فاكر اللجان الشعبية .. أحكلنا حصل معاك فيها اية ؟

**AboELsoud** · 19-01-2012 11:53 PM

الخطه كانت ببساطه احنا الشباب قاعدين تحت العماره بالعصيان و الطوب (عشان شريط المترو جنبنا ) و معانا صفاره

لو حصل اي حاجه نصفر يقوم نازلنا واحد من جيراننا اللي معاهم طبنجات

احلى حاجه انه قبل ما الرجاله يطلعوا و يسيبونا قعدوا يكلموا شويه و انا كنت معاهم المهم واحد منهم قال انا هاطلع الطبنجه اللي كنت مرخصه التاني قال و انا مجزها التالت و انا كمان هطلعها و اجهزها و الرابع و هكذا لحد اما وصل عدد المسدسات لـ7 مثلا ( احنا اتفقنا قبل كده انهم ظباط جيش فالموضوع عادي معاهم ) :)

قام ايه واحد منهم قال بس انا معنديش طلق ( رصاص) قام التاني ولا انا و هكذا :)) لحد اما اكتشفنا ان مفيش غير واحد بس اللي عنده رصاص بس الحمد لله وزع عليهم و الدنيا بقيت تمام :))))))

**a7madramadan** · 20-01-2012 05:10 AM

أيام ربنا ما يعيدها ......وليها قطبين :
الشارع عندنا فيه شباب مدمنين كانوا فالحقيقة انا كنت بابقى فاتح البلكونة و قاعد صاحي و جنب باب البيت سكينة مطبخ و عصاية ثخينة كنت باسيبها فالعربية وانا طالع على مطار برج العرب للأمان ... و لما باسمع الناس كلها بتجري لسبب او لآخر باقوم واخد العصاية ونازل ... ومانزلتش غير مرتين يعني والشباب قاموا بالواجب فالأولى والثانية طلعت بلاغ كاذب وجرينا على الفاضي :d و كانت الأيام كلها قهوة وشاي باعمل لنفسي شاي وانزل للشباب ابريق شاي و كام كوباية كده بس كانوا ولاد لذينة كانوا بيجيبوا خشب ويولعوا فيه ويعملوا قعدة سفاري جنب عمارة فاضية كده (وطبعا القعدة لا تخلوا من ظبط للمزاج) بالاضافة ان مداخل الشوارع كلها كانت مسدودة من الساعة 1 بكاوتش عربيات عشان الموتوسيكلات الي أشيع انها مليانة حرامية

والشق الثاني لما نزلت بالعربية مرة كده قبل التنحي بيومين او ثلاثة وقفت في لجنه شعبية بس صيع وحرامية واكتشفت انهم عاوزين يقلبوني وحدفوا بيضه على القزاز الأمامي فجريت بسرعه و خبطت واحد فيهم خبطة خفيفة كده بس كلهم كانوا مبرشمين وربنا عداها على خير ومافيش خسائر لا منهم ولا عندي الحمد لله

بس فالأيام دي ما افتكرش الحقيقة غير يوم التنحي .. كنت في بيت صديق ليا وشيع لنا الخبر قعدنا مش أقل من ساعة في بكاء من كتر الفرحة وحجم الخبر و قعدت لثاني يوم بالليل مش عارف انام فضلت مع أصحابي نصف اليوم فالشارع ونصفه الثاني على النت ..... بس الفرحة ما تمت وهتكمل ان شاء الله قريب ...

**a7madramadan** · 20-01-2012 05:16 AM

وحكاية ثانية حصلت في سابا باشا عند بيت قرايبي ... بيحكولي كان في رجل ضخم عنده حوالي 45-50 سنة نزل ببندقية صيد و ابنه نزل بسيف من الحاجات الآسيوية بتاعت الأفلام Katana و الناس كلها كانت جنب محل بلاي ستيشن فالشارع وسمعوا واحد بيصفر عشان في حرامية غالبا فالراجل العجوز قام قــايل آاااااه قلبي و قام طالع جري جامد لبيته بالبندقية وسحب ابنه معاه والعيال نصها استخبت في محل البلايستيشن والنصف الثاني جروا يشوفوا في ايه طلع نداء كاذب ومافيش حاجة .....

وحاجة تانية تضحك في نفق محمد نجيب سيديبشر كان في واحد (فلول او بلطجي او بقايا داخلية) كان كل شوية بيقوم ضارب رصاصة حي او هواء جنب النفق والناس كللللللها تقوم جارية علي المكان ماتلاقيش حاجة واتفقوا ان الموضوع في شيء مريب فماصفروش لبعض و اتفقوا بعد شوية يجروا في صمت على مدخل النفق فالراجل ضرب طلقة و وراها طلقة ثانية وثالثة وفجأة لقى الشارين اتقفلوا عليه ناس من الناحيتين ومالحقش يستخبى وسط حد فيهم وأخد علقه :D