-
المنتدى ده يحير بجد
يا جماعة انا بجد محتار اخر حيره ومش عارف الاقي عربية اشتريها
معايا حوالي 70 باكو طالعين من لحم الحي
قولت اشتري عربية قالو العربيات الاسبرانزا كماليات وناس كتير بيقولو عربية وحشة وصيني وبتاع
قولت بلاش خلينا في الهيونداي ... قالو الفيرنا زباله ووحشة وتوكيلها وحش
قولت خلينا في الدايو قالو بردو الدايو اللي نازل جديد بقى زي الزفت ووحش وتعبان وعربيات شكلها بقى قديم زيها زي ال 128
وانا مش عايز اشتري عربية هاتش باك وفي نفس الوقت مش عايز اجيب مستعمل
طب قولت ابص في المنتديات بتاع العربيات اللي رنجها اعلى من امكانياتي لاقيت الناي بردو بتشتم فيها
لاقيت اليارس وحشه وفيها عيوب والكرولا الجامده اوي زي مسمعنى لقيتهم بيقولو الجديده مليانه عيوب
واللانسر العربية اللي بعشقها قالو عليها مفيهاش عزل وصوتها عالي وفيها عيوب بردو
شوفت الهوندا قالو مش حلو شفت الشيفورليه اوبترا قالو عربيه اي كلام شوفت الافيو قالك عربية ب حاجة وسبعين الف وقزاز قدام بس كهربا والباقي منفلة ومغيهاش ريموت يعني متنساش المصوجر مفتوح وتنزل
قالو النيسان صني ... بردو ديقة ومش عارف فيها ايه والتجميع المصري كاني وماني
قلت البروتون ... قالو مالماليزي زي زي الصيني .. وكمان فيها بردو عيوب
مرديتش ابص على المرسيدس والبي ام دبليو لحسن حد يقول دي وحشه هيا كمان
طب حد يقولي اشتري ايه ؟؟؟؟؟؟؟؟؟؟؟؟؟
كل الناس اللي ركبين عربيات من اللي قولتوهم بيقولو دا عربية ملهاش حل
واللي صاحبو راكب زيها بردو يقول ملهاش حل ... واي عربية تانيه من نفس الفئة السعرية تبقى وحشه وملهاش لازمة
اشتري موتيسكل ولا فيزبا احسن واريح دماغي!!!!
-
هاهاهاهاهاهاهاهاهاههاهاها هاهاهاهاههاهاهاهاههاهاهاه اهاه
فيزبا مليانة مشاكل وتوكيلها مش حلو
-
مفيش داعى تشترى عربية خالص !!! ووفر فلوسك ما دام طالعة من لحم الحى !
العربيات دلوقتى وجع دماغ و تراخيص مكلفة و بنزين غالى و اللى يحكهالك و اللى يخبطهالك ...
يا راجل بلا وجع دماغ
-
توكل علي الله واشتري العربية المرتحلها كل العربيات التي ذكرتها كلها ماشة في شوارع القاهرة
لاتنسي الاستخارة
وبلاش موتيسكل ولا فيزبا عشان عيوبها كتير :confused2:
http://www.postimage.org/aV1fjSS9.jpg
-
بص يامان كل عربيه هتلاقي فيها عيوب بس هتلاقي عيوب تفرق معاك وعيوب مش هتفرق معاك
مثلا انت بتقول اللانسر صوتها عالي وممكن يكون ده مش هيفرق معاك بالنسبه لأنك مرتحلها في مثل بيقولك ( اركب اللي يعجبك ونفض لكلام الناس ) شوف انت عايز ايه واعرف العيوب دي هتضايقك ولا لأ وبعدين مافيش عربيه كامله من غير عيوب لأن لو عربيه كامله من غير عيوب يبقي كانت كل الناس جابتها وبقيت الشركات باعت طعميه
بس نصيحه مني خليك في الياباني دي احسن تكنولوجيا وكمان الصيانه وايضا قطع الغيار ممتازه
وعندك باردو الالماني اكتر من الممتاز بس لو انت قد قطع الغيار
