للنقاش هل بتسيب مفتاح عربيتك في جراشك ؟ وتخلي السايس يطلعهالك ؟ ؟

السلام عليكم ورحمة الله وبركاته

من ساعت ماجبت العربية وانا بركن في جراش قريب من البيت

الجراش عبارة عن حتة ارض فاضية وعملينها جراش وطبعا فيه حراس وسايس وليك باكية خاصة بيك ماحدش بياخدها سواء ركنت فيها او لاء طالما بتدفع الايجار الشهري

من حوالي عشر ايام كلمني صاحب الجراش قالي فيه عمارة جديدة اتبنت في ضهر الجراش وعملين فيها جراش تحت الارض

وانا من زمان بفضل الركنة في الجراش اللى تحت الارض بعيدا عن الشمس والمطر والرطوبة والعوامل اللى انتو عارفينها

ومهما الواحد بيغطي العربية برضوا بترب وتشيل الغطا تلاقي تراب وقطط راسمة احلى رسومات على الكبوت وياسلام لو السايس كبر دماغه ونسي يغطيلك العربية تروح تلاقي اثار اقدام كلاب وقطط وحديقة حيوانات فوق العربية

فمصدقت وقلت انزل الجراش اللى تحت الارض

وللاسف مع اول تجربة ركنة فيه العربية اتحكت :what:

الجراش ضيق جدا وبتعدي مابين العواميد بتاعته بالسنتي المنطقة يادوب تعدي العربية واعتقد ان اغلب الجراشات اللى تحت الارض بتبقى ضيقة بالشكل ده

فصاحب الجراش عرض عليا اني اخلي السايس يطلعلي العربية ويدخلها بحكم انه متعود على الجراش وقالي احنا مسؤلين عن اي حاجة وانا رفضت الفكرة وقلتله لاء انا مع الوقت هتعود على الركنة فيه

قلتله طب حاول تشوفلي مكان افضل قالي لو هحطك في مكان سهل الدخول والطلوع لازم تسيب المفتاح عشان لو فيه عربية حابة تطلع ماتبقاش قافل الجراش

قلتله لاء خلاص خليني كدة زي مانا

انا عن نفسي مستحيل اسيب المفتاح مش عشان حاجة انا ضامن الجراش اللى بركن فيه لكن دائما لما كنت ارجع بليل الاقي السايس مشغل كاسيت احد العربيات اللى سايبة مفتاحها ونايم جواها وسعات نسي الدور منور

واللى بيلعب في الراديو واللى بيسمع اغاني

وطبعا انا مش حاطط العربية في جراش عشان يتلعب فيها :banzai: فعشان كدة برفض فكرة المفتاح

فهنا بقى السؤال هل انت مع الناس اللى بتسيب مفتاح العربية في الجراش ؟ طبعا بتكلم عن الجراش اليومي اللى بتركن العربية فيه مش جراش في مكان عام

وهل مع فكرة انك تخلي السايس يطلعلك العربية ويدخلهالك خاصا في الجراشات الرغمة اللى بتبقى تحت الارض ؟

ولا الجراج دا ولا دا .. انا كتير جدا بتأخر على معاد عشان لما بحب اركن الاقي سايس ناططلي و يقوللي تسيب المفتاح ..عشان مش ضامنه مهما كان .. ممكن يعمل بيها مصيبة و البسها انا .. غيرحكاية يشغل الاغاني و ينام فيها دي

صحيح عملت اية في المرور ؟؟

على فكرة انت اكييييييييييد بتتكلم عن نفس الجراج اللي انا حاطة العربية فيه لان انا كمان ساكنة في فيصل و حصل معايا نفس الحوار و الحكاية اللي انت بتحكيها دي بالمللي

ردا على سؤالك انا برفض تماما اسيب المفتاح لاي سايس في اي حتة لان كمان مفتاحي للاسف مش مشفر و لو حد طلع عليه هاتبقى مصيبة دا غير اني اول ما ابتديت احطها في جراج كنت بسيب المفتاح و حكولي العربية و انا شفت الولد السايس بنفسي و هوا بينقل العربيات من مكان لمكان عشان يوسع لحد و هوا بيحك العربيت بمنتهى الاستهتار فابطلت اسيب المفتاخ نهائيا في اي مكان و لاي حد

و بقولهم العربية تتحط في مكان ماتطلعش منه الا لما انا اجي اديلو المفتاح يطلعهالي و خصوصا من جراج تحت الارض دا عشان ضيق جدا فعلا و العواميد كبيرة اوي و مبوظة الدنيا و بفكر جدا ارجع في الجراج اللي في الارض الفاضية اللي بالباكية دا اريح

انت كنت في الجراج اللي عند سامي و حمودة ولا رضا ؟ و اللي روحتلو تحت الارض بتاع ابو محمد ؟؟

بص يا كبير تخيل معايا الموقف لا قدر الله
السايس راكب عربيتك
وبيطلعهالك و لاى سبب هووووب لبس
هيحصل ايه ؟
هتزعق
وتشتم
و هو يتأسف
و صاحب الجراج ييجى
والى تؤمر بيه
بس اصل الواد غلبان
وامه ست كبيره
واخته بنت صغيره
وابوه مات من 75 سنه
و معهوش فلوس
و هتقبل عوض يا بيه
حرام عليك
ده احنا ماشيين على هوا
و فى الاخر ؟
هتصلح عربيتك على حسابك
يا اما هتسيبها بخبطتها
انت عارف قدرات نفسك
و دماغك انضف من سايس الجراج
ادخل بعربيتك و اخرج بعربيتك
لو زهقان ارجع اركن فى المكان القديم ..
دى وجهه نظرى ..انا الحمد لله مش بركن عند حد
لكن صديقى الانتيخ عنده جراج عربيات
و زى ما بتقول
الى سايب عربيته مفتوحه بيحصل فيها الاتى :
1-المناديل الى فيها بتخلص
2-الولاعه بتاع العربيه شغاله توليع سجاير ليل نهار
3-الى عاوز يتكلم مكالمه private بيدخل يقعد فى العربيه و يقفل على نفسه (مال ابوه بقى)
4-السى دى هات الى فيها بتتحط فى عربيات الدنيا كلها تتسمع و ترجع تانى
5-طبعا زى ما قولت الى زهقان شويه بيقعد فيها يسمع اغانى
6-فى الصيف العربيه بتدور و التكييف يشتغل
ها نويت على ايه ؟ :)

