قدامى فرصه انى اطلع عمره بس انا حاسس انى غير اهل للعمره

قدامى فرصه انى اطلع عمره بس انا حاسس انى غير اهل للعمره


السلام عليكم

فكرت انى اكتب الموضوع دا باسم تانى بس الواحد ينكسف من ربنا ولا ينكسف من اعضاء المنتدى ال ذى اخواته بالظبط
المهم انا حاليا مش منتظم فى الصلاه يعنى ممكن اكسل اصلى المغرب مثلا او العشاء مع انى عارف ومقتنع مليون فى الميه ان ال الواحد بيعمله دا غلط ومصيبه كمان بس مش عارف ليه بعمل كدا والواحد ربنا رزقه بطفل عنده حاليا سنه ولازم يتعلم الصلاه ولازم يشوف ابوه بيصلى قدامه ... الحمد لله المدام عندى متدينه جدا .... المهم انا بقالى فتره تعبان نفسيا جدا مشاكل فى الشغل بسبب قله المبيعات وطبعا المرتبات بتقل ومشاكل البلد ال كل الناس عارفاها وبقالى كام يوم بفكر فى العمره بس معنديش الشجاعه انى اطلع وبالصدفه انبارح لقيت واحد زميلى فى الشعل ويعتبر اخويا بيقلى انه رايح عمره على نهايه شهر 2 ان شاء الله وبيقلى متيجى معايا وبصراحه من انبارح وانا متشجع جداااااااااااا انى اروح وانى ارجع انسان جديد وانى ارجع ربنا تانى وافوق من كل التقصير ال الواحد مقصره فى حق ربنا والنى ادعى ربنا كتير انه يفك الكرب ال الواحد فيه

مش عارف انتم رايكم ايه يا شباب انا عارف ان كلامى ممكن يكون متلخبط بس انا قلت افضفض مع اخوانى فى المنتدى علشان يعلم الله انى بحبكم جدااااااااااااااااااا فى الله مش عارف اطلع ولا استنى طيب لو استنيت هل فى العمر بقيه انى اروح تانى والصحبه حاليا ال رايحه معايا كلهم ناس ان شاء الله محترمه وذى الفل

مستنى اسمع رايكم

توكل على الله واطلع انا كنت زيك كده وقلت استني ومحصلش نصيب تانى من ساعتها انت شايف ظروف البلد عاملة ازاى لو فى مقدرتك تطلع دلوقتى توكل على الله

يا باشا دى فرصة العمر .. أصلا شعورك بالتقصير ده حاجه كويسه جدا .. و عشان ربنا سبحانه و تعالى بيحبك .. أعطاك هديه و هى انك تروح و تضبط حياتك و تشوف المتعة اللى بجد .. و تعرف أد ايه الدنيا دى ملهاش أى تلاتين لازمه ولا تسوى جناح بعوضه أصلا.

توكل على الله و بجد هتفرق معاك جدا ان شاء الله .. و افتكر قول الرسول عليه الصلاة و السلام "تابعوا بين الحج والعمرة فإنهما ينفيان الفقر والذنوب كما ينفي الكير خبث الحديد والذهب والفضة" .. يعنى هتلاقى رزقك اتحسن و حياتك اتحسنت و كل حاجه للأفضل ان شاء الله.

نصيحه قبل ما تروح هات كتاب رحلة المشتاق للدكتور خالد أبو شادى .. هو حوالى 30 صفحه بس هيفرق معاك كتير.

حاجه كمان .. بعد ما تنوى و ممكن بعد ما تدفع الفلوس كمان .. ممكن تلاقى نفسك حصل عندك خمول .. أو عدم اقبال عن الموضوع أو شعور بالكابه .. و تقول ما أخلى الفلوس فى حاجه تانية .. دى كلها وساوس الشيطان .. عشان هو مش عاوزك تتخلص من ذنوبك ولا عاوزك تتعدل .. و عاوزك فى حال أسوأ من ده .. فحتى لو حصل لك كده .. استعذ بالله .. و بجد بجد هتسمتع جدا .. خصوصا فى الوقت اللى مش زحمه ده.


