الموضوع: الإنطباع الأول بعد تسقيط موتور 1400 إنجكشن لعربيتى

السلام عليكم ورحمة الله وبركاته ،،،،،،،

مقدمه لابد منها كده فى الأول :-

أنا اشتريت العربيه ابيزا 98 بموتورها الأصلى 1000 سى سى يوم 15-12-2011 يعنى مش شهر تقريبا،كانت معلوماتى عن الابيزا صفر تقريبا،خدت العربيه ورفعتها فى بنزينة موبيل الهرم الله يسامحهم - هتعرفوا ليه بعدين بقى - قالولى ياباشا توكل على الله العربيه زى الفل الله أكبر عليها والموتور ممتاز وزى الفل.

روحت وديت العربيه عند سمكرى اعرفه ورفع العربيه وبص عليها وقالى توكل على الله زى الفل.

- توكلت على الله طبعا واشتريت روحت رخصت العربيه ونقلت الرخصه باسمى وكانتكل حاجه ماشيه زى الفل والحمد لله.

-رحت عملت سرفيس كامل للعربيه - نصيحة م/محمد سيد حبيبى- غيرت كل حاجه زى ما الكتاب بيقول كده بوجيهات سير كاتينه ودينامو وكل الفلاتر وبلية الشداد وحطيت زيوت جديده طبعا ، بصراحه حسيت بفارق رهيب فى العربيه من كل حاجه ساعتها الكلام ده تقريبا كان 20-12-2011.

يوم 21/12/2011:-
-هنا بقى بدأت المشكله معايا كل لما أجى أدور العربيه الصبح الاقى كمية دخان ابيض رهيبه طالعه من الشكمان بتغطى العربيه لمدة 15 ثانيه تقريبا وبعد كده تروح ، كلمت الميكانيكى قالى عادى ياباشا تلاقى بس الزيت زياده ولا حاجه متحطش فى دماغك.
-أركن العربيه وأنزل أعمل أى مشوار وأرجع أركب العربيه بعد ساعه مثلا الاقى كميه دخان رهيبه برده زى ما قلنا قبل كده - صحصحوا معايا كده محدش ينام منى الموضوع لسه طويل-بس كان سحب العربيه عادى كويس مفيش مشاكل عشان كده انا قلت كبر دماغك يا عمنا ده الزيت زياده أكيد بس مفيش حاجه يا عم الحاج.
-فضلنا على القصه دى أسبوع كل لما أجى أدور العربيه تتغطى دخنه بيضه والناس اللى فى الشارع تفضل تبصلى بقرف أوى وتلاقى واحد مطلع منديل وحطه على مناخيره - محسسنى ان العربيه بتضرب قنابل غاز يعنى - وبرده انا كل ده مكبر دماغى مهو بتاع البنزينه قالى ياباشا توكل على الله موتورك فل الفل.

يوم5/1/2012:-
- كل سنه وانتم طيبين الأول بقى دخلنا سنه جديده بالعربيه - واحنا لسه مدخلناش اساسا فى الموضوع- كنت بالصدفه فى الموقع - اصل انا مهندس مدنى بس ده عاوز موضوع تانى بقى بعدين مش وقته - وكان معايا ابن خالتى بعربيته بالصدفه كده بحكيله بقوله ياض يا خالد يا تييييييييييييييت - أصل أنا قليل الأدب شويه معلش - العربيه كل لما أجى أدورها تطلع دخنه بيضا كده ومبقتش بتسحب زى الأول مش عارف مالها بنت التيييييييييييييت دى.
-خالد اللى هوا ابن خالتى - ركزوا معايا يا جماعه الله يرضى عنكم - قالى يبنى ده كده شكلها فيها شمبر ، قلتله انت طول عمرك بتحب تفقر كده فى أى حاجه شمبر ايه يبن التييييييييت انت ده البنزينه قالتلى موتورك فل الفل.
-قالى استنى كده أقيس الزيت عندك - ده اللى انا كنت لسه مغيره من اسبوع ومغير فلتر الزيت كمان - قلتله بقلب جامد وانا عامل فيها فاهم أوى - بلا نيله عليا - هتلاقى الزيت زياده شويه وانت بتقيس على فكره.

بداية المشكله بقى دخلنا فى الجد خلاص :-

- خالد ابن خالتى قاس حط مقياس الزيت - وانا طبعا عامل فيها تنك زى ما قلنا والزيت زياده عندى شويه - طلع مقياس الزيت وهووووووووووووووووووووووو وووب مفيش ولا نقطة زيت فى العربيه - نسيت أقولكم ان لمبة الزيت يومها نورت وطفت مرتين بس كالعاده بتاعتى قلت كبر دماغك يا عم إسلام - ده اسمى على فكره انا نسيت اقولكم اسمى فى الأول.
- انا اتمسمرت فى مكانى قلتله هات يا عم اقيسه أنا انت تلاقى عملت حاجه غلط ، حطيت المقياس وبرفع وأبص هووووووووووووب ده بجد فعلا مفيش ولا نقطة زيت ينهار أزرق حصل ايه.
-كان معايا بالصدفه جركن زيت فالفولين ماكس لايف على فكره روحت مفضيه فى العربيه وقلت ربنا يستر بقى على الموتور لحد لما أروح الهرم وربنا يحلها بقى ساعتها.

