تقرير صيانة ال 1000 كم في مودرن سيرفيس - الانترا 2012
الحمد الله ,
تجاوزت حاجز ال 1500 امبارح .. و بقالي اسبوع بحاول اعمل صيانة ال 1000 لكن الحمد الله لظروف مرض اخي الشديد .. كانت كل مشاويري يوميا الى مستشفى النزهة الدولي الي العمل او البيت او نقابة الاطباء في القصر العيني .. فعملت 1500 كم امبارح في اقل من اسبوعين من استلام العربية.
حجزت ميعاد في التوكيل في ابو رواش يوم الاثنين بس مقدرتش اروح, و كلمتهم قلتلهم لازم يعني في التوكيل ؟ قالي "يفضل" .. فلتله لأ ... يفضل دي عندكم !!!
خصوصا ان ده تغيير زيت و فيلتر و تربيط عفشة و CHECK على العربية و اي شكاوي مني .. و الحمد الله معنديش.
كنت بروح مع صديق لي يمتلك عربية بيجو الى مركز اسمه MODERN SERVICE بعد السندباد على طريق الاسماعيلية الرئيسي (الاسماعيلية - القاهرة) و من فترة عديت لقيتهم حاطين يفط كتيير هيونداي و مركز خدمة معتمد و مش عارف ايه .. قلت بس .. اهرب من زحمة القاهرة و بما اني كدة كدة في مساكن شيراتون علشان المستشفى ... يبقى انجاز
بصراحة لا حجزت ولا عملت حاجة .. رحت كدة طبيت عليهم الساعة 3 , قابلني مهندس استقبال ظريف جدا, خد مني العربية و دخلها جوة .. قالي عايز تعمل ايه .. قلتله صيانة ال 1000 بس ...
قالي دي حتبتقى تغيير زيت و فلتر و تربيط عفشة و شيك على العربية و المصنعيات مجانا لو انت بضمان غبور ... قلتله نتوكل على الله ... قالي معندكش شكاوي من العربية في حاجة ؟ قلتله لأ .
قالي تحب تغسلها من جوة و برة ؟ قلتله بصراحة مستعجل ... مرة ثانية
الورشة او المركز منظم الى حد ما و نضيف . استراحة العملاء صغيرة بس نضيفة و فيها شاشة LCD بس صعب تتابع عربيبتك لانها في دور ارضي مش باين حاجة من برة اوي .. و بيجيلك المهندس كل شوية يقولك ايه الاخبار و فيه بوفيه للمشروبات.
العربية الحمد الله مخدتش نصف ساعة حتى ... 3:25 كانت العربية برة جاهزة
و تم عمل الصيانة و زيت شيل هيلكس الترا 5w-30
اجمالي التكلفة كانت
260 زيت
21 فلتر زيت (استغربت انه رخيص اوي .. في الباليو فلتر الزيت كان ب 65 جنيه)
0 جنيه مصنعيات
دخلت العربية لقيت الرخصة في الشماسة, و كرسي السواق متكيس و الدركسيون متكيس و فيه دواسات كارتونية.
شكر ت الراجل و توكلت على الله.
يعني اقدر اقول بنسبة 90% كانت تجربة ايجابيبة ... بس برده دي صيانة سهلة يعني الحمد الله.
---
بالنسبة للعربية ...
اول ماستلمتها كنت طبعا مقلق من كل حاجة و من اي حاجة و موسوس ... اول عربية سيدان و اول عربية اوتو و اول عربية 1600 ... اول حاجات كتير يعني :)
الحمد الله تعودت عليها نسبيا الى الان .. و هي اول فئة اوتوا بالمناسبة.
الى ان مش شايف اي عيوب جوهرية غير الكاوتش ... صوته سيء جدا على الطرق الي مش مردومة كويس ... و بفكر قريبا جدا اني اغيره.
العزل ممتاز - صوت المحرك هادئ حتى 3500 لفة - الكاسيت صوته ممتاز (6 سماعات) و بصراحة كنت متوقع اداء اقل من ذلك بكثير - المحرك تسارعه جيد جدا رغم اني بكره الاوتو في الطلعات - بس بحسه مش من النوع الي مش بيحب انك تحرق على الغيار عكس الفيات مثلا.
العفشة وسط ... يعني مش ناشفة زي السيراتو و السول بصراحة ... و مش طرية اوي زي الكورولا كدة بس بالنسبة لي مريحة جدا عن السيارة السابقة ... بس خلي بالكم ان غبور بيه كان عاملي الكاوتش على 39 !!!! و هو المفروض يبقى 32 .
الثبات مقدرش احكم عليه اوي لاني متهورتش كتير .. بس الي اقدر اقوله .. اني مش بحس اني ماشي على 120 - 140 نهائي .. لحد 160 اخر حاجة جبتها , حسيتها مش تعبانة نعائيا او بتنطط مثلا .. الحمدالله.
الحمد الله اختيار جيد الى الان ... و ربنا يكرمنا بقى في باقي المشوار و الاقساط الي تقسم الظهر LOL :)