مستحيل لو حتي هرميها في الشارع
سيبك من انه يفتحها او يشغل الكاسيت او حتي ينام فيها
ايه اللي يضمنلي انه ميخرجش يعمل بيها مصيبه ويلبسك فيها
احد الأعضاء هنا بالفعل كان كده وفي مره لقي صاحب الجراج بيتصل بيه وبيقوله تعالي احسن ابني اتمسك بعربيتك في كمين

لا طبعا اياك تديله المفتاح

هو فعلا الجراج نعمه لكن لو سبت المفتاح حيبقى نقمه

الحمد لله انا عندى جراج خاص فى بيتى

اقتباس:

---

المشاركة الأصلية كتبت بواسطة osama.m

ولا الجراج دا ولا دا .. انا كتير جدا بتأخر على معاد عشان لما بحب اركن الاقي سايس ناططلي و يقوللي تسيب المفتاح ..عشان مش ضامنه مهما كان .. ممكن يعمل بيها مصيبة و البسها انا .. غيرحكاية يشغل الاغاني و ينام فيها دي

---

هو مسألة انه يخرج بيها دي صعبة شوية خاصا واحد زيي بينزل في مواعيد مختلفة سعات الصبح بدري اوي عشان الجامعة سعات بليل متاخر

فالموضوع مش فكرة انه يخرج بيها خاصا ان الجراش جمب البيت يعني وارد في اي وقت تنسى حاجة في العربية ترجع ماتلقيهاش

ففكرة انه يخرج بيها يعمل مصيبة دي اعتقد انها مستبعدة شوية

اقتباس:

---

المشاركة الأصلية كتبت بواسطة osama.m

صحيح عملت اية في المرور ؟؟

---

خلصت الموضوع الحمد لله وكل حاجة في مصر لسه زي ماهي بتخلص بالشاي

الراجل بتاع شباك المخالفات عمل معايا واجب بصراحة ومدفعنيش مخالفات الا 30 جنيه فقط !

شاي بالياسمين خلاني اثبت اللون التاني على الرخصة (بقت دلوقتي مترخصة كحلي \ فضي)

وبرضوا شاي بالياسمين خلاني اعدي الفحص من غير ماحد يبص على العربية

بس للاسف ماكنتش اعرف ان كل حاجة هتخلص بالحب كدة وشلت الاستيكرات كلها وبعد مالموضوع ماخلص بالطريقة دي قلت ياريتني ماشلت حاجة :banzai: بس الحمد لله اني مادفعتش غرامات ولا اي حاجة ودلوقتي معايا مثبوت اللون التاني على الرخصة واعدل بقى زي مانا عايز :verygood:

اقتباس:

---

المشاركة الأصلية كتبت بواسطة Donzi

على فكرة انت اكييييييييييد بتتكلم عن نفس الجراج اللي انا حاطة العربية فيه لان انا كمان ساكنة في فيصل و حصل معايا نفس الحوار و الحكاية اللي انت بتحكيها دي بالمللي

ردا على سؤالك انا برفض تماما اسيب المفتاح لاي سايس في اي حتة لان كمان مفتاحي للاسف مش مشفر و لو حد طلع عليه هاتبقى مصيبة دا غير اني اول ما ابتديت احطها في جراج كنت بسيب المفتاح و حكولي العربية و انا شفت الولد السايس بنفسي و هوا بينقل العربيات من مكان لمكان عشان يوسع لحد و هوا بيحك العربيت بمنتهى الاستهتار فابطلت اسيب المفتاخ نهائيا في اي مكان و لاي حد

و بقولهم العربية تتحط في مكان ماتطلعش منه الا لما انا اجي اديلو المفتاح يطلعهالي و خصوصا من جراج تحت الارض دا عشان ضيق جدا فعلا و العواميد كبيرة اوي و مبوظة الدنيا و بفكر جدا ارجع في الجراج اللي في الارض الفاضية اللي بالباكية دا اريح

انت كنت في الجراج اللي عند سامي و حمودة ولا رضا ؟ و اللي روحتلو تحت الارض بتاع ابو محمد ؟؟

---

ياااااااااااااااه ايه الصدف دي ! ! معقول ده احنا جيران بقالنا كتير في جراش واحد بقى على كدة

هو بعينه وغباوته جراش ابوعبد الله

سامي ده حبيبي دايما بخليه يلمعلي العربية بالبولش بتاعه اما حموده ياما اتخانقت معاه

بس مافتكرش اني خد بالي من I10 بتركن في الجراش اللى تحت الارض ده ! عموما انا بركن جوة خالص على الشمال في وش الانسر الحمراء

والحمد لله دلوقتي حفظت الدخلة والطالعة بتاعته وبقيت بدخل واطلع في ثواني من غير حتى مايكون محمد موجود او اي حد واقف معايا :verygood: مسألة تعود مش اكتر حاولي تتعودي عليه هيبقى اسهلك وبعدين عربيتك حجمها صغير فالدخلة والخارجة سهلة مرتين تلاتة هتلاقي نفسك حفظتيه :verygood:

ومش عايز احبط حضرتك بس مش هتعرفي ترجعي للباكية بتاعتك لاني حاولت ومانفعش وابوعبد الله قالي خلاص المكان بتاعك اتاخد :banzai:

هو احسن على فكرة وبيحافظ على العربية بس مشكلته في الدخلة والخارجة وكدة ولا كدة الحمد لله اني بعدت عن حمودة انا مش بطيقه

Never Ever
انا اعرف واحد ابن السايس طلع بعربيته و عمل بيها حادثة

تترب و خلاص ارحم من ده كله

اقتباس:

---

المشاركة الأصلية كتبت بواسطة KHALED AYMAN

بص يا كبير تخيل معايا الموقف لا قدر الله
السايس راكب عربيتك
وبيطلعهالك و لاى سبب هووووب لبس
هيحصل ايه ؟
هتزعق
وتشتم
و هو يتأسف
و صاحب الجراج ييجى
والى تؤمر بيه
بس اصل الواد غلبان
وامه ست كبيره
واخته بنت صغيره
وابوه مات من 75 سنه
و معهوش فلوس
و هتقبل عوض يا بيه
حرام عليك
ده احنا ماشيين على هوا
و فى الاخر ؟
هتصلح عربيتك على حسابك
يا اما هتسيبها بخبطتها
انت عارف قدرات نفسك
و دماغك انضف من سايس الجراج
ادخل بعربيتك و اخرج بعربيتك
لو زهقان ارجع اركن فى المكان القديم ..
دى وجهه نظرى ..انا الحمد لله مش بركن عند حد
لكن صديقى الانتيخ عنده جراج عربيات
و زى ما بتقول
الى سايب عربيته مفتوحه بيحصل فيها الاتى :
1-المناديل الى فيها بتخلص
2-الولاعه بتاع العربيه شغاله توليع سجاير ليل نهار
3-الى عاوز يتكلم مكالمه private بيدخل يقعد فى العربيه و يقفل على نفسه (مال ابوه بقى)
4-السى دى هات الى فيها بتتحط فى عربيات الدنيا كلها تتسمع و ترجع تانى
5-طبعا زى ما قولت الى زهقان شويه بيقعد فيها يسمع اغانى
6-فى الصيف العربيه بتدور و التكييف يشتغل
ها نويت على ايه ؟ :)

