استفسار .......واستنكار

**aliabutaleb** · 27-05-2008 02:18 PM

المشاركة الأصلية كتبت بواسطة Islam_galal

اسكندرية بقي حاجة تانيه
مهزلة بكل المقاييس
حفروا البلد و شالو الأسفلت
شهرين علي ما الرصف يبدأ
شهر و يبدأ الحفر عشان مرة كهربا و مرة غاز
طبعا غير الرصفان
فلوس كتيييييير مجهود كبير و اضطرينا نضحي تاني ببهدلة و زحمة و تكسير و النتيجة مش عارف
حسبنا الله و نعم الوكيل

كوبري العوايد استمر الشغل فيه 4 سنين بحالهم
ولما جم يعيدوا الاسفلت شالوا الطبقة القديمة وسابوه معرج وبايظ لمدة 6 شهور

ألا هو صحيح ايه المانع اننا نعترف اننا مش قادرين نعمل طريق كويس
وايه المانع اننا نستعين بالخبرة الخليجية في الشان ده؟
والله انا مش شايف فيها عيب

**أبو عبدالله** · 27-05-2008 02:34 PM

لا
هيا مش كده يا اخي علي

احنا عندنا كل حاجه
الأيدي الفنيه زفت ززفت زفت من هنا للصبح

انت بتشوف العمال اللي بيسفلتوا شكلهم عامل ازاي
هل تفتكر دول حد علمهم ازاي الشارع يتسفلت
وهل هو فاهم يعني ايه المفروض يساوي الطريق
يعني هو لو معرج شويتين مش مشكله هما هيطيروا بعربياتهم يعني

المشكلة يا اخواني ان في مبدأ في مصر ان الأحسن الأرخص

يعني لما تيجي شركة تعمل مناقصة على الأسفلت بيختارو اقل سعر
طيب يا بني ادم هو اقل سعر ده جودته ايه وعامل ازاي مش مهم المهم ان الشارع يبقى اتسفلت جديد

وزي ما انتم عارفين ان في مصر المهم المنظر مش المهم المضمون
يعني في الأخر اسمها ان احنا سفلتنا الطريق من قريب ولسه جديد
شكله ايه وعامل ايه في الناس مش مشكلتنا بقه

ولـــــــــــــــــــــــ ـــــــــــــــــــك الله يــــــــــــــا مصـــــــــــــــــــــــ ـــــــــــر

عارفين واحد الله يصلح حاله مره قالي ان مصر ماشيه بنظام النكته دي
كل حاجه في مصر هتلاقي النكته دي بتنطبق عليها

مره واحد حب يشتري فراخ
فراح عند محل الفراخ
وقال للراجل لو سمحت انا عاوز فراخ
فالراجل ساله حضرتك عاوزها مدبوحه ولا سليمه
قاله سليمه
فالراجل قاله اطلع الدور التاني
طلع الدور التاني
فراجل تاني قاله حضرتك عاوز الفراخ كامله ولا متقطعه
قاله متقطعه
فالراجل قاله اطلع الدور التالت
فالراجل طلع الدور التالت فراجل تاني ساله حضرتك عاوز الفراخ متكيسه ولا لا
قاله متكيسه
فالراجل قاله حضرتك اطلع الدور الرابع
طلع الدور الرابع
فشاف راجل قاعد على مكتب كبير فبيقوله فين الفراخ
فالراجل قاله
بص احنا معندناش فراخ
بس ايه رايك في النظام؟

**aliabutaleb** · 27-05-2008 02:43 PM

المشاركة الأصلية كتبت بواسطة أبو عبدالله

لا
احنا عندنا كل حاجه
الأيدي الفنيه زفت ززفت زفت من هنا للصبح

انت بتشوف العمال اللي بيسفلتوا شكلهم عامل ازاي
هل تفتكر دول حد علمهم ازاي الشارع يتسفلت
وهل هو فاهم يعني ايه المفروض يساوي الطريق
يعني هو لو معرج شويتين مش مشكله هما هيطيروا بعربياتهم يعني

ابو عبد الله
مظنش ان في الخليج العمالة الرخيصة اللي بتعمل شغل زي ده برضة هاتكون عمالة ماهرة
أكيد عمالة عادية خالص بتتسمى عمالة غير ماهرة
انا كمان مقتنع اننا نقدر نعمل كل حاجة
والدليل ان كتير من المدن في الخليج اللي خططها مصريين على حسب ما سمعت
بس هل إحنا عجزنا إننا نعمل حاجة زي دي ولا هي بس النوايا اللي مش صالحة لغاية دلوقتي

