تغيير طقم دبرياج كامل

**hany2** · 11-01-2012 12:53 AM

السلام عليكم إخوتي الكرام
أنقل لكم تجربتي اليوم. وأرحب بكل ملاحظاتكم الكريمة.

معي عربية لانوس 2008 وعاملة 30 ألف كيلو فقط.

نهاردة وأنا خارج بالعربية لقيتها مش بتسحب خالص ووقفت رغم إنها بتاخد الغيار وشغالة.
روحت جبت الميكانيكي وكان شاب صغير وشكله أمين. فكشف على العربية وقالي جايبة اسطوانة.

روحنا الورشة وفتح وطلع الأسطوانة وقالي أحسن نغير الطقم كله (أسطوانة وديسك وبلية) روحت اشتريتهم من الحي السابع في مدينة نصر من محل اسمه رسلان بمبلغ 425 جنيه والميكانيكي أخذ 200 جنيه مصنعية. وبعدين روحت زودت زيت الفتيس بكيلو زيت موبيل 9 بمبلغ 23 جنيه.

بتاع قطع الغيار قالي المفروض تغير الطقم ده على 100 ألف كيلو. بس الظاهر علشان أنا باحمل على الدبرياج في سواقتي أكتر من المفروض فحصل موضوع الأسطوانة ده.

يا ريت اللي عنده أي تعليق أو سؤال يتفضل بيه. وشكرا ليكم جميعا.

**mahmoudysf** · 11-01-2012 01:10 AM

مبروك على التغيير
30 الف قليل اوي على تاكل الاسطوانة في الاحوال العادية
لاكن بتحصل لما يكون استخدامك للدبرياج بشكل سيء
وطالما اسباب الشكوى راحت ودي حاجة تقدر انت تحكم عليها يبقى الراجل تشخيصة صح
واخيرا المصنعية عالية كتيرها اوي 150 وفيه ناس بتاخد 120

**ahmedezzat78** · 11-01-2012 01:22 AM

الف مبروك الاصلاح

اعتقد انك من الناس اللى بتخلى رجليها على الدبرياج معظم الوقت ..... لو كده حاول تغير العاده دى

الطقم بتاع رسلان نوعه ايه؟

**hany2** · 11-01-2012 07:30 AM

شكرا لكل الردود. أنا فعلا هاحاول أخفف رجلي من على الدبرياج خالص يعني أخليها للغيار بس :)

الطقم من رسلان هو قالي أصلي وكان مكتوب عليه مصنوع في كوريا (على الحديد نفسه بتاع الاسطوانة)
شكرا لكم مرة أخرى.

**hany2** · 11-01-2012 07:34 AM

الله يبارك فيكم
هو فعلا الدبرياج بقى ناعم جدا :)
بالنسبة للمصنعية بصراحة مش باحب أفاصل فيه :)
شكرا لكم مرة أخرى وربنا يبارك ليكم في سياراتكم :)

**Mangog** · 11-01-2012 08:32 AM

لسه مغيره ف الاوبترا ب 90 جنيه مصنعية

**tarek_2005** · 11-01-2012 11:30 AM

المصنعية مش كتير ولا حاجة المهم الطقم مش الاصلي لان الاصلي بقي ب 650 جم وهناك طقم فاليو كوري مضروب موجود بالسوق ب450 جم واتدبست فيه وطلع الديسك بايظ ورجعته واستبدلته فوراً

**hany2** · 11-01-2012 12:00 PM

ميلو: حلوة أوي دكتوراه في الفتيس دي :) ههههههههههههه ربنا يسترها بس ويفضل مضبوط. :)
طارق: ربنا يستر وما يكونش اللي جبته مضروب هو كمان. أنا مشيت بيه امبارح شوية والنهاردة برضه كمان شوية والحمد لله كويس. ربنا يسترها. ده أنا كنت مستكتر ال 425 طلع كمان بقى ب 650؟ ربنا يسترها! :)
مانجوج: ما شاء الله ربنا يبارك ليك في التغيير وفي العربية :)
ربنا يسترها معانا جميعا :)
وشكرا لردودكم جميعا :)

**hany2** · 11-01-2012 12:01 PM

نسيت أقولكم إني بقيت أخاف أجي ناحية الدبرياج ده خالص :) ههههههههههههههه كل ما أجي أدوس عليه أفتكر الفلوس اللي دفعتها هههههههههههههههه
لا فعلا حسيت إن سواقتي اتحسنت لما ما بقتش أدوس عليه كتير :)