---

كلامك صحيح ومنطقي وانا فعلا رفضت اني اسيب المفتاح وان حد يطلعلي العربية ولو ان محمد اللى ماسك الجراش ده كويس وشفته وهو بيطلع كذا عربية بحسه واخد باله اوي بعكس ناس كتير

واحد زميلي معاه BMW 530i كان لسه شاريها موديل 2007 تقريبا وببص في يوم لقيتها واخدة حكة وحشة اوي في الجمب قلتله حرام عليك يابني ايه اللى انت عملته ده

قالي ده السايس وهو بيطلعلي العربية :banzai:

قلتله وانت عملتله ايه ؟ قالي يعني هعمله ايه طيب ؟

من سعتها وانا بطلع عربيتي وبدخلها ومش بسمح لحد في اي مكان انه يسوقها او يدخلها اي حتة مهما كانت :verygood:

اقتباس:

---

المشاركة الأصلية كتبت بواسطة shaddadfalcon1

مستحيل لو حتي هرميها في الشارع
سيبك من انه يفتحها او يشغل الكاسيت او حتي ينام فيها
ايه اللي يضمنلي انه ميخرجش يعمل بيها مصيبه ويلبسك فيها
احد الأعضاء هنا بالفعل كان كده وفي مره لقي صاحب الجراج بيتصل بيه وبيقوله تعالي احسن ابني اتمسك بعربيتك في كمين

---

هو زي مانا رديت على احد الردود فوق ان فكرة انه يخرج بالعربية دي اعتقد انها صعبة شوية بس مش عارف جايز لما بيحفظ مواعيد دخولك وخروجك ممكن يعملها

انا مرة لقيت العربية مخبوطة ومردودة على البارد مع اني مش بسيب المفتاح في الجراش :what: واثار الرد على البارد باينة وقلم الدوكو باين اوي وكنت هتجنن وعملت مشكلة واتخانقت وصاحب الجراش بيحلف ان لو عربية اتخبطت بنكلم صاحبها واموت واعرف مش اتخبطت ازاي لان جايز اتخبطت في اي حتة وهي مركونة

بس مين اللى ردها على البارد وصلحها بقلم الدوكو ؟ ؟

اقتباس:

---

المشاركة الأصلية كتبت بواسطة hossam_elwani

لا طبعا اياك تديله المفتاح

هو فعلا الجراج نعمه لكن لو سبت المفتاح حيبقى نقمه

الحمد لله انا عندى جراج خاص فى بيتى

---

احسن حاجة والله حضرتك مريح دماغك خالص

وانا فعلا مش بدي المفتاح لحد الحمد لله

يا جماعة الظروف هيا الحكم وبعدين فى فرق بين انى اسيب المفتاح فى الجراش اللى جمب البيت وانى اسيبوا لاى سايس علشان اركن وانا بعمل مشوار (دة طبعا اللى مستحيل).

هو المشكلة اللى عندة جراج بتاعة شايف الموضوع صعب شوية ودة مش متوفر لكل الناس وحتى لو جمب بيتك جراج علشان تاخد باكية خاصة بيك هتدفع اكتر من الركنة العادية.

الظروف الظروف الظروف!

بص هو انا عندي الجراش تبع العمارة عندي
وانا واقف في البلكونة بشوف الجراش وبشوف العربية
في اي وقت من البلكونة. هو عامتا السايس احنا جايبينة
من زمان وسكان العمارة كلهم بيسبوا معاة مفتاح العربية
لان اي حد عندنا بيركن في اي مكان فاضي فابلتالي
اوقات كتير جدا في حد بيكون قافل علي واحد تاني
علشان كدا بنسيب المفتاح مع السايس

اقتباس:

---

المشاركة الأصلية كتبت بواسطة khaled ayman

بص يا كبير تخيل معايا الموقف لا قدر الله
السايس راكب عربيتك
وبيطلعهالك و لاى سبب هووووب لبس
هيحصل ايه ؟
هتزعق
وتشتم
و هو يتأسف
و صاحب الجراج ييجى
والى تؤمر بيه
بس اصل الواد غلبان
وامه ست كبيره
واخته بنت صغيره
وابوه مات من 75 سنه
و معهوش فلوس
و هتقبل عوض يا بيه
حرام عليك
ده احنا ماشيين على هوا
و فى الاخر ؟
هتصلح عربيتك على حسابك
يا اما هتسيبها بخبطتها
انت عارف قدرات نفسك
و دماغك انضف من سايس الجراج
ادخل بعربيتك و اخرج بعربيتك
لو زهقان ارجع اركن فى المكان القديم ..
دى وجهه نظرى ..انا الحمد لله مش بركن عند حد
لكن صديقى الانتيخ عنده جراج عربيات
و زى ما بتقول
الى سايب عربيته مفتوحه بيحصل فيها الاتى :
1-المناديل الى فيها بتخلص
2-الولاعه بتاع العربيه شغاله توليع سجاير ليل نهار
3-الى عاوز يتكلم مكالمه private بيدخل يقعد فى العربيه و يقفل على نفسه (مال ابوه بقى)
4-السى دى هات الى فيها بتتحط فى عربيات الدنيا كلها تتسمع و ترجع تانى
5-طبعا زى ما قولت الى زهقان شويه بيقعد فيها يسمع اغانى
6-فى الصيف العربيه بتدور و التكييف يشتغل
ها نويت على ايه ؟ :)

---

كلام مظبوط 100 فى 100 وواقعى

اقتباس:

---

المشاركة الأصلية كتبت بواسطة تامر.محمد

Never Ever
انا اعرف واحد ابن السايس طلع بعربيته و عمل بيها حادثة

تترب و خلاص ارحم من ده كله

---

ماهو الخوف مش من التراب وخلاص مانت لما بتكون العربية في جراش بتنام مستريح ومطمن عن لما تكون راكنة في الشارع

مانت ممكن لاقدر الله تنزل الصبح ماتلاقيش العربية :what:

اقتباس:

---

المشاركة الأصلية كتبت بواسطة mostafaismail

يا جماعة الظروف هيا الحكم وبعدين فى فرق بين انى اسيب المفتاح فى الجراش اللى جمب البيت وانى اسيبوا لاى سايس علشان اركن وانا بعمل مشوار (دة طبعا اللى مستحيل).

