الموضوع: هو ايه وظيفة البواب؟

السلام عليكم ورحمة الله وبركاته

دلوقتي يارجاله انا كنت في الأسكندريه العماره اللي ماجر فيها مفيهاش بواب وطول عمري عايش في بيت في الارياف وبرده مفيش بواب وكل حاجه بعملها بنفسي

لما جيت القاهره العماره اللي انا فيها فيها بواب واول ايام ليا انا ومراتي كنا بنكلم البواب يبعت مراته او ابنه يجيب طلبات للبيت لكن مراتي مش بتحب كده ومش بتحب حد يجيبلها اكلها يعني بتقول محبش حد يبصلي في الأكل اللي هاكله وعندها حق لاني كنت بشتري عيش وبقسماط وكان في اتنين مرات بوابين يعني وكان بيسالو علي العيش ولما الراجل قال كمان نص ساعه قامت واحده فيهم قايله لسه هجي تاني انشالله يطرشوه

المهم ان مرات البواب عرفت اننا من كفر الدوار وهما اصلا من دمنهور وتقريبا زي مايكونو مش مستنضفينا هههههه

اول يومين مره وانا بركب العربيه قام البواب ماسح العربيه ومروقها قمت مديله جنيه ومكنش عايز ياخد حاجه قلت الراجل بيعمل واجب عشان بحراويه زي بعض

بعد كده بقي مصدرلي الطرشه تماما مش عارف عشان انا من جبنهم ولا عشان بجيب حاجتي بنفسي
والله العظيم ببقي جايب الخضار والفاكهه والعيش وكل حاجه مره واحده بيبقي كل صباع في ايدي فيه 3 شنط وببقي مش عارف حتي اقفل باب العربيه وهو شايفني مش بيقولي حتي اشيل عنك حاجه
مع اني بدفع كل شهر70 جنيه صيانه واجرة بواب

لما كانت مراتي بتكلمهم يشترولها حاجه لو مش فاضيه كانت بتديهم 3 جنيه ولا 5 جنيه مثلا عن كل مره يروحو فيها يعني عايزين مصروف لوحدهم

كل ده مش مهم
المهم اني كل يوم انزل الاقيه عمال يمسح ويغسل العربيات بتوع سكان العماره الا عربيتي حتي النهارده كان بيغسل عربيه سيراتو وعربيتي كانت واقفه تحت شحره فالشتا مع التراب وسخها خالص وفضلت امسح انا فيها وهو عامل فيها هندي

هل المفروض اي حاجه اخليه يعملها وانفضله علي اساس اني بدفعله راتب شهري ولا لازم اديله فلوس ولاايه؟

انا مش معوج والله بس ساعات الصبح ببقي لابس الجاكيت وبيتوسخ من التراب اللي علي العربيه وبرده لما ابقي مطلع حاجه مش ببقبي قادر اشيل كل الحاجات

علما بان في ناس معاويج كتيير في العماره وبيعملهم اللي هما عايزينه - مره كانت واحده ست نازله قدامي شايله شنطه هدوم صغيره وجت عند باب العماره وقالت لمرات البواب شيلي الشنطه فانا قلت جايز هتوصلها لقيتها مشت حوال 6 متر وقالت خليها هنا بقي لحد ماجيب العربيه يعني مكسله تشيلها الخطوتين دوول او مستكبره تطلع الشارع وهي شايله الشنطه

الخلاصه انا عايز اعرف هو المفروض يقدملي ايه من غير فلوس

علي فكره في جار ليا اكتشفت انه من العجمي عشان مراته بتشتغل مع مراتي في الحضانه وقالتلي برده انه كان بيعاملهم كده والراجل مسكه مره اتخانق معاه وانا مش بحب كده