**أبو عبدالله** · 27-05-2008 02:52 PM

لا العمالة هناك لو حتى مش مدربة
بتتبع تعليمات محدده من قبل الفنيين بالموضوع
وطبعا بتبقى على دراسة ولما بينفذوا بينفذوا صح
مش حسب الجو ايه او حسب دماغه فيها ايه

محدش فكر ليه دائما العمالة اللي زي بتوع الأسفلت وبتوع المحليات بتوع القمامة وكده ليه بيبقوا كبار في السن كلهم

انا مره واقف في راس البر
لقيت عربية القمامة دخلت السوق العمومي
ولاحظت حاجه غريبه جدا كنت او مره الاحظها
ان كل اللي على العربيه شباب لا يتعدى سنهم 22 سنه
كلهم بلا استثناء

ولقيتهم بيلموا الورق اللي على الأرض مش الاكياس اللي فيها القمامة بس ولكن اللي بتقع منه حاجه بيرجع يجبها

الموضوع ده مش موجود الا في دمياط لن الدمايطه عندهم ميزه حلوه قوي
ان اي حد لازم يشتغل
حتى لو معاه فلوس بالهبل
او ابوه مرتاح جدا وملياردير لازم ابنه ينزل ورشه ويشتغل
الاولاد هناك متعلمين ومتعودين على كده اي شغل يشتغل

طيب الموضوع ده مش موجود في باقي المحافظات ليه مش عارف
دائما تلاقي العمالة بتاعتنا ناس معديه 50 سنه على الأقل
طيب ده ليه تركيز وفهم محدود
مش هيبقى عنده همه وسرعه زي الشاب
ولما يبقى العواجيز هما اللي بيقوموا بالاعمال دي أمال الشباب يعملوا ايه
يقفوا على الواصي مش كده

العمالة المصرية عماله تعبانه جدا جدا جدا
لأن المدارس او المعاهد الفنيه والصناعيه مش بتعلم صح والناس بتتخرج منها ولا يعرفوا اي حاجه

**محمد عز** · 27-05-2008 02:55 PM

وايه المانع اننا نستعين بالخبرة الخليجية في الشان ده؟

انا هقلكم على حاجة تموت من الضحك
90 % من مهندسي الطرق فى الخليج مصريين
والله العظيم مش بهزر
انا نفسي مهندس طرق ونقل ومرور وشغال فى الخليج وليا اصحاب واصدقاء فى نفس المجال مصريين فى مختلف بلدان الخليج

**aliabutaleb** · 27-05-2008 03:03 PM

المشاركة الأصلية كتبت بواسطة أبو عبدالله

انا مره واقف في راس البر
لقيت عربية القمامة دخلت السوق العمومي
ولاحظت حاجه غريبه جدا كنت او مره الاحظها
ان كل اللي على العربيه شباب لا يتعدى سنهم 22 سنه
كلهم بلا استثناء

انا معاك طبعاً إن الشباب أحسن في شغلانة زي دي
بس مظنش انها بالشكل ده
كل الامر إن هو ده الشغل المتاح
ولو اتيحت لهم فرصة العمل بنفس الأجر في أي مجال تاني كانوا هاتنقلوا على طول
على فكرة ده بيفكرني بشركة النضافة في اسكندرية
كل اللي فيها شباب بنفس الشكل اللي بتوصفه
بس ده مش عشان شئ إلا لأن المرتبات اللي بتقدمها الشركة أحسن من أماكن كتير أوي
وأحسن من مرتبات موظفين حكومة بمؤهلات عليا
وأحسن من مرتبات العمال اللي شقيانين في مصانع برج العرب 12 ساعة شغل يومياً
هما بيشوفوها شغلانة سهلة وفي نفس الوقت مش مرهقة وكمان مجزية مقارنة بالفرص التانية المتاحة هناك

طيب الموضوع ده مش موجود في باقي المحافظات ليه مش عارف
دائما تلاقي العمالة بتاعتنا ناس معديه 50 سنه على الأقل
طيب ده ليه تركيز وفهم محدود
مش هيبقى عنده همه وسرعه زي الشاب
ولما يبقى العواجيز هما اللي بيقوموا بالاعمال دي أمال الشباب يعملوا ايه
يقفوا على الواصي مش كده

