الموضوع: ارفف تلاجه

المشاركة الأصلية كتبت بواسطة Dr_Mido

دة فين ياباشا انا فى العباسيه معرفش كتير كان مكتبى فى كوبرى القبه فبعدى من كوبرى اكتوبر وانزل عند الكاتدرئيه واكمل لحد كوبرى القبه منين من الحته دى

صلي على حبيبك النبي
بعد نزلة غمرة كمل على طول لغاية ميدان العباسية اللي فيه جامع النور .... اللي كان فيه توفيق عوكاشة ..... ح تلاقي كوبري تطلع الكوبري .... لما تنزل حتبقى كلية الشرطة القديمة على يمينك ..... وامامك 3 اتجاهات .... اقصى اليمين ح يوديك صلاح سالم في اتجاة القلعة .... وطوالي يوديك عند نادي السكة .... وشمال يوديك صلاح سالم في اتجاة المطار .... ولو بصيت فوق ح تلاقي شوية كباري مالكش دعوة بيهم خالص دول بتوع عثمان احمد عثمان
خليك في اقصى اليمين خالص جنب وحدة الجيش اللي هناك .... كدة بقيت في صلاح سالم .... بعد حوالي 500 متر ح تلاقي جامع كبير اوي له مآذن عالية جدا..... ده جامع الرحمن الرحيم الشهير بجامع توشيبا العربي ... اللي بناه الحاج محمود العربي صاحب التلاجة بتاعتك ..... بعد الجامع مباشرة ب20 متر ح تلاقي فتحة يمين .... تدخل يمين وتمشي طوالى حوالي 300 متر لغاية ما تلاقي مطب صناعي عملاق .... وعلى يمينك مركز صيانة تويوتا ايجبت وجنبة شوية عربيات تويوتا مدشدشة ...... ادخل شمال ..... وامشي علطول حوالي 200 ياردة ( هو كل مرة متر متر ) ..... لغاية ما تلاقي صينية صغيرة وتلاقي الناس عمالة تشاورلك انك كدة عكس الاتجاة ..... تركن وح تلاقي مستشفى طيبة قادمك تسأل عن المخزن بتاع قطع الغيار بتاع توشيبا
وممكن تعدي عليا تنورني و تشرب معايا قهوة .... انا على بعد 150 متر منك جهة الجنوب الشرقي
لازم تاخد معاك الرفوف القديمة

المشاركة الأصلية كتبت بواسطة Dr_Mido

سؤال تانى معلش متعرفش حضرتك ممكن يبقو فى حدود كام

ممكن تكلم العربي في التليفون اكيد ح يقولك السعر خارج الضمان كام