و ربنا يتقبل منك و يرزقنا جميعا زيارة بيته الحرام.

دى وساوس الشيطان اللى خايف إن أمورك كلها بإذن الله تنصلح بزيارة بيت الله الحرام والعمرة
توكل على الله وارم حمولك على اللى خلقك
ومن توكل على الله فهو حسبه
ومن توكل على الله كفاه

توكل على الله، ومين فينا مش مقصر؟
ان شاء الله العمرة تكون بداية الاستقامة وربنا يرزقنا ويهدينا يارب

توكل على الله
الفرصه مبتجيش غير مره واحده

لما تطلع هتلاقي إن كل اللي وراك هو العبادة بس
فـساعتها هتعرف العبادة الصح بتبقى عاملة إزاي

بس لازم تبقى عارف إيه القواعد والشروط وايه المبطلات

وكمان لازم تبقى عارف إن الصلاة دين عليك ولازم تؤديه
فـالركعة اللي بتسيبها دلوقتي هتردها هتردها
ياما تصليها ياما ربنا هياخد حقها منك فيها بعدين

ربنا يدعوك لزيارته وانت متردد اتكل على الله واذهب

حاقول لحضرتك حاجة واحدة بس :-

توكل على الله ولا تراجع نفسك ابدا
حد يجيى له كنز ويرفضه
أرجوك يا أخى لا تتردد
ستخسر كثيرا إذا لم تذهب وستربح الخير الوفير وتشعر بالراحة النفسية والإطمئنان والسكينة والهدوء إذا أتممتها
بس ابقى ادعيلنا ربنا يشفينا ويسترنا

ويمكن نتقابل مع بعض بإذن الله (أنا رايح يوم 8/2 بإن الله تعالى)

لو الفرصة متاحة قدامك و الأمور ميسرة من حيث الوقت و الماديات متتأخرش لحظة عن أداء العمرة

وهاتلاقي نفسك بعد كده بتطلع علطول أول ماتقدر و تحس بأن كان فايتك كتير قوي

وطبعا العمرة هاتبقى بداية جديده ليك و دافع إنك تلتزم بعدها بحاجات كتير كنت مقصر فيها

لازم ان شاء الله تروح ... متفوتش الفرصة

توكل على الله يا استاذ احمد و متضيعش الفرصة

و ردا على كلامك انك مش حاسس انك اهل لها ...... امال العمرة لمين بس ..... ربنا يتوب علينا أجمعين

اعذرنى فى المثال اللى هقول لك عليه

( يعنى لو واحد عنده عربيه قديمة شويه و فيها بارومه و الصدأ بدأ ياكل فيها .... و معروض عليه فرصة سمكرة كامله و عَمرة للموتور ........... يقول العربيه مش اهل للسمكرة و العمرة ..... يعنى العربية الزيرو مثلا هى اللى اهل للموضوع دا ..................... و لا الواحد يسيب العربية لغاية اما تخرب خالص و بعدين مينفعش فيها شغل اصلا .......... او لا قدر الله العربيه تعمل حادثة و تضيع منك !!!

دى فرصة عظيمة لمغفرة الذنوب و الالتزام بشرع الله و تظبيط الحياه
و ربنا يرزقنا جميعا زيارة بيته الحرام و يتوب علينا لنتوب

اقتباس:

---

المشاركة الأصلية كتبت بواسطة د.أحمد السعيد

اعذرنى فى المثال اللى هقول لك عليه

( يعنى لو واحد عنده عربيه قديمة شويه و فيها بارومه و الصدأ بدأ ياكل فيها .... و معروض عليه فرصة سمكرة كامله و عَمرة للموتور ........... يقول العربيه مش اهل للسمكرة و العمرة ..... يعنى العربية الزيرو مثلا هى اللى اهل للموضوع دا ..................... و لا الواحد يسيب العربية لغاية اما تخرب خالص و بعدين مينفعش فيها شغل اصلا .......... او لا قدر الله العربيه تعمل حادثة و تضيع منك !!!

