حياتى مع الافيو 2012

**heshhesh** · 19-01-2012 03:08 AM

السلام عليكم ورحمه الله

حكايتى هيه ايه بقى

انى فكرت اجيب افيو والصراحه كان رأى مش صح ومنصحش حد بيها لانى جايبها اوتوماتيك ب 88000 وكان
ممكن بالسعر ده او اعلى شويه اجيب حاجه كويسه ولكن قدر الله وماشاء فعل

استلمت العربيه وكانت تمام وزى الفل مفيش مشكله بس حسيت انها خفيفه اوى بعد 100 كم
سألت قالو عشان هيه عاليه عن الارض شويه فهيه كده
قلت ماشى احنا عماتا مش فى سباق يعنى

يدوبلك كملت معايا 2000 كيلو ابتدى صوت التزييييييييق من وراء
وبقى مزعج جدا وشويه بدأ يخف شويه كده بس مرحش برده موجود وصوت مزعج جدا جدا جدا جدا
عرفت من المنتدى انها مشكله عامه قلت لاما اعمل صيانه ال 5000 اروح اشوف الموضوع ايه

بعديها لقيت الفرامل خفيفه اوى قلت معلش استحمل لجد معمل صيانه ال 5000

المهم رحت من شهر بالضبط لمركز معتمد فى م نصر فى شارع زاكر حسين

قلتله على المشاكل ديه كلها

قلى بالنسبه للفرامل هسحب هواء كده واشوف التيل قلتله تيل دلوقتى قلى اشوفهلك قلتله ماشى
قلتله والتزييقه قلى هشوفهالك هشحملك البطاحات ومش عارف ايه

المهم قعت لغايه مخلص الصيانه

استلم العربيه بقى مانا صابر الفتره ديه كلها

اولا التزييق مرحش فيه ايه ياعم المهندس مرحش ليه
اصل الفرش اللى انت مركبه بيحك وراء فى الكنبه وبيعمل التزييق ده طبعا اى كلام زفت بيريح بيه ضميره اللى مش موجود اصلا

الصراحه اتختقت جدا وقلت المهم الفرامل متظبطه ومشييت

بعديها باسبوع بالضبط

اول مالعربيه بتعدى ال 100 كم / ساعه اول مضرب فرامل بترعش رعشه السنييييين فى الدركسيون

اتخنقت جدا جدا جدا بقى قلت مش هينفع كده وكل ده العربيه عامله كام 5500 كم

والفرامل كمان برده اتنيلت تانى مش بتمسك خالص وكنت هعمل كذا مره حادثه مره واحد وقف قدامى يجى ب 10 م وانا كنت ماشى 60 فرملت العربيه زحفتلها على الاقل 6 كم عقبال مربنا كرمها ووقفت
هيه بتهدى لكن بتاخد فتره طويله اوى عشان تقف

وديتها بقى يوم الجمعه اللى فات لفرع رابعه مدينه نصر

قلتله على مشكله الفرامل والعفشه والرعشه

قلى هعملك كله معادا العفشه ليه ياعم اصل النهرده زحمه ماشى المهم الفرامل عشان منروحش فى داهيه

راح مطلع واحد معايا يجرب الفرامل بعد ال 100 كم

ورجعنا المركز تانى

قلى هنغير طنابير قلتله من اولها كده
قلى فى الضمان متقلقش قلتله مش الفكره بس من اولها كده وانا لسه عامل بيها 6000 كم
قلى بس هعملهالك متقلقش

المهم راح عمل الطنابير غيرهم وجالى فى النص كده قلى التيل الامامى اتاكل وهتحتاج انك تغيره كمان 2000 كم والاحسا تغيره دلوقتى قلتله ياعم غيره - سبحان الله تيل امامى بعد 6000 كم -
المهم قلتله غيره المهم تتظبط

المهم خلص كله وقلى روح ادفع بقى حق التيل بس رحت دفعت 205 ج قلت مش مشكله

استلمت العربيه وقلى جمله كده فى النص قلى هو انت قصدك مبتمسكش لو وقفت مره واحده قلتله اه بتزحف جامد رغم انى ببقى ماشى سرعه قليله قلى طبيعى لانها مفيهاش abs قلتله ماشى

وطلعت على الدائرى بقى اجرب الحمد لله الرعشه راحت مع الفرامل بعد 100 وفرحت جدا جدا جدا
والفرامل بقت بتمسك الحمد لله كويس جدا
فاضل بقى مشكله العفشه قلت ابقى اروحلهم الجمعه الجايه

