نقص مياه الرادياتير

**waelmohamed201** · 08-01-2012 10:21 AM

النهاردة الصبح بالصدفة وانا بفتح الكبوت لاقيت المياه الخضراء ناقصى قربت كده على min أنا بصراحة إشتريت عبوة 1 لتر مياه خضراء من موبيل وذوتها
بس السؤال
هل طبيعى إن االمياه تنقص مع العلم إنى آخر مرة بصيت عليها كانت من حوالى 7 شهور من الصيانة اللى فاتت
انا عربيتى أفيو وعاملة 20000 كيلو

**medo500** · 08-01-2012 11:32 AM

استاذ وائل لما حضرتك فضيت العبوة وصلت للmax ولا لسة محتاجة تزويد تاني

**waelmohamed201** · 08-01-2012 11:46 AM

لا انا لسة معايا حوالى نص العبوة هى كانت محتاجة حوالى نص لتر علشان تبقا فى المنتصف بين الـ MIn والـ MAX بس انا موصلتهاش لـ MAX
مش عارف إيه رأيك أزودها لـ MAX

**medo500** · 08-01-2012 11:53 AM

اه زودها حضرتك للmax وراقبها هي المفترض تنقص بس مش كتير عموما ممكن بعد شهر او شهرين شوف وصلت لفين ياريت بعد ما حضرتك تزودها وتحكم اغلاق الغطاء بتاع القربة استني العربية لما تكون سخنة او وانت راجع من مشوار وفك الغطاء سنة بسيطة علشان تخرج الهواء من القربة وبعد كده اربطه تاني كويس

**waelmohamed201** · 08-01-2012 12:34 PM

متشكرين لذوقك جدا

**medo500** · 08-01-2012 03:32 PM

المشاركة الأصلية كتبت بواسطة waelmohamed201

متشكرين لذوقك جدا

لا شكر علي واجب احنا هنا كلنا اخوات وكلنا بنستفيد من تجارب بعض

**abou-yahia** · 08-01-2012 03:53 PM

النفص طبيعي

المهم ميكونش مستمر علي فترات قصيره

واتاكد ان القربه مش مسربه من فواصلها ( حتلاقي القربه معرقه من اللحمات بتاعت الفواصل )

وبص كده علي الرادياتير من ناحيه داخل الكبوت لو لقدر الله فيه تسريب حيبان

وكمان علي مكان ترموستات الكوعه

وشكرا

**mmtronic** · 09-01-2012 12:32 AM

احب اضيف الى اراء الاخوة

خليك متابع معدل النقصان بتاع المياة لان المفروض معدل النقص بيكون قليل و على فترات طويلة

و حاول تروح التوكيل ( فرع التجمع مثلا ) و تخلى المهندس يعملك لييك تيست (leak test ) اى اختبار تسريب علشان يبين اذا كان فى اى خرم فى الريداتير و لا لا

انا العربية عندى فجاءة فى الصيانة الدورية ( عند صيانة 40000 كم ) لقيت الفنى بيقولى القربة تقريبا فاضية - استغربت و لقتهم عملو بضغط الهواء leak test لقيت الريداتير فية خرميين حلويين عند القواعد بتاعتة و مكنش باين او مكنش بينقط و غيرولى الريداتير على الضمان