اولا السلام عليكم ورحمة الله وبركاته
انا عملت الموضوع دة بصراحة لعدة اسباب
اهمها واولها اني اتعرفت هنا علي ناس محترمة اوي وكنت سعيد جدا بمعرفتهم ويشرفني جدا اني اتعرف عليهم عن قرب
ثانيها : المقابلة بتكسبنا خبرات افضل 100 مرة من الكلام علي النت
ثالثا : نقضي وقت ظريف مع بعض لأن طبعا انتوا عارفين ان الواحد من البيت للشغل ومن الشغل للبيت
اول حد أقابله من قسم سيات كان المهندس ايهاب منصور - وبصراحة انا بعتبره اخ قبل ما يكون صديق راجل محترم اكتر مما تتخيل واكتر من اي حد قابلته قبل كدة - هادي الطبع - لبق الحديث
ثانيا الأستاذ احمد مبروك - عرفني عليه المهندس ايهاب لأنهم جيران وبصراحة مايتخيرش عن المهندس ايهاب اخلاق وذوق فوق ما تتوقع وربنا وهبه ما يفيض من دماثة الخلق
ثالثا المهندس اسلام ابو جاسر - راجل اخلاق وذوق وربنا رزقه خفة دم يحسد عليها وروحه مرحة جدا وتحب تتكلم معاه لحسن خلقه وخفة دمه
الصراحة انا واقع في حيرة من اختيار الميعاد او المكان
في ناس في مصر الجديدة وعين شمس زي ايهاب واحمد مبروك وايهاب windsofchange و behman
وفي ناس ساكنة في الهرم زي اسلام واحمد عبدالسلام والعبد لله
واعتقد المواعيد بردو فيها اختلاف يعني احمد عبدالسلام بيقول السبت والمهندس ايهاب فاضي الأسبوع دة وانا شخصيا فاضي الجمعة بس السبت عندي شغل في اكتوبر لحد 10 مساء
وبالتالي
انا بدعوكم لأقتراح الميعاد والمكان
وانا اهو ابتديت وعملت الموضوع
دوركو بقي انتوا تحددوا الميعاد والمكان المناسب
زي بردو في مشكلة تانية وهي ان المهندس ايهاب مش بيحب قاعدة القهاوي وانا شايف اننا لو هنتقابل اكيد هنتقابل في مكان عام ومش هيكون انسب من قهوة او كافيتريا محترمة نقعد فيها
وسواء الهرم او مصر الجديدة ومدينة نصر فأنا ماعنديش اي مانع لأني سبت واتنين واربع في اكتوبر واحد وثلاثاء وخميس في مدينة نصر وبالتالي انا معاكو في كلا الحالتين
اقترحوا انتوا عايزين ايه وفين وانا معاكو
وطبعا الدعوة مفتوحة لكل من يدخل ويشوف الموضوع زي sameh_se و egman و ser3a وكل الأعضاء الي مش عايزهم يزعلوا مني لعدم ذكر اسمائهم بس دوول الي من فترة كانوا قالوا علي مقابلة
ياريت الي يدخل ويشارك يسيب اسمه الحقيقي واقتراحه في الميعاد والمكان
والله المستعان
،
،