---

حلو المثال ده يا دكتور , ولايق على المنتدى كمان :36_1_1[1]:

أنا فعلا من زمان وأنا بحس إن العُمرة هي عَمرة بس للقلب مش للموتور , لأن الواحد بيرجع على الزيرو تاني

اقتباس:

---

المشاركة الأصلية كتبت بواسطة mahgary

ربنا يدعوك لزيارته وانت متردد اتكل على الله واذهب

---

اجمل كلمه اتقالت ...

ياباشا أنا مش هاقولك أكتر من ما قيل و لكن هاقولك حاجة ماتقالتش قبل كده فى تاريخ البشرية غير مرتين بس

أعمل الصح :what:,,,,,,,,,,,,,,, أعمل الصح:what:

الله يا شباب انا مش عارف اقول ايه بعد كلامكم دا بصراحه وان ان شاء الله رايح رايح ان شاء الله وفعلا دى فرصه مش هتتكرر


وفعلا انتم نعم الاخوه بارك الله فيكم جميعا

توكل على الله
بجد احساس العبادة مش حتشعروا غير وانت هناك
بجد اول مرة في حياتي بتمنى ان صلاة المغرب مثلا وراء الشيخ السديس ما تخلصش ويفضل يصلي فيا العمر كله
احساااااس صعب اي واحد يوصلهولك
وحترجع ان شاء الله شخص متابع لصلاتك ومتلذذ بالصلاة والعبادة كمان
ترووح وترجع بالسلامة ,, وما تنسناش من الدعااء

عَنْ أَبِي وَاقِدٍ اللَّيْثِيِّ رَضِيَ الله عَنْهُ، أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ بَيْنَمَا هُوَ جَالِسٌ فِي الْمَسْجِدِ وَالنَّاسُ مَعَهُ إِذْ أَقْبَلَ ثَلَاثَةُ نَفَرٍ فَأَقْبَلَ اثْنَانِ إِلَى رَسُولِ اللَّهِ صَلَّى اللَّهُ عَلَيْهِ وَسَلَّمَ وَذَهَبَ وَاحِدٌ قَالَ فَوَقَفَا عَلَى رَسُولِ اللَّهِ صَلَّى اللَّهُ عَلَيْهِ وَسَلَّمَ فَأَمَّا أَحَدُهُمَا فَرَأَى فُرْجَةً فِي الْحَلْقَةِ فَجَلَسَ فِيهَا وَأَمَّا الْآخَرُ فَجَلَسَ خَلْفَهُمْ وَأَمَّا الثَّالِثُ فَأَدْبَرَ ذَاهِبًا فَلَمَّا فَرَغَ رَسُولُ اللَّهِ صَلَّى اللَّهُ عَلَيْهِ وَسَلَّمَ قَالَ: "أَلَا أُخْبِرُكُمْ عَنْ النَّفَرِ الثَّلَاثَةِ أَمَّا أَحَدُهُمْ فَأَوَى إِلَى اللَّهِ فَآوَاهُ اللَّهُ وَأَمَّا الْآخَرُ فَاسْتَحْيَا فَاسْتَحْيَا اللَّهُ مِنْهُ وَأَمَّا الْآخَرُ فَأَعْرَضَ فَأَعْرَضَ اللَّهُ عَنْهُ". أخرجه البخارى (1/36 ، رقم 66)
خليك زي الاول ....آوي الى الله فيؤيك
...
شوف الثالث لما اعرض عن الله ..... اعرض الله عنه
....
.... لا تسمع كلام الشيطان الذي يكره ان يراك على طاعة
وكمان خلي بالك ان من اعظم الذنوب ان تظن ان الله لن يغفر لك
روح وتوكل على الله واحسن الظن بالله ...... واغسل نفسك من كل ذنوبك .... روح ....مش يمكن دي تكون نقطة تحول في حياتك للأبد ......
ولا تنسانا في صالح الدعاء

عمرة إن شاء الله مقبولة مقدما ... ربنا ان شاء الله يوعدنا بيها اللهم آمين

اذا عزمت فتوكل على الله ,اعقد النيه وربنا حيسر لك امورك .
هداكم وهدانا الله الى ما احبه وارضاه.