معاك حق والله
تعال شوف عمال النضافة في أكتوبر مثلاً
أولاً نضافة مفيش
بس كل اللي بيتعمل رفع اليد بالتحية على كل اللي راكبين الملاكي إشارة إلى طلب فلوس.
اما في رمضان فالإشارة بتتغير عشان توضح إنهم عاوزين ياكلوا
يعني أساس الشغل التسول مش القيام بالعمل في النضافة

انا هقلكم على حاجة تموت من الضحك
90 % من مهندسي الطرق فى الخليج مصريين
والله العظيم مش بهزر
انا نفسي مهندس طرق ونقل ومرور وشغال فى الخليج وليا اصحاب واصدقاء فى نفس المجال مصريين فى مختلف بلدان الخليج

باشمهندس Casper
انا مصدقك والله
والدليل إني قلت

والدليل ان كتير من المدن في الخليج اللي خططها مصريين على حسب ما سمعت

ده التخطيط فاظن التنفيذ هايكون أسهل
وبالتالي إن كنا احنا المصريين خططنا هايكون صعب علينا ننفذ اللي خططناه هناك؟
طبعاً لأ

ربنا يقويك ويعينك وييسر لك الامور يارب

**mohamed hatem** · 27-05-2008 04:05 PM

على فكرة .. انا عرفت معلومة ممكن تكون مش غريبة بالنسبة ليكم ... بس جديده ليا ....
ان عثمان وحسن علام ... بياخدو مقاولات في الخليج وبينفذوها زي ما بيقول الكتاب

ممكن اعرف ليه ... احنا ملناش نصيب زيهم .... ليه الاسترخاص .... يريته استرخاص في التكلفة وبس ... ده استرخاص للمصريين كمان

**alaa_dash** · 27-05-2008 04:13 PM

المقاولون العرب اللي عاملة نص طرق و كباري السعودية تقريبا ....و كله على قد فلوسه ...مش معقولة تبقى الجودة واحدة

و على رأي ابو عبد الله....ايه رأيك في السيستم ؟؟و الاهم من الشغل تظبيط الشغل ..

و على غرار العنوان ده اسمه ..استسهال.............و استهبال

**aliabutaleb** · 27-05-2008 10:29 PM

المشاركة الأصلية كتبت بواسطة mohamed hatem

على فكرة .. انا عرفت معلومة ممكن تكون مش غريبة بالنسبة ليكم ... بس جديده ليا ....
ان عثمان وحسن علام ... بياخدو مقاولات في الخليج وبينفذوها زي ما بيقول الكتاب

ممكن اعرف ليه ... احنا ملناش نصيب زيهم .... ليه الاسترخاص .... يريته استرخاص في التكلفة وبس ... ده استرخاص للمصريين كمان

سمعت قبل كدة إن آل عثمان الحكومة مديونة لهم باكتر من 300 مليون جنيه
والحكومة مبلطجة عليهم
فممكن يكون منطقهم "على أد فلوسهم"

**د.أحمد سمير** · 28-05-2008 12:47 AM

أولاً : الزفت المستخدم في رصف الشوارع المصرية سيء جداً ، ويستخدم كزفت خام وله العديد من الإضافات التي ينبغي إضافتها له لزادة تماسك جزئياته ولا تضاف للأسف .

ثانياً : تقنية الرصف تعبانة جداً لسة بنعتمد على الفرش والكبس وده نظام عقيم خلص من العالم من سنين .

ثالثاً : وده الأهم .. مواصفات الرصف بتتم وفق طبيعة الأحمال المتوقعة على الأسفلت ، فطريق غير مسموح فيه بعبور النقل بيكون سمك الأسفلت فيه قليل ، فلو مشيت عربية نقل أو أتوبيس نقل عام فهذا كفيل بتدمير الاسفلت واعوجاجه .. وده السبب الرئيس في تدمير الطرق بعد رصفها ..

رابعاً : قلة الذمة وانعدام الرقابة وكثرة الرشاوي والفساد

الموضوع: استفسار .......واستنكار

LinkBack

أدوات الموضوع

عرض

-

-

-

-

-

-

-

-

-

المواضيع المتشابهه

استفسار

استفسار هام جدا

استفسار

استفسار لل a4

استفسار

الكلمات الدلالية لهذا الموضوع

المفضلات

المفضلات

ضوابط المشاركة