كله يدخل ويقول هو يعرف إيه فى المشروع الجامد دا ....
السلام عليكم ورحمة الله وبركاته
أزيكم ياأحلى واجدع واجمد أعضاء فى اشد منتدى عاملى على ساحة منتديات السيارات , كل سنة وأنتو طيبين جميعاً ويارب سنة جديدة سعيدة عليكم وعلينا جميعاً , ويارب دايماً كلنا متجمعين وفى أجمد صحة وأحلى حال.
المهم مش عاوز أطول عليكم بقا وهادخل فى الكلام على طول وهو مشروع قديم ومتكرر بس برضو انا حابب أعرف كل حاجة فيه لان بفكر جدياً فيه أنا و واحد زميلى اوى.
هو مشروع مغسلة سيارات طبعا المشروع قديم ومتكرر بس معلش استحمولنى شوية لان انا من البحث واللف عرفت اولاً إن مختصين بيع المعدات الخاصة بيها بيكونوا فى شارع الجمهورية - وسط البلد.
طبعا قبل اى حاجة لازم يكون فى اتنين صنايعية فنانين وايديهم تتلف فى حرير وكمان المكان يكون تمام التمام دول ربنا يكرم وأن شاء الله مجودين.
طبعا المعدات هتكون ( موتور ماية + كمبريسور هوا + ماكنسة خزان = مغسلة سيارات ) طبعا بالاضافة للمواد بقا الخاصة بالتنضيف صابون وفوط والكلام دا
بس فى حاجة كمان بقا وانا بعمل سيرش ع النت اتكعبلت فيها وهو اييييييييييييييه بقا.
- الغسيل بالبخار -
عاوز بقا اعرف دا إيه نظاموا وهل فعلا أمن على السيارات اللى هتتغسل فعلا ولا زى ماسمعت ان ممكن يكون ليه أضرار على دهان السيارات وفعلا هل هو ممكن يكون أجمد من الغسيل العادى ولو هو فعلا أجمد يعنى عاوز أعرف إيه مميزاته وإيه عيوبه وفى ألاقى ألاماكن الخاصة بالمعدات الخاصة بيه والمواد الخاصة بالغسيل وبيكون تكلفتهم حوالى كام لان انا بعمل بحث وقعت فى شركة على النت أسمها msk بس طبعا شركة واحدة لا تكفى وكمان دى مقرها خارج حدود وأطار محافظة القاهرة تقريبا بدمياط الجديدة يعنى علشان افكر اروح واجبها ولا اعمل صيانة فى وقت من الاوقات ولا حاجة اخد يوم ولا يومين مثلا.
معلش أنا عارف ان برخم وبطول عليكم بس معلش أخوكم بقا وبيستنجد بيكم.
مستنى ارائكم وكل معلوماتكم وان شاء الله هيكون فى عروض خاصة بأجمل اعضاء وكمان عروض خاصة بمناسبة الافتتاح بس ربنا يكرم واجمع أكبر قدر من المعلومات ونحسب كل حاجة بخصوص الموضوع.