هو المشكلة اللى عندة جراج بتاعة شايف الموضوع صعب شوية ودة مش متوفر لكل الناس وحتى لو جمب بيتك جراج علشان تاخد باكية خاصة بيك هتدفع اكتر من الركنة العادية.

الظروف الظروف الظروف!

---

هو فعلا زي ماحضرتك قلت على حسب الجراش ممكن ناس كتير مافيش مجال عندهم غير جراشات لازم يسيبو المفتاح بتاع العربية فيها

اقتباس:

---

المشاركة الأصلية كتبت بواسطة mahmoudselim

بص هو انا عندي الجراش تبع العمارة عندي
وانا واقف في البلكونة بشوف الجراش وبشوف العربية
في اي وقت من البلكونة. هو عامتا السايس احنا جايبينة
من زمان وسكان العمارة كلهم بيسبوا معاة مفتاح العربية
لان اي حد عندنا بيركن في اي مكان فاضي فابلتالي
اوقات كتير جدا في حد بيكون قافل علي واحد تاني
علشان كدا بنسيب المفتاح مع السايس

---

في ناس كتير كدة بس انا عن نفسي مش بفضل الموضوع ده لراحة نفسيا مش اكتر

اقتباس:

---

المشاركة الأصلية كتبت بواسطة el_nahal2004

كلام مظبوط 100 فى 100 وواقعى

---

:verygood:

انا سايب للسايس المفتاح وه الزامي عندي في الجراش للاسف
لان الباكيه بتاعتي بتاخد عربيتين لكن بنسبه 85% مبيحكوش العربيه الا في وجودك او علشان يغسلوها عندي مغسله في الجراش او لو تعبان بسبهاله وهو يجرشها بمعرفته حصل حاجه هوا وصاحب الجراش الي مسؤولين

على جثتى حتى لو الجراج جوه شقتى

مستحيل أسيب مفتاح عربيتى لحد

انا بسيب المفتاح فى الجراج بيتاعى من 6 سنين و بنسيب مفاتيح عربيت والدى برضو بس انا البخوش اجبها و ادخلها هى بتختلف فى سيستم الجراج و الناس الشغاله فيه و الحمد الله بقلنا 6 7 سنين لا منديل نقص و لا الهوا وكل العربيات المعيا فى الجراج بتسيب المفتاح حوالى 170 عربيه و من افخم افخم افخم العربيات انا بستغرب لما واحد يسيب مفتاح s350 والكتشفتو انو بيسيب كارت كده فى العربيه هو ده البيشغلها طمن مبهور انو مامن على عربيتو و سيبها كده لاكن فعلا الناس ال فى الجراج ده امينه فوق الخيال دى تجربتى انا
بس عماتن مفتاحك معاك فى جيبك بيتريح القلب

اقتباس:

---

المشاركة الأصلية كتبت بواسطة Ahmod

ياااااااااااااااه ايه الصدف دي ! ! معقول ده احنا جيران بقالنا كتير في جراش واحد بقى على كدة

هو بعينه وغباوته جراش ابوعبد الله

سامي ده حبيبي دايما بخليه يلمعلي العربية بالبولش بتاعه اما حموده ياما اتخانقت معاه

بس مافتكرش اني خد بالي من I10 بتركن في الجراش اللى تحت الارض ده ! عموما انا بركن جوة خالص على الشمال في وش الانسر الحمراء

والحمد لله دلوقتي حفظت الدخلة والطالعة بتاعته وبقيت بدخل واطلع في ثواني من غير حتى مايكون محمد موجود او اي حد واقف معايا :verygood: مسألة تعود مش اكتر حاولي تتعودي عليه هيبقى اسهلك وبعدين عربيتك حجمها صغير فالدخلة والخارجة سهلة مرتين تلاتة هتلاقي نفسك حفظتيه :verygood:

ومش عايز احبط حضرتك بس مش هتعرفي ترجعي للباكية بتاعتك لاني حاولت ومانفعش وابوعبد الله قالي خلاص المكان بتاعك اتاخد :banzai:

هو احسن على فكرة وبيحافظ على العربية بس مشكلته في الدخلة والخارجة وكدة ولا كدة الحمد لله اني بعدت عن حمودة انا مش بطيقه

---

يا محاسن الصدف ، رب صدفة خير ان شاء الله

انا الاول كنت مع سامي برضو بس لما بدأو يبنوا في العمارة دي نقلت جوة مع رضا و فعلا سامي احسن واحد فيهم كلهم انما حمودة بيحب يطلع منك اي مصلحة و رضا دا سايب الجراج بتاعو خلطبيطة بالصلصة

بس انا اتفقت مع ابو محمد ان اول ما يفضى مكان عندو برة يطلعني في الباكية تاني لحس الجراج تحت صعب جدا و انا ماليش طولة بال اقعد اركن نص ساعة و اطلع في نص ساعة بصراحة و بخاف لا هوا يحكها او يجرحها في الطلوع و النزول

بس انت مش واخد بالك ان العربية كيا ريو 2011 ( ال I10 ) راحت لحالها خلاص و الريو هاتلاقيها تاني عربية على ايدك الشمال و انت نازل الجراج علطول لونها احمر و متفيمة و عليها استيكر المنتدى على الزجاج الخلفي بس غالبا هاتكون متغطية لان انا قلتلهم اني هاقعد شهر مخرجش عشان ظرو العملية اللي انا عاملاها و كدا

و طبعا مش سايبالهم المفتاح ، بما اننا طلعنا جيران بقى ابقى القي نظرة على العربية و انت داخل و خارج كدا و طمنني متغطية ولا لأ و حاطين عليها حاجة ولا معززة مكرمة ؟ ما انا لازم استغلك بقى جيران منطقة و زمايل منتدى و اعضاء جراج واحد :verygood:

مستحيل طبعااااااااااااااااااااا.. . ولو في مشكلة او ركنة ف مكان غبي ولا صف تاني بسيب رقمي للسايس _دا لو اعرفه _وغالبا عند الشغل يعني

ولو حصل حاجة يكلمني..انما مش هقولكم اضمن منين انها تتسرق ولا تتخبط


انا كمان اضمن منين انه ميمعلش فيها مصيبة

ولايخبي فيها حاجة

ولا اروح اجدد الاقي مخالفات بألوف..