نفس اليوم بس بليل بقى :-

- افتكرت ان معايا رقم مين رقم مين قولوا انتوا بقى - رقم م/محمد سيد حبيبى اللى اسمه هنا فىالمنتدى syd قلت طيب أكلم الراجل أتعرف عليه الأول وأحكيله حصل معايا ايه ، الحمد لله انى كلمته فعلا - هتعرفوا ليه بعدين بقى متستعجلوش بقى - الراجل بصراحه ربنا يكرمه مرضيش يصدمنى فى الأول وقالى بس دى كده مؤشرات مش حلوه على فكره عموما يا عم اسلام تعالى نروح للميكانيكى بتاعى وربك يحلها.
- تانى يوم على طول بقى - اتشرفت فعلا والله وقابلت م/ محمد سيد لأول مره - وروحنا للميكانيكى الأسطوره اللى هوا اتكلم عنه فى موضوعه " الأسطى عصام " مبدئيا أنا اتعاملت مع صنايعية الدنيا سواء فى الميكانيكا أو الكهربا ومعظمهم - بقول معظمهم مش كلهم - كفتجيه ومترتحش من اول كلمه معاهم - " الأسطى عصام " بقى لما تشوفه فعلا ترتاحله جدا والله وربنا يبارك فيه.
- المهم بقى " الأسطى عصام" قالى يا هندسه ده شكله كده شمبر - ينهار أزرق ده البنزينه قالى موتورك فل الفل - هات العربيه بكره بدرى نحل الموتور ونشوف فيه ايه وربنا يسترها بقى.

يوم 7-1-2012:-

-أولا كل سنه وأخواتنا المسيحين بخير - روحت " للأسطى عصام" على اتفاقنا الساعه 2 الضهر بالظبط ، فك الموتور وبص فيه وقالى ايه ده يا هندددددســـــــــــــــــ ـــــه.
-الموتور مش عاوز أقولكم بقى مخرم وملزق بسيلكون والخراط لاعب فيه عشره طاوله كمان - انا بصراحه اتصدمت صدمة السنين ساعتها.
- طيب الحل يا عم " الأسطى عصام " هنعمل ايييييييييييه؟؟؟ ، قالى ياباشا قدامنا حلين - لا مش هنقدم كمال أجسام طبعا - يا نعمل عمره كامله بس الموتور بتاعك ( الله يرحم موتانا جميعا) عاوزله عمرتين مش عمره وحده بس ومش هيبقى برده فل الفل ، والحل التانى نجيب شورت بلوك - يعنى موتور كامل ياباشا من غير تغذيه.
- ينهار أزرررررررررق موتور كامل ، قلتله نتوكل على الله ونجيب موتور كامل وحسبى الله ونعم الوكيل فى اللى لبسنى اللبسه السوده دى بقى.

رحلة شراء الموتور الجديد 1400 سىسى انجيشكن:-
- توكلنا على الله فى ساعتها ( ومعايا م / محمد سيد حبيبى ربنا يباركله ) وروحنا اشترينا شورت بلوك وجبنا معاه شجرة الميه + الرشاشات + فرن.
- سيبت العربيه عند "الأسطى عصام " بقى ورحت كان يوم السبت وصابح اجازته وقالى نتقابل بقى يوم الأربعاء تستلم العربيه إن شاء الله.
- يوم الإثنين كلمت " الأسطى عصام " وقالى تعالى يا هندسه اشرب معايا كباية شاي - على فكره معمليش شاى ولا جابلى كوباية ميه حتى - روحت بقى لقيته سقط الموتورر فعلا بس فيه مشكلـــــــــــه رفيــــــــــــعه أوى.
- لمبة الزيت منوره على طول، طيب الحل يا " أسطى عصام " قالى ياباشا هفك الكرتيره وأنزل طرمبة الزيت انضفها وربنا يسهلها إن شاء الله.

يوم الثلاثاء بقى 10 يناير 2012:-

- وأنا راجع فى الميكروباص بقى فى شارع الهرم كلمت " الأسطى عصام " ايه ياباشا الأخبار طمنى ، قالى ياباشا عدى عليا اشرب كوباية شاى - برده مشربتش حاجه خالص والله - روحت قالى دور يا هندسه دورت العربيه لقيت لمبة الزيت مش منوره الحمد لله.
- قالى أنا فكيت الطرمبه ونضفتها ونزلت منها شوال رمل وزيت ناشف.
- توكل على الله ياباشا خد العربيه وعيش بقى بس هتمشى بيها 3 ايام بس وتيجى تغير الزيت والفلتر - يعنى انا حاليا ماشى بيها بزيت التعاون وبالبوجيهات اللى الموتور جاى بيها أساسا ، بس ما تقلقش هتلاقى العربيه مبرجله خالص ومكتومه ومش بتسحب وهتطلع عين اهلك بس كل ده طبيعى لأن الموتور مركون بقاله سنه وهيقعد شويه لحد لما الدنيا تظبط بقى ولما تيجى تغير الزيت ساعتها بقى هتحكم.

الإنطباع الأول للموتور الجديد بقى :-

- بسم الله ما شاء الله فرق رهيييييييييييييييييب فى الطلعه ، والغيار التانى بقى مشوار طوييييييييل ، بس العربيه مبرجله فعلا.
- أنا مش عاوز لسه أحرق على الغيارات وبطبطب على العربيه عشان تطبع كده والموتور ياخد عليا وميزعلش من اولها بقى.
-مفيش دخنه خالص الحمد لله ، والعربيه لما بتظبط وتسحب شويه الله أكبر عليها بتبقى عاوزه تطييييييييييييييييييييييي يييييييييييييييير بس طبعا فى المجمل العربيه لسه مش متظبطه ومكتومه وده طبيعى طبعا زى ما قلنا.

أخيرا بقى وكفايه كده عليكم - كتر خيركم أوى أوى - هدخل تانى اكتبلكم الإنطباع الثانى بعد لما اروح " للأسطى عصام " يوم السبت الجاى أغير الزيوت والفلاتر ، وشكر كبير أوى أوى أوى ( للمهندس / محمد سيد ) و " الأسطى عصام ".