تجربتي الأولي والأخيرة مع "خير زمان"
من كام يوم نزلت روحت خير زمان في فيصل وقلت اشتري منه شوية حاجات
اشتريت لحمة مفرومة هما الي بيفرومها
اشتريت رز من تعبئته
اشتريت شوية حاجات اخري كتير والحمد لله مالوش دخل فيها
وانا علي الكاشير بحاسب وبطلع الحاجة من العربية (العربية الCart بتاعة السوبر ماركت) لقيت كيس ارز مفتوح ونزل نصه علي ماكينة الكاشير
المهم الأخ علي المكنة نادي علي واحد عامل وقاله غير الكيس دة
كملت الحساب وفي الأخر لقيت العامل جايب كيس مربوط والمفروض فيه كيس الرز
بعد ماخلصت وبراجع الريسيت لقيت اسبراي Space Toon ب25 جنيه
قولتله دة غالي قوووووي اسبراي مافيهوش رشتين وانا اساسا جايبه علشان عليه شخصيات سبيس توون (مودي ومودا - بنتي بتحبهم اوي) فقولت ارجعه وابقي اجيبلها صورهم احسن
المهم روحت وطلعت الحاجة البيت
تاني يوم وانا في الشغل المدام بتتصل عليا وبتقولي انها عملت اللحمة المفرومة لقيتها فيها عضم او فيها قرقوشة المهم ان اللحمة لا يمكن تقدر تاكل منها 1 جرام
ولما روحت اتفاجأت كمان ان المدام بتقولي كيس الرز الي كان في شنطة لوحدة دة كيس مفتوح ويعتبر نص كيس رز
روحت واخد ديلي فسناني وطاير علي المحل "خير زمان"
نسيت اقولكم اني لما رجعت الأسبراي بتاع سبيس توون خدوا مني الريسيت عشان يتعمل بيه مرتجع
فلما رجعتلهم سألوني علي الريسيت receipt قولتلهم ماهو عندكوا
المهم الراجل الي هناك كان متعاون جدا وراح مطلع كل الhistory بتاع المكنة في التاريخ والساعة الي انا قولتله عليهم
لقي طبعا الrecord بتاع اللحمة والرز
المهم انا كنت طبعا واخد معايا الحلة بتاعة اللحمة كدليل وعينة وعامل حسابي علي خناقة هناك
دوقته اللحمة (طبعا عمل زيي وراح 0000000 لفظها قبل ما تنزل حلقه)
وقولتله فاكر حضرتك كيس الرز الي كان مفتوح - بأمارة لما قولتلك تحب تاخد شوية شعرية كمان - فاكر ؟؟
قالي اااه
قولتله حضرتك بردو اديتوني علي قفايا وجبتلي نفس النص كيس تاني في شنطة جديدة
المهم ادالي فلوسي حق اللحمة
غيرلي كيس الرز بواحد تاني وقعد طبعا اقلب واعدل وارج فيه كأنه دوا كحة
وروحت علي كدة
لسة امبارح كنت قاعد بتغدا لقيت المدام راحت مفجرالي قنبلة تانية
قالتلي ماتجبش رز تاني من خير زمان
قولتلها : ليييييييه تاااااااااني ؟؟؟؟؟
الرز مخلوط بسكر واضطريت تنقيه رزاية رزاية وتغسله 100 مرة لحد لما دوبت كل السكر الي فيه
طبعا كان في حل اخر وهي انها كانت تزود شوية لبن ويبقي رز بلبن ونبقي وفرنا السكر
بصراحة انا كنت طنشت علي موضوع اللحمة والخم بتاع كيس الرز وغلو الأسعار
لكن كمان الرز يبقي عليه سكر !!! صحيح هو السكر مش رخيص عشان اقولك بيغش الرز سكر لكن دة انا اعتبرته اهمال او استهتار او عدم خبرة او اي مسمي اخر غير اني اكون بشتري منتج من محل
ياريتني كنت روحت جيبته رز سايب ووفرت اكتر من جنيه ونص في الكيلو
انا حبيت احذر من محل "خير زمان" وياريتهم بقي يسيبوا زمان في حاله لأنهم لا علاقة لهم بزمان ولا الحاضر ومحل مسخ كدة لا هو موفر ولا هو عادي وبصراحة كانت تجربة سيئة ومش هكررها تاني ومن خرج من داره اتقل مقداره وانا متعود بجيب من سوبر ماركت جمبي كل حاجتي والناس عارفني هناك وفوتكوا بعافية
والله المستعان
،
،