لالالالالا

انا سايب نسخه من المفتاحوريموت الانذار ومفتاح لوك الدكسيون عند صاحب الجراج في شقته فوق

لكن مش مع السايس نفسه

وبركن العربيه بقالها 4 سنين عنده

مفيش حاجه بتنقص

ومره سبت العربيه مفتوحه اساسا فيه

وكان ازازها متكسر وعادي والا نقص منها حاجه

وكمان لما باجي اخرج بيجبلي مفاتيح العربيات اطلعها بنفسي

وارجعها مكانها

وجراجي تحت الارض برضه

ولو شوفت المكان اللي بركن فيه تخيل علشان ادخله مش بفادي عربيه

بفادي نمرها وببقي داخل بضهري والعربيات علي يميني بالطول

بس اريح مقفول عليها باب

ومعايا مفتاحه

يعني بتبقي علي حسب صاحب الجراج مش السايس

للاسف انا بضطر اسيبه لكن الى حد ما الجراج الى تحت البيت عندى الناس الى فيه محترمه

لكنى متضطر اسيب المفتاح لانه بيضطر يحرك العربيات فى كل طالعه و داخله لاى عربيه

اقتباس:

---

المشاركة الأصلية كتبت بواسطة hpxp

انا سايب للسايس المفتاح وه الزامي عندي في الجراش للاسف
لان الباكيه بتاعتي بتاخد عربيتين لكن بنسبه 85% مبيحكوش العربيه الا في وجودك او علشان يغسلوها عندي مغسله في الجراش او لو تعبان بسبهاله وهو يجرشها بمعرفته حصل حاجه هوا وصاحب الجراش الي مسؤولين

---

المشكلة لو حصل حاجة لا قدر الله هو المسؤل ماشي انا معاك

بس ايه انسب ردة فعل ممكن تتعمل سعتها ؟ ماهو برضوا السايس ده في الاول وفي الاخر واحد غلبان ممكن مايبقاش معاه تمن يصلح عربيتك لو لاقدر الله اتحكت منه

اقتباس:

---

المشاركة الأصلية كتبت بواسطة Ashraf_Ashraf

على جثتى حتى لو الجراج جوه شقتى

---

وانا كمان ماشي بنفس المنطق :verygood:

اقتباس:

---

المشاركة الأصلية كتبت بواسطة original

مستحيل أسيب مفتاح عربيتى لحد

---

صح كدة :verygood:

طيب لما بتسيبو لمفتاح بتاخدوا بالكم من العداد عامل كام كيلو؟

اقتباس:

---

المشاركة الأصلية كتبت بواسطة minicooper20

انا بسيب المفتاح فى الجراج بيتاعى من 6 سنين و بنسيب مفاتيح عربيت والدى برضو بس انا البخوش اجبها و ادخلها هى بتختلف فى سيستم الجراج و الناس الشغاله فيه و الحمد الله بقلنا 6 7 سنين لا منديل نقص و لا الهوا وكل العربيات المعيا فى الجراج بتسيب المفتاح حوالى 170 عربيه و من افخم افخم افخم العربيات انا بستغرب لما واحد يسيب مفتاح s350 والكتشفتو انو بيسيب كارت كده فى العربيه هو ده البيشغلها طمن مبهور انو مامن على عربيتو و سيبها كده لاكن فعلا الناس ال فى الجراج ده امينه فوق الخيال دى تجربتى انا
بس عماتن مفتاحك معاك فى جيبك بيتريح القلب

---

هو زي ماحضرتك ماقلت مفتاحك في جيبك بتريح قلبك لكن برضوا المسألة مع الوقت بتبدأ تطمن وهي في الجراش حتى لو سايب المفتاح طالما انت وثقت في المكان اللى انت بتركن فيه

لان كمان فيه جراشات مابيبقاش فيه لاي عربية مكان محدد وكل عربية بتيجي وتركن على حسب معاد ماجت وبتطلع بنفس الطريقة فاجباري فيها ان المفتاح يكون في العربية :verygood:

اقتباس:

---

المشاركة الأصلية كتبت بواسطة Donzi

يا محاسن الصدف ، رب صدفة خير ان شاء الله

انا الاول كنت مع سامي برضو بس لما بدأو يبنوا في العمارة دي نقلت جوة مع رضا و فعلا سامي احسن واحد فيهم كلهم انما حمودة بيحب يطلع منك اي مصلحة و رضا دا سايب الجراج بتاعو خلطبيطة بالصلصة

بس انا اتفقت مع ابو محمد ان اول ما يفضى مكان عندو برة يطلعني في الباكية تاني لحس الجراج تحت صعب جدا و انا ماليش طولة بال اقعد اركن نص ساعة و اطلع في نص ساعة بصراحة و بخاف لا هوا يحكها او يجرحها في الطلوع و النزول

بس انت مش واخد بالك ان العربية كيا ريو 2011 ( ال I10 ) راحت لحالها خلاص و الريو هاتلاقيها تاني عربية على ايدك الشمال و انت نازل الجراج علطول لونها احمر و متفيمة و عليها استيكر المنتدى على الزجاج الخلفي بس غالبا هاتكون متغطية لان انا قلتلهم اني هاقعد شهر مخرجش عشان ظرو العملية اللي انا عاملاها و كدا

و طبعا مش سايبالهم المفتاح ، بما اننا طلعنا جيران بقى ابقى القي نظرة على العربية و انت داخل و خارج كدا و طمنني متغطية ولا لأ و حاطين عليها حاجة ولا معززة مكرمة ؟ ما انا لازم استغلك بقى جيران منطقة و زمايل منتدى و اعضاء جراج واحد :verygood:

---

فعلا والله صدفة جميلة نطلع في جراش واحد

هو سامي كويس وعنده البولش بتاعه كنت كل فترة بخليه يروقلي العربية :verygood: رضا ده معرفوش بصراحة لاني فضلت عند سامي لحد مانقلت لتحت الارض

وحاولت والله اني ارجع فوق تاني بس معرفتش ومابقاش في مجال خالص يظهر حضرتك بقالك كتير مش بتنزلي الجراش

الجراش لو تشوفيه دلوقتي بليل هتلاقي مافيش مكان اصلا تدخلي تركني من كتر العربيات اللى راكنة صف تاني وتالت ورابع ! ! فين ايام لما كان الواحد بيقعد يتنقل من باكية للتانية بمزاجه !

