الموضوع: لله الحممد - عملت حادثة وابني نجا بمعجزة

السلام عليكم
باختصار كنت باقرا في موضوع "عملت حادثة قبل كدة" هنا في المنتدى...ورغم أني مومن ان لا طيرة ولاهامة ولا صفر كما جاء في الحديث..بس حسيت بانقباض ...المهم
الطريق كان بين مدينتين ريفيتين في محافظة ريفية. كنت راجع من مشوار ومعايا مراتي وابني عمره سنة بالضبط.مراتي كانت شايلاه وقاعدة على يميني. المهم طريق زي ده يادوب ينفع حارة واحدة وبيستخدم كحارتين رايح جاي. على اليمين مزارع وعلى الشمال مصرف عريض وعميق. بعض المزارع اللي على اليمين بتكون " مساطيح" بتظهر فجأة وبشكل منحدر بعمق 5- 10 متر مفاجىء بزاوية قايمة.
الحادث: كنت ماشي في طريق مستقيم - ابني كان بيلعب في الفتيس شوية في الموبايل و هكذا. رمي الموبايل في يمين التابلوه - مديت ايدي اجيبه و فجاة لقيت نفسي على حرف الطريق وبالتحديد على الحافة ويميني مسطح بعمق حوالي 8 متر. مراتي صرخت فجأة حاولت الم العربية شمال لكن العربية رمت شمال وبعدين في البوص وبعدين في قلب المية. العربية غرقت تماما وانا جواها . ماتسألونيش طلعت ازاي وبادور على مراتي وابني . طلعت لقيت مراتي عايمة وسمعت صوت ابني بيعيط. فضل الله وستره ونعمته انه مانزلش الميه اساسا وكان نايم على جنبه اليمين والبوص سانده من قدام. الحمد لله طلعنا بشوية كدمات وجروح بسيطة وهوه يادوب البوص خربشه شوية. قسما بالله ما اعرف طلع ازاي ولا امه تعرف لانها اصلا كانت متبته فيه ومارمتوش زي ما البعض تصور. لكن ربنا كريم.
الدرس المستفاد:
لا تغفل عن الطريق ولو ثانية واحدة
الأطفال يبقوا في الكرسي الخلفي عشان مايشتتوش الانتباه
ماتمشييش على طرق كتيييييير في مصر
وقبل كل حاجة: خليك عندك ايمان في رب كريم
انا عن نفسي باكرر حديث اتمنى ان الناس كلها تفهمه
صنائع المعروف تقي مصارع السوء
وانا اصلا لا ازكي نفسي بس باقول يمكن يكون ده فرق
.....على فكرة العربية كانت لادا 2105 موديل 95
السقف اتطبق من قدام والقوايم والعربية طبعا نزلت في المية و كانت دايرة والابواب باظوا بس الكبوت والعدة والشنطة تمام .
ادعوالي بالخير .....واتمنى ان كله يستفيد من الدرس بتاعي
ارحب بكل تعليق
والحمد لله اولا وأخيرا