السلام عليكم ..
انا كنت في مشوارللزقازيق .. و معاي الوالد ورايحين مشوار جوا البلد وقفنا تاكشي طلع لوجان .. ركبت العربيه من ورا ووالدى قدام ..
ضربت بعينى في العداد لقيته عامل 80 الف كيلو واكتر - ماشاء الله - يعني من زمان .. قولت اسأله عن الاسئله الشائعه .. وعن الجلد اللي مغطى بيه عربيته من السقف للأرض للأبواب كمان
انا: عامله ايه العربيه معاك يا ريس .. دى لوجان مش كدا
السواق: الحمد لله زي الفل..
انا: كنت سمعت عن مشاكل في العربيه
السواق: مشاكل ؟؟؟ مشاكل ايه - الوش الخشب طلع و لبسه علطول-
انا: يعني حراره عند الدوسات و السرعات مش كبيره
السواق: حراره عند الدوسات - بأعلي صوت ليه - ياريت داانا رجلي متكتكه من البرد اللي احنا فيه ..مش عارف الناس اللي عاملين يقولوا حاجات زي اللي بتقولها دي جايبين الكلام دا منين .. انا كان معايا رينو قبل دي القديمه عربيات زي الفل - لسه بأعلى صوته - والعربيات الجديده مافيهاش لا حراره ولا كلام من دا ابدا .. العربيه دي معاي من 2009 وعمري ما اشتكيت منها و لا غيرت فيها حاجه
أنا : ازاي انت ما شاء الله عامل 80 ألف يعني غيرت زيوت علي الاقل.
السواق : تعرف يا استاذ .. انا كل اللي غيرته تيل امامى و سير كاتينه
انا :و زيت الموتور يا ريس؟؟
السواق: بغيره كل 3000 وبستخدم لها بنزين80 .. موفره علي الاخر
أنا : يعني مابتروحش التوكيل علي كدا..
السواق :ولا اعرف سكته .. بغيرلها كل حاجه من شارع دمشق و الميكانيكيه هنا بشتغلوا فيها في شويه ميكانيكيه -------- شتيمه مش تمام -------- عايزين الانوس هم دول اللي مبوظين سمعه العربيه يقولك معقده و مش عارف ايه و هو حته -------- شتيمه مش تمام -------- مش فاهم حاجه
أنا: بس هى اكيد ميزتها معاك في المطبات
السواق: عفشه ميه ميه و عاليه وعمرها ما حكت معايا
أنا: اكيد جربتها في سرعات عاليه
السواق : كنت علي الصحراوي و سهيت لقيت العداد عامل 170 و ثبات بسم الله ما شاء الله مش زي عربيه اخويا .. اخويا معاه افيو.. علي 120 الاقيها بترعش
انا : ربنا يديلك خيرها و يكفيك شرها
السواق: امين .. ماتصدقش اللي بيقولوالك عليه دا العربيه دي بتاعه خدمه انا عاملها تاكسى لو ها تجيبها ملاكى ها تحافظ عليها اكتر و ها تكون احسن كمان
أنا : طاب و الجلد كلفك كام تقريبا
السواق: حوالى 1000 جنيه عند واحد سروحى ورا مدرسه --------
لغايه هنا وصلت مشوارى و حسيت ان الحمد لله ربنا وقفلي العربيه دي عشان اتأكد انا اختياري طلع كويس عشان اللي مش عارف انا دي اول عربيه ليا و اول سواقه و اول 1000 كيلو يعني برضو الواحد بيكون بيكلم نفسه كتير قوي.و حبيت اشارك معاكم الحوار دا خصوصا ان اللوجان مش تاكس كتير وتجربه التاكسي تجربه عنيفه لاى عربيه