الارض اللى اتبنت دي كانت جراش ومع ظروف الثورة والناس خايفة وبقت بتفضل تحط العربيات في جراش فالموضوع زاد اوي

فعلا صدق اللى قال " مصائب قوم عند قوم فوائد"

على فكرة والله انا شايف ان الجراش اللى تحت الارض ده كويس اوي وبيحافظ على العربية بعيدا عن الشمس والتراب والرطوبة مهما كان الغطا بيحمي العربية اكيد مش هيبقى زي لما تكون تحت الارض

ومسألة الدخول والخروج مع الوقت هتتعودي عليها ان شاء الله انا دلوقتي بقيت بدخل وبخرج من غير مايكون حد واقف معايا ودقيقة بالكتير بكون خرجت

وانا شفت عربية حضرتك النهارده بسم الله ماشاء الله جميلة جدا ربنا يباركلك فيها وكانت متغطية وكلو تمام بس الغطا من عند العلامة كدة فيه متقطع شوية وده اللى خلاني خدت بالي انها كيو ريو ولونها احمر مش عارف ده من الغطا ولا من ايه

بس لو فعلا هتقعدي شهر من غير ماتتحركي بيها على الاقل انزلي دوريها كدة شوية وهيا في مكانها في الجراش او يفضل حتى مشوار بسيط عشان البطارية والزيوت ومايحصلش مشاكل لا سمح الله

وحاضر من عنيا طبعا وانا طالع وداخل هبص عليها انا كدة كدة بركن في وش عربية حضرتك علطول من نحية الشمال هتلاقيها ياريس كحلي وفيها سيلفر وكنت حاطط برضوا استيكر المنتدى بس لما شلت الفاميه الخلفي راح معاها الاستيكر وعايز اشتري واحد جديد

ولو فيه اي حاجة هقول لحضرتك علطول وان شاء الله مش هيبقى فيه حاجة :verygood:

اقتباس:

---

المشاركة الأصلية كتبت بواسطة icehearted girl

مستحيل طبعااااااااااااااااااااا.. . ولو في مشكلة او ركنة ف مكان غبي ولا صف تاني بسيب رقمي للسايس _دا لو اعرفه _وغالبا عند الشغل يعني

ولو حصل حاجة يكلمني..انما مش هقولكم اضمن منين انها تتسرق ولا تتخبط


انا كمان اضمن منين انه ميمعلش فيها مصيبة

ولايخبي فيها حاجة

ولا اروح اجدد الاقي مخالفات بألوف..

لالالالالا

---

موضوع تسيب رقمك دي حاجة كويس

على فكرة انا شفت مرة واحد راكن صف تاني وقافل على واحد وراح كاتبله في ورقة صغيرة رقم موبايله بحيث لو طلع وهو قافل عليه يكلمه

كان موقف جميل جدا بصراحة بعكس الناس اللى تلاقيها واقفة جمب عربياتها وواحد قافل عليهم وعمالين يدورو عليه حاجة قمة في الاستفزاز :verygood:

اقتباس:

---

المشاركة الأصلية كتبت بواسطة ahmed_mido1889

انا سايب نسخه من المفتاحوريموت الانذار ومفتاح لوك الدكسيون عند صاحب الجراج في شقته فوق

لكن مش مع السايس نفسه

وبركن العربيه بقالها 4 سنين عنده

مفيش حاجه بتنقص

ومره سبت العربيه مفتوحه اساسا فيه

وكان ازازها متكسر وعادي والا نقص منها حاجه

وكمان لما باجي اخرج بيجبلي مفاتيح العربيات اطلعها بنفسي

وارجعها مكانها

وجراجي تحت الارض برضه

ولو شوفت المكان اللي بركن فيه تخيل علشان ادخله مش بفادي عربيه

بفادي نمرها وببقي داخل بضهري والعربيات علي يميني بالطول

بس اريح مقفول عليها باب

ومعايا مفتاحه

يعني بتبقي علي حسب صاحب الجراج مش السايس

---

على حسب صاحب الجراش وعلى حسب وضع الجراش ذات نفسه وهل يسمح ان فيه عربيات تدخل وتطلع من غير ماتقفل على بعض ولا لاء

لان فيه جراشات للاسف متصممة غلط اساسا بالتالي اي عربية في النص بتقفل على اي عربية تانية وبيبقى اجباري انك تسيب المفتاح

اقتباس:

---

المشاركة الأصلية كتبت بواسطة mhmdkhamis

للاسف انا بضطر اسيبه لكن الى حد ما الجراج الى تحت البيت عندى الناس الى فيه محترمه

لكنى متضطر اسيب المفتاح لانه بيضطر يحرك العربيات فى كل طالعه و داخله لاى عربيه

---

وده اللى انا بتكلم فيه لما يكون شئ اجباري

انا بصراحة مش بفضل الجراشات اللى من النوع ده نهائي

اقتباس:

---

طيب لما بتسيبو لمفتاح بتاخدوا بالكم من العداد عامل كام كيلو؟

---

مافتكرش ان فيه حد كل يوم هيقعد ياخد باله من العداد عامل كام كيلو اعتقد الموضوع صعب

انا مرة كنت راكن في الجراش وفجاءة ببص الرفرف مخبوط ومردود على البارد ! واثار الردة على البارد وقلم الدوكو واضحة اوي

كنت هتجنن مش ازاي العربية اتخبطت ازاي العربية اتصلحت ! !

قلت لنفسي طب مانا لو واحد خبطني وانا راكن في الشارع مش معقول يعني هيقف يصلحهالي

عملت مشكلة مع صاحب الجراش واتخانقت وبقيت بقدر الامكان وانا داخل اركن بركن بطريقة معينة وببقى حاطط الدركيسون بطريقة معينة بحيث لو العربية اتحركت بس من مكانها ورجعت تاني اعرف علطول ان العربية اتحركت

قعد اعمل الموضوع ده فترة وبعدين زهقت :banzai: وبقيت بنسى وبكبر دماغي

شكرا جزيلا يا Ahmod و سيبك من حضرتك دي بقى ما احنا طلعنا جيران و زمايل جراج

الغطا مقطوع كدا من الكلاب من ساعة ما كنت بركنها تحت البيت بس اللي انا فاكراه ان الغطا بتاعي مقطوع من عند الزجاج الامامي للعربية و القطع مش واصل للعلامة ، شكلهم كدا خدو غطا غلط من رضا

ماهي المشكلة ان انا شخصيا عاملة عملية و مش بتحرك ولا بخرج خالص بس ان شاء الله ابقى اخلي اخويا يروح يدورها و يسخنها شوية

