الموضوع: تجربة قيادة اكسنت rb اية رأيكوا اكمل ولا مافيش داعى ؟

المشاركة الأصلية كتبت بواسطة semsem kane

طيب بما ان فية تشجيع منكوا على عرض التقرير وطبعا ناس غرضها التسخين وان تقوم الحرب العالمية الرابعة فى المنتدى هنا بسببى نعرض التقرير

انا عموما عملت للعربية تجربة كاملة من غرز وثبات وتسارع وتقيم فى كل حاجة حتى الصاج والتقفيل
وان شاء الله التققيم دة حيادى جدا وبجد هيفيد ناس كتير جدا

اولا : الشكل الخارجى :

* العربية شكلها كويس بس من الخلف افضل من الامام ومن الجنب بحس انها غير متناسقة بعكس الالنترا بس عموما الشكل فى المجمل اديلة 7.5/10 ( ازواق فى الاخر ) فية غيرى شايفها احلى من كدة او اوحش من كدة

ثانيا : الصاج :

صاج العربية خفيف جدا جدا الى ابعد الحدود واحد بس ريح على العربية وهية راكنة من الجنب طبق الرفرف الخلفى مع البوية اتأشرت والبوية خفيفة جدا

ثالثا : الصالون

* اول حاجة خامات البلاستيك فى كل مكان فى العربية

* مافيش مصباح صالون امامى في فى المنتصف فقط ودة انا مستغربلة بصراحة

* الدركسيون بتاعها كالعادة مرهق جدا فى مسكتة للمسافات الغير طويلة نسبيا بس بيعوض دة خفة الباور

* العربية صالونها ضيق وخصوصا من الخلف يعنى هبقى مناسبة لاى حد طولة لا يتعدى ال182 سم

* العزل كويس جدا وان ماوصلش لممتاز بس عربية بالسعر دة والعزل دة كويس جدا

* السيارة لا يوجد بها ساعة الا فى الكاسيت

* رؤية العداد وانت سايق صعبة ولازم تبعد عينك شوية عن الطريق عشان تشوف انت وصلت لكام

* تقفيل العربية كويس وماشوفتش اى حاجة متقفلة غلط او بتعمل صوت

* العربية رؤيتها على الطريق اديها 5 /10 لانها فعلا مش مغطية حاجات كتير + ان الكابوت مش باين اصلا وانت جوة اخر حاجة هتشوفها المساحات

* الرؤية الخلفية صعبببببببببببببة جدا وخصوصا فى الركنة عايزة تركيز عالى جدا لان الزجاج صغير جدا جدا

* العربية السماعات بتاعتها حلوة اوى لحد 20 بالظبط بعد كدة الصوت بيبوظ

* الكراسى غير مريحة نهائى بعد اول 80 كم فقط ودة بسبب حاجات كتير وضعية الجلوس نفسها + نوع وخامة مكونات الكراسى

رابعا : المحرك :

* المحرك هادىء جدا جدا جدا لحد 2000 لفة بعد كدة بيبدأ صوتة يبان بوضوح وصوتة غير محبب خالص يعنى ماتحبش تسمعة

* سحب العربية كويس بس بيحصل نوع من تأخير السحب شوية لو دوست جامد شوية وانت طالع

* المحرك سريع الاستجابة وخفيف فى حركتة بس عدد لفات الاربى ام بتاعتة بحس انها بتتحرك ببطىء يعنى كنت واقف ودوست كتير صوت المحرك على جدا ولسة العربية على الاربى ام 3000 انا لو دوست الدوسة دية عندى كان وصل ل6000 مستريح , + ان المحرك نغمتة مش مظبوطة وانا واقف وبزود بنزين

* بدال البنزين مش خفيف تقيل شوية ودة كنت لازم اضغط شوية على العربية عشان تسحب

* صوت المحرك بسمعة فى العربية بعد اول 3000 لفة بالظبط وانا ماشى ومش قافل الزجاج وسمعتة اوضح لما قفلت الزجاج

* القيادة بوضعية ال eco mode حسيت ان فعلا العربية ادائها انخفض بس مش للدرجة اللى تحسسك انك فى نظام eco mode يعنى الاستهلاك ماختلفش كتير , الاداء ماختلفش كتير حاجات

* تسارع السيارة من بعد سرعة 120 كم بطىء نسبيا بس سريع مقارنة بالسيراتو يعنى جابت من 120 كم لسرعة 150 كم فى وقت كويس بعكس السيراتو

خامسا : الفتيس

* الفتيس وانا بنقل سهل وبيجى على طول مش تقيل بس لمسة مقبض الفتيس نفسها مافيهاش اى نوع من الراحة يعنى كنت عايز انقل بس واسيب ايدى على طول من خشونة ملمسة

