الموضوع: 8 مليون بني ادم بيخانقوا دبان وشهم

المشاركة الأصلية كتبت بواسطة OlaOsman

لا يا سبعاوي الله يكرمك، بلاش الصورة اللي انت حاططها دي

هنضحك على نفسنا ليه؟ مهو هى اخرتها كدة، الغريبة انى يقيت فعلا حاسس ان الصورة دى بتمثل لى الضوء الموجود فى نهاية النفق

المشاركة الأصلية كتبت بواسطة OlaOsman

يااااااااااااااه.. للدرجة دي مصر كلها مختصرة في القاهرة و ضواحيها؟.

متهيألي لو الدولة وفرت حياة كريمة لأبناء الأقاليم مش هايضطروا يهاجروا للقاهرة و ماكانش الوضع في القاهرة هايبقى بالمنظر ده.. يعني شاب اتولد و نشأ في بلدته، سواء في كفر الشيخ.. المنصورة.. الإسماعيلية.. السويس و بدأ يدرو على شغل بمرتب يعيشه و يقدر يفتح بيه بيت و عشان مش كل الشركات الكبيرة المحترمة متكومة في القاهرة فقدر انه يلاقي وظيفة تناسبه في بلده.. اشتغل و اتجوز و استقر هو و أولاده في بلده، ده حتى أبناء الإسكندرية مش بيلاقوا شغل كويس فبيضطروا برضه ييجوا القاهرة.

انما السيناريو اللي حاصل للأسف ان الشاب من دول بيتخرج و يبقى نفسه ما يسبش بلده و أهله، انما مش بيلاقي شغلانة عدلة فبينزل على القاهرة و بيلاقي في القاهرة مبتغاه.. الشركات الكبيرة كلها فيها و كل وسائل الخدمات فيها.. فطبعا مش بيفكر او كمان مش بيعرف يرجع بلده تاني.. فبيتجوز و يستقر في القاهرة.. و عياله يكبروا في القاهرة.. و يدخلوا مدارس القاهرة و يركبوا مواصلات القاهرة و يبدأوا همه كمان يدورا على شغل و سكن في القاهرة.. و الموضوع في اضطراد مرعب و الله اعلم اللي اسمها القاهرة دي هايرسي بيها الحال على ايه

اما المدن الجديدة فأنا باسميه فخ اليائسين من زحام القاهرة.. المنظر هناك حياة وردية، مافيش زحمة و لا تلوث.. و لا حاجات تانية كتير كمان مهمة.. ده غير ان لا زالت هناك مركزية زي ما ذكر elpasha009.. مدن جديدة بس برضه الشغل في وسط القاهرة.. المدارس النضيفة هناك.. الوزارات و المصالح الحكومية هناك.. فبررررررررضه هتلاقي زحام باصات المدارس و هتلاقي تكدس العربيات وقت الذروة.. ده غير مأساة المحور لكل ساكني 6 أكتوبر و بيشتغلوا براها و اللي ساكنين برة 6 أكتوبر و بيشتغلوا جواها

اللي متظبطين بأه همه اللي ساكنين في المدن الجديدة و بيشتغلوا جواها برضه.. حد مثلا ساكن في 6 أكتوبر و بيشتغل في القرية الذكية.. كده يعني

انما اللي حاصل ان الدولة عمالة توسع في رقعة القاهرة أفقيا و رأسيا و مش بتحل المشكلة من جذورها.. وفروا حياة كريمة لأبناء الأقاليم في بلدهم و همه عمرهم ما هايفكروا يهاجروا للقاهرة آآآآآآآآآبدا.

بالضبط يا علا، المشكلة ان كل حاجة في القاهرة، الشركات الكبيرة، المشاريع الضخمة، كل حاجة.
انا مثلا من اسكندرية، العاصمة الأولى سابقا والثانية حاليا، تخيلي ان اسكندرية بجلالة قدرها ما فيهاش 1/10 من الفرص اللي في القاهرة، بس انا برضو التمس العذر للشركات الكبيرة اللي في القاهرة، لأن بسبب المركزية اصبح كل مستثمر او صاحب شركة يهمه انه يكون جنب مصالحه.
طيب ليه اصلا موضوع المركزية ده؟؟؟!!!
لو ما كانش فيه مركزية، كان هيبقى فيه فرص عمل في جميع المدن والمحافظات، وماكانتش القاهرة هتبقى بالبشاعة دي.
انا بصراحة نفسي افهم ليه المركزية؟
بس يمكن الكلمة كانت عاجباهم زي الكلام الكتير اللي كان عاجبهم وجابنا ورا، زي المركزية، القومية، الاشتراكية، المهلبية...
حسبنا الله ونعم الوكيل...