فعلا من ساعة ما حطيت العربية من يوم 24/12 ماروحتش تاني و معرفش الجراج اخبارو ايه دلوقتي

تنبيييييييه هام لوسمحتوا للناس اللي بتسيب المفتاح مع اي سايس كده و خلاص
واحد صاحب صحبي عربيته كانت هاتتسرق من فتره بطريقه ظريفه اوي
بياخد كورس في المبني اللي بعد اركاديا الله يرحمه بقي مش فاكر اسمه ايه تقريبا world trade center علي ماذكر المهم ركن و ادي لواحد المفتاح قاله انه السايس ... طيب فين فلان ... رد عليه راح مشوار و زمانه جاي ... فالراجل السايس اللي اول مره يشوفه ركنله العربيه و تمام ... صاحب صحبي طلع بقي للكورس
فزمايله في الكورس بالصدفه بياكله علي عربيه فول حاجه كده علي ناصيه الشارع للي عارف المنطقه دي من ناحية السبتيه كده ... لاقوا السايس اللي كان بيقول انه سايس راكبها و طالع جري لاجل حظه السئ كان فيه اوتوبيس واقف قافل الشارع
زمايله اخدوا بالهم انها العربيه و مش هو اللي راكبها مسكوا السايس بقي و ضربوه و كلموه صاحبهم نزل لاقاه هو اللي اخد منه المفتاح و قاله انا السايس بدل فلان
الظريف ان صاحب صحبي ده لما نزل لاقي السايس اللي متعود يشوفه ... السايس بيسلم عليه و بيقوله اومال فين العربيه ماجيتش بيها انهارده ولا ايه ياهندسه
للعلمانا ابويا بذات نفسه مش بسيبله مفتاح العربيه يسخنها لو نزل قبلي الصبح واحنا رايحين مشوار مع بعض ... مابقاش في امان في اي حته في البلد و ربنا يسترها علينا جميعا

اقتباس:

---

المشاركة الأصلية كتبت بواسطة Donzi

شكرا جزيلا يا Ahmod و سيبك من حضرتك دي بقى ما احنا طلعنا جيران و زمايل جراج

الغطا مقطوع كدا من الكلاب من ساعة ما كنت بركنها تحت البيت بس اللي انا فاكراه ان الغطا بتاعي مقطوع من عند الزجاج الامامي للعربية و القطع مش واصل للعلامة ، شكلهم كدا خدو غطا غلط من رضا

ماهي المشكلة ان انا شخصيا عاملة عملية و مش بتحرك ولا بخرج خالص بس ان شاء الله ابقى اخلي اخويا يروح يدورها و يسخنها شوية

فعلا من ساعة ما حطيت العربية من يوم 24/12 ماروحتش تاني و معرفش الجراج اخبارو ايه دلوقتي

---

هو يمكن بس الغطا ماتغطوش بيه العربية كويس فالقطع بدل مايكون عند الازجاج نزل لتحت عند العلامة كدة :verygood:

والف سلامة عليكي ان شاء الله تبقي كويسة وتنزلي وتطلعي براحتك

والاحسن طبعا تخلي اي حد يدورلك العربية يسخنها ويمشيها شوية عشان مايحصلش مشاكل لاسمح الله

هو الجراش اللى تحت الارض زي ماهو عدد العربيات زي شوية بسيطة لكن اللى فوق ده اللى بقى صعب اوي اوي اوي

ومع الوقت هتتعودي على دخلته وخارجته بدون مشاكل

اقتباس:

---

المشاركة الأصلية كتبت بواسطة walidadel

تنبيييييييه هام لوسمحتوا للناس اللي بتسيب المفتاح مع اي سايس كده و خلاص
واحد صاحب صحبي عربيته كانت هاتتسرق من فتره بطريقه ظريفه اوي
بياخد كورس في المبني اللي بعد اركاديا الله يرحمه بقي مش فاكر اسمه ايه تقريبا world trade center علي ماذكر المهم ركن و ادي لواحد المفتاح قاله انه السايس ... طيب فين فلان ... رد عليه راح مشوار و زمانه جاي ... فالراجل السايس اللي اول مره يشوفه ركنله العربيه و تمام ... صاحب صحبي طلع بقي للكورس
فزمايله في الكورس بالصدفه بياكله علي عربيه فول حاجه كده علي ناصيه الشارع للي عارف المنطقه دي من ناحية السبتيه كده ... لاقوا السايس اللي كان بيقول انه سايس راكبها و طالع جري لاجل حظه السئ كان فيه اوتوبيس واقف قافل الشارع
زمايله اخدوا بالهم انها العربيه و مش هو اللي راكبها مسكوا السايس بقي و ضربوه و كلموه صاحبهم نزل لاقاه هو اللي اخد منه المفتاح و قاله انا السايس بدل فلان
الظريف ان صاحب صحبي ده لما نزل لاقي السايس اللي متعود يشوفه ... السايس بيسلم عليه و بيقوله اومال فين العربيه ماجيتش بيها انهارده ولا ايه ياهندسه
للعلمانا ابويا بذات نفسه مش بسيبله مفتاح العربيه يسخنها لو نزل قبلي الصبح واحنا رايحين مشوار مع بعض ... مابقاش في امان في اي حته في البلد و ربنا يسترها علينا جميعا

---

الموضوع ده حصل مع واحد تاني برضوا وكنت قريت عنه موضوع في المنتدى وكتب انه العربية اتسرقت بسبب حاجة زي كدة

انا بستغرب لما بروح مثلا جزيرة العرب والاقي واحدة او واحد نازلين من BMW وبيدو المفتاح للسايس يركنها في اي حتة علما هما يدخلو يشترو حجات ! ! والسايس يركب العربية ويروح يدورلها على ركنة

بستغرب جدا والله مش عارف ازاي الناس دي قلبها بيبقى مطمن بالطريقة دي ! !

اقتباس:

---

المشاركة الأصلية كتبت بواسطة ahmod

الموضوع ده حصل مع واحد تاني برضوا وكنت قريت عنه موضوع في المنتدى وكتب انه العربية اتسرقت بسبب حاجة زي كدة

انا بستغرب لما بروح مثلا جزيرة العرب والاقي واحدة او واحد نازلين من bmw وبيدو المفتاح للسايس يركنها في اي حتة علما هما يدخلو يشترو حجات ! ! والسايس يركب العربية ويروح يدورلها على ركنة

بستغرب جدا والله مش عارف ازاي الناس دي قلبها بيبقى مطمن بالطريقة دي ! !

