة وهو شغال راح مغيرلي فيشة المروحة لأنها كان شكلها بلدي - فعلا انا لما سقطت الموتور بعد السمكرة كانت المروحة مالهاش فيشة والعبقري الي اشتغل في العربية راح عاملي فيشة عبارة عن 3 ترامل بسلك اصفر شكله بيئة وهي علي كدة

وطبعا شغلي المروحة علي سرعتين زي الفبريكة مش زي العبط الي كان عندي

بعد لما خلص ال operation راح جايب اللاب توب (acer) وراح مركب الوصلة وكاشف يا معلم

الحمد لله مالقاش اخطاء

بس لاحظ ان المروحة لما اشتغلت قراية الحرارة علي الكمبيوتر مش مظبوطة (86.4) قالي لازم تغير حساس المياة

قالي لازم تغير كنترول

لازم تغير الأسبراتير

نظف البوابة

وهوووووووووووب

الحمد لله بفضل الله - الله اكبر

العربية شغالة زي الساعة - ار بي ام 0.9 وعلي الكمبيوتر كانت قارية 945 rpm

الكيلو متر اشتغل (ماهو كان فاصل)

عوامة البنزين ثبتت (بطلت تفول لوحدها وتفضي لوحدها في الملفات يمين وشمال)

وفي مفاجأة مش هقول عليها غير لما اروحله تاني انشاء الله

دي حكاية ورشة امبابة وحكاية الدكتور مصطفي

بالمناسبة
الأسعار في متناول الأيد

والله المستعان
،
،