الموضوع: حدث بين الثالثه والرابعه والنصف فجرا

من ظهر يوم الثلاثاء حتي العاشره من مساء الاربعاء وانا منمتش
كل ما اجي انام يحصل حاجه تفوقني
المهم روحت بيتنا اتغديت ونمت علي الساعه 10 كده وصحيت 2 الفجر
لقيت امي اللي ربنا يخليها بتقولي حتنام تاني ولا قاعد شويه
قولتلها قاعد
قالتلي طيب استني
واختفت في المطبخ وسط اصوات طششش وتوششش
وظهرتلي امي الغاليه الرائعه بطبق مليئ بكرات لقمه القاضي الساخنه المقرمشه (الزلابيا يا قاهرويه )
وقعدت دي حلوه ودي احلي لحد ما خلصت نص الطبق (اصلي مكنتش جعان) يا دوب اكلتلي 100 واحده بس
ودخلت كالعاده اصطبح بوشكم السمح علي المنتدي والفيس بوك
والجو برد بشكل لا يطاق وصوت الامطار عامل زي المدفع الرشاش علي التنده في البلكونه
شويه والمطر هدي والجو راق
طلعت من اوضتي بصيت علي الغاليه لقيتها بتنعس
قولتلها انتي حتنامي
قالتلي اه
قولتلها ما تيجي ننزل
قالتلي ننزل فين يا تيت
قولتلها نتمشي علي البحر لحد المنتزه ونرجع
قالتلي انت مجنون حد ينزل في الجو ده
قولتلها اه احنا
البسي الدولاب كله حتي وننزل

هي لبست ما تيسر من هدوم تدفيها
وانا ضربت الكوفيه والجاكيت وبقيت عامل زي الديب السحلاوي وكعبت اول شوز لقيته من غير شراب حتي
وكانت
نزلنا
اييييييييييييييييييه الجمال ده
اييييييييييييييييييه الروعه دي
اخدت الكورنيش من اوله لاخره رايح جاي
علي انغام اليسا وجرعات الشويبس جولد اناناس
مفيش زحمه
مفيش ناس الا عدد قليل جدا
مفيش تراب
مفيش اي حاجه تضايق نهائي
جو نضيف
هوا نضيف
ووسط كل ده
لقيت 2 عمال نضافه ناحيه استانلي
معرفش بيكنسوا ايه بس اللي بيكنسوه ميملاش كيس لبن لو اتلم فيه
تقريبا نزلوهم طوارئ علشان الكانزتين اللي انا رميتهم في الشارع
بجد صعبوا عليا اوي انهم نازلين علي 2 كانز بس
لو كنت اعرف كده كنت اخدتلهم معايا شويه زباله رميتها علي الكورنيش
اهم يحسوا انهم شغالين برضه ويتدفوا
بجد بجد بجد
عمار يا اسكندريه
لولا ان كاميرا الموبايل مصابه بالجلوكوما والاستجماتيزم ونظرها لا يتعدي 2 ميجا بيكسيل
لا كنت صورت كل شبر مشيت عليه
اولا علشان الناس تشوف جمال اسكندريه
ثانيا علشان القاهرويه يتغاظو هههههههههه
ثالثا علشان واحد حبيي هو عارف نفسه كان نفسي اروح للشيخ وفيق بس امر الله نفذ في الزلابيا
ومفيش مكان لحاجه تانيه
عقبال ما اشوفها في الصيف برضه كده
وجحافل التتار تنزح عن بلدنا
ويجيها مصيفين راقيين بتصرفاتهم
ورجعت البيت الساعه 4 ونص الفجر
وبجد كانت خروجه زيرو تكاليف
بس كان ليها عامل نفسي جميل وكبير جدا علينا
دا كان العادي بتاعي من فتره
بس بقالي فتره كبيره بيكون مليش نفس اخرج
يلا نلقاكم في خروجه جديده ومغامره احلي واحلي
والمره الجايه حروح الشيخ وفيق واتصور مخصوص علشان واحد حبيبي عارف نفسه كويس