المشاركة الأصلية كتبت بواسطة sab3aawy

اول ما اتخرجت خدت شقة فى مدينة جديدة على مشارف القاهرة

مختضر التجربة انى لقيت نفسى بنزل 614 درجة فى السلم الاجتماعى بسكنى فى هذة المدينة

بعت الشقة بعد ما كنت صرفت عليها دم قلبى، وبعد كدة بعت اللى ورايا واللى قدامى واللى جنبى كمان علشان آخد آخر شقة فى آخر عمارة فى آخر حى على اطراف القاهرة (يعنى انا من البلكونة بشوف حدود القاهرة وبشوف محافظة حلوان)

بس اسمى لسة فى القاهرة

يا ريت يا استاذ سبعاوى توضح لى التجربة دى اكتر
لان احنا عندنا شقة فى مدينة بدر وانا ناوى اتجوز فيها ان شاء الله
و ابن خالتى برضه عنده شقة هناك و هيموت و يجيب اى جحر فى القاهرة الجديدة
رايى فليذهب السلم الاجتماعى الى الجحيم على راى اولاد العم سام و قيمتى انا االى بحددها لنفسى مش الناس هى اللى هتحددهالى , فى حاجة كمان اهلى هم اللى هيجوزونى يعنى انا متعبتش فى اى حاجة

المشاركة الأصلية كتبت بواسطة ams

يا ريت يا استاذ سبعاوى توضح لى التجربة دى اكتر
لان احنا عندنا شقة فى مدينة بدر وانا ناوى اتجوز فيها ان شاء الله
و ابن خالتى برضه عنده شقة هناك و هيموت و يجيب اى جحر فى القاهرة الجديدة
رايى فليذهب السلم الاجتماعى الى الجحيم على راى اولاد العم سام و قيمتى انا االى بحددها لنفسى مش الناس هى اللى هتحددهالى , فى حاجة كمان اهلى هم اللى هيجوزونى يعنى انا متعبتش فى اى حاجة

نوعية الجيران (ناس مقتدرة وللا شباب فى بداية حياتهم وللا سكن عمال وللا طلبة وللا موظفين)

نوعية المواصلة اللى انت بتدخل وتخرج بيها من منطقة سكنك(اتوبيس نقل عام وللا ميكروباص وللا نص نقل مسقوف وللا توك توك)

المنظر العام لمنطقة السكن (منطقة متوسطة وللا مشروع تبع شركة من الشركات الكبيرة وللا اسكان شباب وللا بلوكات اسكان تعاونى وللا عشوائيات )

نوعية المحلات اللى ممكن تفتح تحت البيت (مفيش محلات اساسا، فيه محلات لكن غير مسموح بالمقاهى والورش يعنى آخرها بقالة وللا مكتبة وللا مغسلة، قهاوى وورش سيارات وفرارجية وبتوع كشرى)

الخ الخ الخ من تلك العوامل التى يتوقف عليها تأثير سكنك فى شكلك الأجتماعى

المشاركة الأصلية كتبت بواسطة OlaOsman

يااااااااااااااه.. للدرجة دي مصر كلها مختصرة في القاهرة و ضواحيها؟.


اما المدن الجديدة فأنا باسميه فخ اليائسين من زحام القاهرة.. المنظر هناك حياة وردية، مافيش زحمة و لا تلوث.. و لا حاجات تانية كتير كمان مهمة.. ده غير ان لا زالت هناك مركزية زي ما ذكر elpasha009.. مدن جديدة بس برضه الشغل في وسط القاهرة.. المدارس النضيفة هناك.. الوزارات و المصالح الحكومية هناك.. فبررررررررضه هتلاقي زحام باصات المدارس و هتلاقي تكدس العربيات وقت الذروة.. ده غير مأساة المحور لكل ساكني 6 أكتوبر و بيشتغلوا براها و اللي ساكنين برة 6 أكتوبر و بيشتغلوا جواها

انما اللي حاصل ان الدولة عمالة توسع في رقعة القاهرة أفقيا و رأسيا و مش بتحل المشكلة من جذورها.. وفروا حياة كريمة لأبناء الأقاليم في بلدهم و همه عمرهم ما هايفكروا يهاجروا للقاهرة آآآآآآآآآبدا.

انا متفق معاكي يا علا .. و لكن بعيداَ عن الدولة الموضوع يتطلب جزء كبير من المغامرة .. يعني اصلا فكرة المدن الجديدة كانت قمة المغامرة .. مدينة زي 6 أكتوبر .. انها تتعمل في وسط الصحراء و بكل هذا البعد عن القاهرة و تنجح .. ده نجاح لمغامرة ..وتعتبر استقلت بنفسها كتير عن القاهرة .. يعني انا ليا اصدقاء مصريين و غير مصريين مبيطلعوش برة 6 أكتوبر الا نادراَ .. ساكنين و بيدرسوا و بيشتغلوا هناك .. ليه اللي عنده مشروع صغير مبيعملوش الا في القاهرة !؟

عامة الخروج برة القاهرة في وقت قريب جدا هيبقي ضرورة مش مجرد اختيار لأن هييجي وقت علينا فعلا مش هنلاقي مكان نمشي فيه علي رجلينا

فعلا يا مهاب انا شايف ان فيه بعض المناطق في 6 أكتوبر بتتجه و بقوة انها تبقي مناطق عشوائية .. خاصة في وسائل المواصلات اللي مفيهاش اي امان زي التوك توك .. انا كتبتها هنا قبل كدة في موضوع ان شفت توكتوك و جريت جنبه عشان اشوف عامل كام عالعداد لقيته معدي ال 70 ! و التوك توك ده ورقة يعني لو اتقلب ولا خبط في حاجة الناس كلها ضاعت .. و موضوع العمال برده و استيلائهم علي 6 أكتوبر كنت بحسه قبل ما اجيب العربية وكنت بروح الجامعة في المواصلات و تلاقي و انت قاعد راح خابط في وشك جاروف ولا فأس ولا حاجة !

