مغامراتي في تغيير الانبوبة و حملة ع مستودع انابيب عباس العقاد
بسم الله الرحمن الرحيم
السلام عليكم و رحمة الله و بركاته
روحت انهاردة و اخيرا بعد عذاب اسبوعين عشان اغير الانبوبة من مخزن اللي ورا الحديقة الدولية
و عينكم ما تشوف الا النور ع الصفوف اللي واقفة
و البهوات بتوع المخزن بيطلعوا للي بيلفوا موتسيكلات و نقل و تروسيكلات بالـ15-20 انبوبة و احنا طالع عينا عشان انبوبة و لا اتنين و بيدوها زيادة عن سعرها كمان بدل 4 جنيه بـ5 جنيه و فضلت واقف يجي ساعة الا ربع و الناس كلها بتلطم و تتخانق من اللي بيحصل و عاملين نشيل انابيب بعض
الا اني خلاص كنت قربت من التغيير فوجئت بمفتشي تموين كانوا واقفين الأول ع جنب و نزولوا هبوا في كل اللي شغالين بيقولوهم الانبوبة بـ4 جنيه و محدش يطلع للعالم اللي بتوزع انابيب في السوق السودا بس المجموعة ديه مكنتش شايف شغلها شوية في الأول بس شدت بعدها ع كل الموجودين ساعة لما جيت اغير و بقوا ماشيين يقولوا محدش يغير باكتر من 4 جنيه ده السعر الرسمي
و بعد ما غيرت بشوف اللي بيحصل
العاملين لموا نفسهم في انهم يدوا انابيب للناس ديه و كذلك المفتشين شدوا
فالناس اللي بتاخدها تبيعها بقوا بيتحايلوا عشان ياخدوا الانابيب.... واحد هيقولي ازاي ؟
البهوات بيجيبوا كل الستات و الاطفال اللي يعرفوهم و يخلوا كل واحد فيهم ياخد انبوبة و يغيرها فرداني و يستنوهم جنب سور الحديقة الدولية لكن المفتشيين هرشوهم و بقوا يمشوهم و يبهدلوهم و عارفينهم
و بعدها مفيش دقايق جت حملة تانية بتضم مراقبي تموين و مباحث التموين و نزلت ورا العيال بتوع التروسيكل و الموتسيكلات و النقل و كانوا بيلموا في انابيبهم طلعوا العيال جريوا
و كل ده و انا واقف بتفرج :nemoflow:
و بعدها جيه المحافظ و تقريبا وزير التموين و شخصيات و خلعت انا
انا اتمني يعلموا الصح مع اللي ماسكين المستودع ده و يغيروا كل اللي ماسكينه لأنهم هم اللي بيطلعوا من ورا و لو مفيش حملة بيدوهم تاني لو دول اتمسكوا اتظبطوا اللي بعدهم هيجيوا يحترموا نفسهم
و احلي حاجة بقي في الليلة ديه اني لما جيت اشيل الانابيب لقيتها بسم الله ما شاء الله بصحتها اول مرة اشيل انبوبة بالوزن ده من سنين ( معلش أصلهم ملحقوش يفضوا نصها كالمعتاد )
و الحمد الله انا ملاحظ ان التموين سواء المصلحة او المباحث بسم الله ما شاء الله شادين حيله ع المستودعات و المخابز و بائعي التموين
شكل الجنزوري قايم بالواجب يا رجالة
ايوة كده كان من زمان الكلام ده
لو فضلت الحملات طول الوقت كده البلد هتتظبط و هنوفر فلوس اكتر و الاسعار هتنزل
لأن تهريب الانابيب مثلا بيأثر برده ع الاقتصاد و خاصة جيب المواطن اللي زي حالاتنا ههههههههههه
http://www.nilemotors.net/Nile/264102-a.html
و لما طلعت شوفت الخبر ده كمان دلوقتي :36_2_33:
شوفتوا قبل الاخبار فنحن نايل موتورز نختلف عن الاخرين هههههههههه
اقتباس:
ضبط أسطوانات بالسوق السوداء خلف الحديقة الدولية
الخميس، 5 يناير 2012 - 17:14
قام الدكتور عبد القوى خليفة، محافظ القاهرة، بجولة مفاجئة على إحدى مستودعات توزيع أسطوانات البوتاجاز الرئيسية، والذى يقع خلف الحديقة الدولية، حيث تم ضبط عدد من التروسيكلات والموتوسيكلات المحملة بأعداد من الأنابيب فى طريقها للبيع بالسوق السوداء، وتمكن المحافظ من ضبط المخالفين.
على الفور، استدعى المحافظ مدير مديرية التموين ورئيس الحى وأفراد الشرطة، وشدد على ضرورة إعادة الانضباط للمخزن وعدم السماح بالبيع إلا للمواطنين، وبالسعر الرسمى المقرر (4 جنيهات للأسطوانة)، حيث تبين أن معظم العاملين على التروسيكلات من مناطق الكيلو 4.5 وعزبة الهجانة، ومنشأة ناصر، وعزبة العرب.
وأكد خليفة على مدير مديرية التموين بسرعة الدفع بكميات إضافية من الأسطوانات لسد احتياجات هذه المناطق بصفة مستمرة لحين القضاء على ظاهرة البيع بالسوق السوداء.
فيما تمكنت مديرية التموين بالقاهرة من ضبط 1362 أسطوانة بوتاجاز مع عدد من سائقى سيارات أنابيب البوتاجاز، التابعين لشركات الغاز، أثناء محاولاتهم التصرف فى كميات من الأنابيب، وبيعها فى السوق السوداء، وذلك بمناطق حلوان ومصر القديمة و15 مايو.