ان شاء الله انا هروح يوم السبت اعمل جواز السفر وربنا يسهل ان شاء الله يا شباب والف مليون شكر ليكم يا شباب على النصائح الغاليه دى

الف مبروووووووووك وربنا يتقبل ان شاء الله

لا تنسانا في الدعاء

اقتباس:

---

المشاركة الأصلية كتبت بواسطة احمد المصرى

ان شاء الله انا هروح يوم السبت اعمل جواز السفر وربنا يسهل ان شاء الله يا شباب والف مليون شكر ليكم يا شباب على النصائح الغاليه دى

---

شكرنا بأنك تفتكرنا هناك بالدعاء وعمرة مقبولة إن شاء الله

اكيد استحاله هنسى الدعاء لجميع اعضاء المنتدى ان شاء الله

ياباشا بس قبل متسافر اقرا كويس قوي إزاي بتتعمل
وإيه الشروط وإيه الموانع واخلص النية لله عشان ربنا يتقبل

اقتباس:

---

المشاركة الأصلية كتبت بواسطة mailo

ياباشا بس قبل متسافر اقرا كويس قوي إزاي بتتعمل
وإيه الشروط وإيه الموانع واخلص النية لله عشان ربنا يتقبل

---

انا فعلا بدات اعمل كدا فعلا وبقعد مع شيوخ علشان افهم كل صغيره وكل كبيره

ربنا يتقبل منك ان شاء الله ولا تنسانا بالدعاء

عمرة مقبولة ان شاء الله

Go a head bro

روووووووووووووح وماتخليش الشيطان يلعب بدماغك
وصدقنى حترجع انسان تانى خالص بس يا ريت تحافظ على المستوى الايمانى اللى حترجع بيه
وبالله عليك ادعو لى ولوالدى ووالدتى وزوجتى وابنائى

توكل على الله

بس ابقي ادعيلنا جميعا كمصريين ان ربنا يصلح الاحوال و يولي امورنا خيارنا

اقتباس:

---

المشاركة الأصلية كتبت بواسطة احمد المصرى

قدامى فرصه انى اطلع عمره بس انا حاسس انى غير اهل للعمره


السلام عليكم

فكرت انى اكتب الموضوع دا باسم تانى بس الواحد ينكسف من ربنا ولا ينكسف من اعضاء المنتدى ال ذى اخواته بالظبط
المهم انا حاليا مش منتظم فى الصلاه يعنى ممكن اكسل اصلى المغرب مثلا او العشاء مع انى عارف ومقتنع مليون فى الميه ان ال الواحد بيعمله دا غلط ومصيبه كمان بس مش عارف ليه بعمل كدا والواحد ربنا رزقه بطفل عنده حاليا سنه ولازم يتعلم الصلاه ولازم يشوف ابوه بيصلى قدامه ... الحمد لله المدام عندى متدينه جدا .... المهم انا بقالى فتره تعبان نفسيا جدا مشاكل فى الشغل بسبب قله المبيعات وطبعا المرتبات بتقل ومشاكل البلد ال كل الناس عارفاها وبقالى كام يوم بفكر فى العمره بس معنديش الشجاعه انى اطلع وبالصدفه انبارح لقيت واحد زميلى فى الشعل ويعتبر اخويا بيقلى انه رايح عمره على نهايه شهر 2 ان شاء الله وبيقلى متيجى معايا وبصراحه من انبارح وانا متشجع جداااااااااااا انى اروح وانى ارجع انسان جديد وانى ارجع ربنا تانى وافوق من كل التقصير ال الواحد مقصره فى حق ربنا والنى ادعى ربنا كتير انه يفك الكرب ال الواحد فيه

مش عارف انتم رايكم ايه يا شباب انا عارف ان كلامى ممكن يكون متلخبط بس انا قلت افضفض مع اخوانى فى المنتدى علشان يعلم الله انى بحبكم جدااااااااااااااااااا فى الله مش عارف اطلع ولا استنى طيب لو استنيت هل فى العمر بقيه انى اروح تانى والصحبه حاليا ال رايحه معايا كلهم ناس ان شاء الله محترمه وذى الفل

مستنى اسمع رايكم

---

ياه ياراجل حد يتردد في حاجه زي كده برضه
حد يتردد في زياره الرسول الكريم صلي الله عليه واله وسلم