---

انا بترجمها انهم مش تعبانين في فلوسها ولا حاجه من دي او عندهم كتير ماشاء الله فمش هاممهم حاجه .... مش لاقيلها سبب مقنع الصراحه

اقتباس:

---

المشاركة الأصلية كتبت بواسطة walidadel

للعلمانا ابويا بذات نفسه مش بسيبله مفتاح العربيه يسخنها لو نزل قبلي الصبح واحنا رايحين مشوار مع بعض ... مابقاش في امان في اي حته في البلد و ربنا يسترها علينا جميعا

---

:verygood: .............. :36_2_33:

مبسبش المفتاح لاى حد اساسا دا حتى لما بكون مع والدتى او حتى اخواتى و نازل من العربية بجيب حاجه من محل او كده باخد المفتاح معايا

يعنى المفتاح يكون معايا فى اى حاله

علشان مندمش و اعزل فى يوم انى سيبته او نسيته

اقتباس:

---

المشاركة الأصلية كتبت بواسطة ahmod

هو يمكن بس الغطا ماتغطوش بيه العربية كويس فالقطع بدل مايكون عند الازجاج نزل لتحت عند العلامة كدة :verygood:

والف سلامة عليكي ان شاء الله تبقي كويسة وتنزلي وتطلعي براحتك

والاحسن طبعا تخلي اي حد يدورلك العربية يسخنها ويمشيها شوية عشان مايحصلش مشاكل لاسمح الله

هو الجراش اللى تحت الارض زي ماهو عدد العربيات زي شوية بسيطة لكن اللى فوق ده اللى بقى صعب اوي اوي اوي

ومع الوقت هتتعودي على دخلته وخارجته بدون مشاكل

---

الله يسلمك و ان شاء الله اخلي اخويا يدورها و هابقى اشوف موضوع الغطا دا

انا مابخرجش كتير اصلا و هابقى اخلي ابو محمد يتعامل و يطلعها و يدخلها هوا بس و انا واقفة

فرصة سعيدة يا جاري

اقتباس:

---

المشاركة الأصلية كتبت بواسطة walidadel

انا بترجمها انهم مش تعبانين في فلوسها ولا حاجه من دي او عندهم كتير ماشاء الله فمش هاممهم حاجه .... مش لاقيلها سبب مقنع الصراحه

---

هي فعلا ملهاش الا كدة

اقتباس:

---

المشاركة الأصلية كتبت بواسطة y2y1500

:verygood: .............. :36_2_33:

---

صعبة دي :36_2_33:

اقتباس:

---

المشاركة الأصلية كتبت بواسطة SASA3

مبسبش المفتاح لاى حد اساسا دا حتى لما بكون مع والدتى او حتى اخواتى و نازل من العربية بجيب حاجه من محل او كده باخد المفتاح معايا

يعنى المفتاح يكون معايا فى اى حاله

علشان مندمش و اعزل فى يوم انى سيبته او نسيته

---

مافيش احسن من الامان وراحة البال :verygood:

اقتباس:

---

المشاركة الأصلية كتبت بواسطة Donzi

الله يسلمك و ان شاء الله اخلي اخويا يدورها و هابقى اشوف موضوع الغطا دا

انا مابخرجش كتير اصلا و هابقى اخلي ابو محمد يتعامل و يطلعها و يدخلها هوا بس و انا واقفة

فرصة سعيدة يا جاري

---

انا اسعد والله

انا ارشحلك لما تقومي بالسلامة ان شاء الله تحاولي انك تتعودي على الدخول والخروج من الجراش هيبقى اسهلك واحسنلك

عشان لو مرة رحتي الجراش ماكنش محمد موجود او كان بيصلي او بيجيب حاجة او نايم ! ياما هتضطري تستنيه يا اما هتحسي بنوع من الاحراج لو كان نايم

وغير كدة عربيتك فانتي اكيد هتبقي خايفة عليها اكتر من اي حد

الموضوع مش صعب هو بس اول مرتين هتبقى رخمة وهتتخنقي وهيبقى فيه توتر وقلق بعد كدة هتتعودي عليه

والغطا ماتقلقيش القطع اللى فيه صغير ومش مؤثر نهائيا ده انا يدوبك بس شفت نص علامة الكيا مع لون احمر فجمعت انها عربيتك :verygood:

متديش لاي حد المفتاح عشان ميطلعش نسخة عليه بأي عجينة ويطلع بيها على بتاع المفاتيح ومفتاحك يكون معاه
المفتاح دايما في اديك انت فقطططططططططط

والله عندك حق يا أحمد و ان شاء الله هاحاول اتعود اطلعها و ادخلها بنفسي و غالبا هاغير مكاني جوة الجراج لمكان اسهل شوية في الطلوع و الدخول ربنا يسهل

انا لسه واخد بالى من الموضوع ده دلوقتى بس فعلا مفيد واليكم قصتى :

انا كان معايا عربيتين قبل الأسبرانزا فيرناوقبلها سيراتو الشكل القديم وكنت دايخ على جراج وملقتش فكنت بركن فى الشارع وما ادراك ما الشارع
لحد ماربنا كرمنى وجبت الأسبرانزا وطبعا الزيرو له هيبه غريبه واحساس تانى لأن اللى قبلهم كانوا مستعمل
المهم دورت على جراج لحد ماربنا اكرمنى بواحد جنبى تحت الأرض كنت موصى على مكان فيه من سنه ومكنش فيه
ومن اول يوم اشترطوا انى اسيب مفتاح ( وكان حجتهم ان لو الجراج ولع او غرق او راح فى داهيه يقدروا يخرجوا العربيه بسهوله ) وخصوصا انى بركن جوه خااااااااالص يعنى عشان اطلع لازم 9 عربيات يطلعوا
انا سايبلهم المفتاح لأنى مطمن ومجرب الأمبوليزر بتاع العربيه وطلعت مفتاح على الأصلى ومفتحتش ولا دارت ( شغل صينى بقه )
لكن الخساير اللى حصلتلى من انى سيبت المفتاح معاهم :
- ازازه البرفن اتسرقت
- الفلاشه تعيش انت
- السى ديهات كل سنه وانت طيب

واكتشفت ان اللى عمل كده السايس القديم فى كل العربيات اللى فى الجراج وهرب !!!!!!!!!!!!!

لكن رغم كده الجراج لا غنى عنه نهائى حتى لو بعت العربيه ححجز المكان بتاعها لحد مااشترى غيرها
واسف على الأطاله