وعندك نجم النجوم الكوري وده زي ماتقول اللي واكل الجو بس هي عربيات بتاعت وقتها وبس وأسأل مجرب
ويارب تختار حاجه تعجبك وتكون مبسوط وفرحان بيها
وربنا يباركلك فيها ويكفيك شرها
-
ممكن لو عاوز عربية صغيرة تجيب بيكانتو ضمان 5 سنين و عربية ممتازة
-
روح لمعرض سيارات جرب تركب كذا عربيه عجبينك وشوف انى واحده انت مرتاح لها
-
هههههههههه يا اخى هنا الكل مش معقول هيتكلم على العربية اللى جربها ويتغنى بجمالها لازم يطلع عيوب لزم الحرفنة يعنى .... بس صدقنى دى كلها حاجات بتختلف من شخص للتانى .... وبعدين حضرتك متخيل ان عربية تمنها معدى 50000 مكركبة .. امال يعنى الناس اللى راكبى الفيات والبيجو القديم يعملو ايه .. توكل على الله شوف النوع اللى بتستريحلو من حيث الإمكانيات ومراكز الصيانة وتوافر قطع الغيار وراحتك النفسية واستخير ربنا ... ان شاء الله ربنا يرزقك بعربية ممتازة تتمتع بسواقتها وربنا يكفيك شرها
-
اخي العزيز لدي نصيحه اتمني ان تاخذ بها حتي تستريح:
1- اولا في شئ مهم اسمه صلاة الاستخاره ودي يمكن اخر خطوه بعد اختيار السياره ولكن اهم خطوه لانه توفيق ربنا سبحانه وتعالي.
2- لازم تحدد اولوياتك في العربيه و متطلباتك و تحدده بدقه و متوسعهاش قوي عشان انت كمان مقيد بمبلغ محدد يعني مثلا انا من اهم متطلباتي ان العربيه تكون واسعه عشان اسرتي كبيره و كمان تكون عاليه عن الارض عشان اتهريت مطبات و ضهري بيتكسر من رزع المطبات و حاجات تانيه كتير و علي اساسها باختار العربيه.
3- لازم تحدد من الاولويات دي مجموعه ممكن تتنازل عنها في مقابل تانيه عشان موضوع السعر.
4- لازم تشوف نفسك هل انت من النوع اللي بيحب عربيه الناس تبهر بيها و لا تكون عربيه تؤدي متطلباتك و تريحك انت شخصيا.
5- كمان لازم تقنع نفسك ان اختيارك هيكون افضل شئ في حدود امكانياتك.
6- في بعض الحاجات الاساسيه هيا اللي تدور عليها زي ان التوكيل محترم او قطع الغيار متوفره او العربيه شغاله ولا محدش بيشتريها وطبعا عمرك ما هتجد الكمال في اي عربيه حتي لو مرسيدس او بي ام او حتي فيراري لانها لو نزلت مصر مش هتستحمل يومين و هتفكك من بعضها.
7- واخيرا التوفيق من عند الله وكل واحد هياخد النصيب اللي ربنا كاتبه وفي ناس كتير اشترت عربيات زي الزفت زي الجيلي مثلا اللي تقريبا انقرضت عشان هيا سيئه جدا وزي السيتروين الصغيره اللي الناس رمتها في الزباله و علي الرغم من كده في ناس حافظو عليها وعربياتهم زي الفل لانهم صانوها و اعتبروها واحده من اسرتهم واهتمو بيها.
ربنا يوفقك و ارجو اني اكون ساعدتك بكلامي ده مش زودت حيرتك و متنساش بعد ما تختار اي عربيه صلي استخاره عشان ربنا يكرمك و يوفققك لما في الخير ان شاء الله.
-
مفيهومش تكييف يا معلم و حتلاقي بردوا فيهم عيوب
علي العموم انا مش عراف اسعدك ازاي والله بس لو محتاج اي سؤال اتفضل و انا اجاوبك :)
Content Relevant URLs by
vBSEO 3.6.0 PL2