* الاحساس بالنقلات مرضية جدا بس بردة فية احساس بالنقلة واضح وكنت بعرف بسهولة ان العربية نقلت

* الفتيس على وضعية + , - ماختلفش خالص فى السحب عن ال d يعنى حسيت ان التسارع هو هو بس فية مشكلة ان صوت المحرك بيعلى جدااااااااا بعد ال3000 لفة عشان طبعا مابينقلش غير لما تزود + ان رؤية العداد غير مريحة عشان تبص انت عايز تنقل عند اربى ام كام + ان المشكلة ان صوت المحرك بيعلى وبيديك احساس ان عدد اللفات وصل ل 5000 وتبص تلاقية عند 3000 لفة لسة
بس فى المجمل الاستمتاع بالفتيس وبالنعومة بتاعتة لحد 2500 لفة بعد كدة الوضوع بيتغير تماما

سادسا : نظام التعليق

* العربية نظام تعليقها متوسط الاداء , يعنى الاحساس بالمطبات موجود حتى مع ابسط المطبات وياسلام لو نزلت فى نقرة تسمع صوتها داخل المقصورة بس ماوصلش لدرجة السيراتو

* العربية ثباتها كويس جدا قبل ال 100 وبينزل بعد سرعة ال120 وبينزل بطريقة غريبة من بعد سرعة 140 وتخليك تمسك الدركسيون بأيدك وسنانك

* طبعا فواصل الكبارى ليها أثر كبير جدا على عفشة العربية من الخلف وهية المرجحة الجميلة اللى فى كل عربيات كيا وهيونداى

* فى المجمل العفشة ناشفة وصوتها مسموع داخل العربية وهية لسة جديدة تخيل بقى بعد سنتين هتعمل اية

سابعا : الفرامل

* الفرامل ادائها متوسط جدا يعنى بدال الفرامل مش قوى فى تماسكة تحس ان العربية التيل على النصف مع ان التيل لسة معداش علية غير 10750 كم يعنى لسة بحالة وعموما لازم تتضغط جامد شوية عشان توقف العربية , بس الفرامل مستواها جيد فى السرعات لحد 100 وبيقل عند السرعات العالية + بيقل جدا على الارض الرملية فبضطر ان اقف قبلها بفترة او عدم الكبس القوى فى الارض الرملية ( تراب يعنى عشان محدش يفتكر انى فى صحراء )

ثامنا : مساحة الشنطة

* العربية شنطتها ضيقة وواطية يعنى عايزة واحد استخداماتة للشنطة قليل

تاسعا : استهلاك البنزين

العربية عملت بيها 120 كم مابين مشى عادى وضغط استهلاكها معقول شالت معايا شرطتين

بس فية حاجة غريبة لما بحول لل eco mode مسافة الاستهلاك ماببتغيرش مش عارف لية يعنى المفروض لو انا كنت جايب ال ستيب ترونيك كان التانك شرطتين وقايلى 115 كم مسافة سير , ولما حولت لل eco mode عديت شارع واحد بالظبط لقيتة كاتبلى 110 كم مسافة سير النسبة قلت مع انة معديتش 2000 لفة بعكس العربيات التانية لما شوفت ال eco mode بتاعها لقيتة عدل الاستهلاك على طول للاقل

عاشرا : التسارع

انا جربت من صفر ل 100 على ال d عملت تقريبا 10.5 ولما عملت ال ستيب ترونيك عملت 10 ثوانى مش عارف بقى فية حد جاب اقل من الارقام دية ولا لأ

اقصى سرعة للسيارة انا جيبتها 150 ودة لان العربية بتبقى بطيئة بعد السرعة دية وعايزة طريق مفتوح + صوت الهواء مسموع بوضوح بعد 120 كم

فى النهاية تقييم السيارة :

الشكل الخارجى : 7.5/10

الصالون : 6/10

التقفيل : 8.5/10

الاتساع : 7/10

المحرك : 7/10

الفتيس : 8/10

الاستهلاك : 7.5/10

الراحة فى القيادة : 6.5/10

الفرامل : 7/10

الثبات : 6.5/10 اكيد لما تتعرض بجنط اكبر هتبقى احسن

السيارة فى المجمل : 70%

لازم العربية يكون فيها abs

سعرها لازم ينزل عن كدة اخرها 85 الف جنية فول اوبشن

التقييم من وجهة نظرى

إنتى شجعتنى إنى أشتريها وخصوصا مع توافر قطع الغيار بصورة جنونية