الموضوع: انا هتجنن ايه حكايه كيو نت يا جماعه

المشاركة الأصلية كتبت بواسطة mostafa3000

الموضوع دة من زمان اوي بس بصورة اخري
ايام ما كنت في اعدادى سنة 83
بس كانت بطريقة القوايم يعني يديك ليستة فيها 10 اشخاص والمفروض تبقي رقم 10 وتبعت لرقم واحد عشرة جنية بالبريد وكل ما تدخل ناس ترتيبك يعلي لحد ما تبقي رقم واحد والمفروض الناس تبعتلك
وهلم جرا

دي النسخة القديمة من النظام اسمها "نظام بونزي" ponzi scheme ، وفيه يتم تداول المال بين الناس فقط دون وجود منتج، وجدير بالذكر أن هذا النظام انتشر كالسرطان في ألبانيا حتى حدث انهيار شامل للدولة ودخلت في حرب أهلية سنة 1997 !! حيث استثمر ثلثي المواطنين الألبان أموالهم في هذا النظام مما أدى لانهياره (وهو النتيجة الحتمية في مثل هذه النظم)

لهذا نظام بونزي تم تحريمه وتحريمه في جميع دول العالم.

للاحتيال على هذا التحريم، قامت بعض الشركات بإدخال سلعة وهمية وتداولها بنفس نظام بونزي، وهو ما يسمة بالنظام الهرمي "Pyramid Scheme"، يعني بدل مايطلب من المشترك 10 جنيه، يقول له اشتري أستيكة بعشرين جنيه (مثلاً). ومن أمثلة هذه الشركات "بيزناس" في الماضي.

والنظام الهرمي أيضاً تم تجريمه في كل دول العالم المتقدم ودول العالم النامي (كسريلانكا وبوتان) بل ودول العالم النايم (رواندا) .. ويتم التعرف على النظام الهرمي من قوانينه، وباختصار أي نظام يشترط على المشتري الاشتراك في سلسلة التسويق، والنظام الذي يشترط على المسوق أن يشتري (لازم تشتري عشان تكون مسوق ولو اشتريت لازم تكون مسوٌّق) ... وتقريباً كل الشركات التي تدعي أنها شركات للتسويق قائمة بهذا النظام (اشتري لتسوق، ولو اشتريت يتم تسجيلك كمسوق).

انا رحت زمان لشركه بيزناس و ما ارتحتش اني اكون شغال في التسويق لمنتج تعبان
كان عباره عن سيديهات كورسات و كانت ب 700 جنيه تقريبا

المشاركة الأصلية كتبت بواسطة TaoTao

موضوع كيونت أنا درسته من كافة جوانبه، معاملة الشركة تم تحريمها من جميع دور الإفتاء في العالم العربي ولا يوجد أي تضارب في الفتاوي (مافيش فتوى واحدة معتمدة تحلل التعامل مع كيونت أو أي من أمثالها).
الشركة نظامها هرمي وفقاً للقوانين الدولية المعتمدة وغير مسجلة في أي من منظمات البيع المباشر الدولية (يوجد تسجيل لها في منظمتي بيع مباشر محليتين في ماليزيا وسنغافورة فقط وهذا لأن الشركة ملتزمة بسياسات وقوانين مختلفة عن القوانين التي تعمل بها في باقي الدول)
موضوع الثراء الفاحش والفيراري .. اتحداك !! كل اللي بيتقال في البريزنتيشن كذب وهراء هاتسمع كتير حاجات زي: (أنا سمعت عن ليدر عمل كذا، أنا شفت الشي بندانت بتعالج جدة واحدة صاحبتي من السكر، خالتي من ساعة مالبست الشي بنادنت استغنت عن علاج الروماتويد، أنا شبكتي فيها ناس من أمريكا وبريطانيا وتركيا وكندا، .......) كل ده كذب وكلام عامل زي الأساطير لو أعملت فيها عقلك لايمكن تصدقها.
اللي بيعمل فلوس في الشركة دي بيكون ملزم إنه يسافر كل كام شهر لاجتماع أو حدث (على حسابه الشخصي طبعاً) في ماليزيا أو تايلاند أو الفلبين، بيصرف هناك أغلب ما كسبه هنا !!! يعني بيقصقصوا ريشه بمعنى أوضح.
بعد التحريم الصريح لدار الإفتاء، لن تجد من يشترك في هذه الشركة (تخيل أنك تحتاج لتسجيل 12 فرد على الأقل لمجرد استرداد 750 دولار اللي هما سعر منتج مالوش فايدة !! هل باستطاعتك أو في ذهنك 12 شخص ممكن يشتروا ويكونوا مسوقين في نفس الوقت؟ وخللي بالك إن اللي هايدخلك الموضوع الاغبر ده هايطلب منك تستهدف أفراد عائلتك في الأول !!!!!!!!!!!!!
+١١١١١ كلام رائع
حضرتك حكّم عقلك واحكم بنفسك .. الموضوع لا يحتاج إلا لفطرة سليمة لتتبين صحته من خطأه (وهي نفس النتيجة اللي حضرتك توصلت لها من سنتين) موضوع الفيراري ده زغللة عينين وأساطير الأولين فقط لا غير.