انا حجزت بالفعل شقة في اوبرا سيتي في الشيخ زايد و المشروع لسة مكملش بالكامل بس انا كل فين و فين بروح اتفرج .. التقسيم و شكل العمارات حلو بس المنطقة نفسها لسة عليها كتير .. صحراء جرداء .. و لكن اللي مطمني اني كل يوم بعدي علي زايد و عارف ان معدل التطور فيها سريع .. يعني رويال سيتي اللي قدام كارفور دي طلعت فجأة كدة ! فا مبيضيعوش وقت .. بس زي ما قلتلك شكلها لسة بدري .. انا كنت ناوي انقل الصيف ده بس شكلها مش اقل من سنتين تلاتة و طبعا انا كان نفسي نبقي جيران و نعمل لجنة كبيرة هههه لسة ماسك واحد راكب فيرنا ماشي يتطوح في الطريق زهقته في عيشته لحد ما خاف و دخل الطريق البطئ

و الأسعار في زايد قفزت قفزة خيالية !! يعني لو مكناش حجزنا من سنتين كنا ولا هنعرف ناخد اي حاجة .. و حجزنا لسبب واحد ان كان معروض علينا شقة في الرحاب ايام ما كانت جديدة و قلنا احنا ايه اللي يحدفنا الحدفة دي .. شوف دلوقت الرحاب و اسعارها .. تقريبا 7 اضعاف المبلغ اللي كنا هندفعه من 5 سنين .. فا محبناش نكرر نفس الغلطة

المشاركة الأصلية كتبت بواسطة Mohamed-Saoud

أولا أشكرك يا dehumanizer (يا ريت تكتب أسمك بالمناسبة :)) على الموضوع المهم ده و ثانيا ألف شكر لمهاب على الشرح المفصل.

-الهرم: نموذح أرحم و أشيك بكتير من فيصل بس أكيد أغلي.

اشكرك انت يا استاذ محمد ..و انا اسمي محمود حاطه في التوقيع :) و انا حبيت اعلق علي الهرم و فيصل .. شارع الهرم اصبح لعنة .. و فيصل لعنتين .. الله لا يوريك الشارعين اما بيكونوا واقفين (و هما معظم الوقت واقفين!) .. و في رأيي انهم ميفرقوش كتير عن بعض الا في مستوي العمارات .. انما في الزحام واحد خاصة انك ممكن تخرم من الهرم لفيصل و العكس بسهولة

المشاركة الأصلية كتبت بواسطة elpasha009

المشكلة يا أستاذ dehumanizer مش في مستوى الخدمات ولا الأمان ولا الشوارع ولا أي حاجة تانية.السكن في المدن الجديدة أحسن ميت مرة من القاهرة.
المشكلة بقى بجد إن الدولة بتعتمد على المركزية في الحكم.وهو ده اللي بيخلي إنك مستحيل تعيش خارج القاهرة بدون الرجوع على الأقل مرة في الإسبوع للقاهرة.
تعرف إن السودان مطبقة نظام الامركزية وده بيخلي كل ولاية من الولايات مستقلة تماما عن العاصمة وبيبقى ليها حكومة لوحدها و مجلس الشعب بتاعها ومجلس الوزراء بتاعها وكأنها دولة داخل الدولة:)ده حتى الخرطوم العاصمة ليها حكومة الولاية وحكومة الدوله:)
لو النظام ده إطبق عندنا أعتقد إن نص سكان مصر هيعيشوا خارج القاهرة وأنا واحد من الناس لو ده حصل هكون أول واحد يسكن في الوادي الجديد وأبعد عن الدزشة والزحمة والقرف بتاع القاهرة.

هقول ايه بس .. اهلا بيك في مصر :) الدولة اللي بتشوف ايه اللي يضايقك و تعمله .. بس ممكن اسأل حضرتك سؤال .. اشمعني الوادي الجديد تحديدا ؟ وشكرا لردك

المشاركة الأصلية كتبت بواسطة sab3aawy

هنضحك على نفسنا ليه؟ مهو هى اخرتها كدة، الغريبة انى يقيت فعلا حاسس ان الصورة دى بتمثل لى الضوء الموجود فى نهاية النفق

و الله يا استاذ سبعاوي انا كل خوفي ان نطلع في حفرة مش نفق ههه بس إن شاء الله خير