الغريب جدا جدا بقى

ان للاسف النهرده الفرامل رجعت بقى مبتمسكش تانى زى ماستلمتها من المركز مش عارف اعمل ايه الصراحه انا بقيت امشى براحه وبدعى ان محدش يقف قدامى

عماتا انا منصحش حد بالافيو خصوصا لو هيجيبها زى اوتوماتيك ب 88000 لان كده بجد ممكن يجيب حاجه تانيه احسا

اما لو مانيول اول فئه ممكن يجيبها

ديه وجهه نظرى :)

**Dr/ P.K.Sh** · 19-01-2012 03:52 AM

حاول تتعايش

**Hmatchy** · 19-01-2012 05:22 AM

لا حول ولا قوة الا بالله
معلش ربنا يعينك هى الافيوا عربية رخمة فعلان
عموما ربنا يسترها معاك
بس انا عاوز اسئلك سوئال هيا ازاى الفرامل مش بتمسك و انت بتقول العربيه بتزحف؟؟؟؟
اصل كدة ممكن يكون الكاوتش هو اللى بايظ و ممسوح و انت بتقول انك عامل 6000 كيلو فا يا ريت توضحلنا قصدك اكتر

**أشرف العدوي** · 19-01-2012 08:53 AM

بالنسبة لصوت التزييق
ما تضيعش وقت و كل شوية تروح مراز الخدمة علشان الصوت ده مش هيروح

انا علشان اتخلص من الصوت ده و صوت التخبيط غيرت العفشة كلها ما عدا البطاحات ( و ماجبتش حاجة اصلي كله ctr و المساعدين kyp ) و الحمد لله الوضع بقى غير الأول خالص مافيش اي أصوات نهائي

فحاول تتعايش
لكن لو عندك وقت فراغ ممكن تروح كنوع من الغتاتة مش اكتر علشان انا واثق ان الصوت ده مش هيروح طبقاً لتجاربي و تجارب معظم الي معاهم افيو

**mohamedaghali** · 19-01-2012 09:07 PM

معاك حق هيه عربيه تقفيلها سىء جدا انا لسة شارى واحدة لمراتى تقفيل الصاج سىء لدرجة انهم دخلوها المصنع تانى وبرضو عيوب التقفيل مارحتش تماما بس نعمل ايه ماهو مافيش حاجه كويسه فى رنج الفلوس ديه غير التقفيل المصرى اللى زى الزفت وبرضه الفرامل بتاعتها مش اد كده انا مضايق جدا لانى حاسس انى رميت الفلوس فى الارض خلى باللك صوت التزييق ده طلع عيب فى تقفيل الصاج لان ده اللى حاولوا يعالجوه فى المصنع

**drmagieed** · 20-01-2012 12:41 AM

المشاركة الأصلية كتبت بواسطة waelmohamed201

انا متهيألى ان صوت اتزييق ده بيزيد فى الشتاء بس أعتقد اما الصيف يدخل بإذن الله حيروح
انا بقا عايز أحكيلكم على تجربة واحد زميلى مع الأفيو
هو معاه أفيو 2009 وكانت العفشة ناشفة جدا وهو كان ساكن فى فيصل وانتوا طبعا عارفين شوارع فيصل
المهم صاحبى ده نزيه شوية يعنى الحمد لله حالته ميسرة وربنا يزيده
راح مركز صيانة واشتكى من موضوع العفشة فالمهندس رد عليه وقاله ان دى مشكلة الأفيو
المهم الراجل المهندس قالوا احنا حنظبط شوية حاجات فى العفشة وأعتقد انه غير مستلزمات العفشة بحاجات تانية كورى انا مش متذكرها
وصاحبى بقا حب يكمل نزاهته إشترى 4 فرد كاوتش جديد بريدجستون ياباتى بالجنوط بس مقاس مختلف عن مقاس عجل العربية الأصل يعنى مقاس عجل الإيو 14 - 60 - 185 هو إشترى 15 - 50 - 195 بالجنوط
طبعا انتوا مركبتوش العربية دى بعد ما غير الحاجات دى عشان تعرفوا الفرق
عايز أقولكم يا جماعة انى ركبت عربية مختلفة تماما عن الإيو بالرغم من انها أفيو بس خاجة تانية فى كل حاجة الثبات - العفشة -الفرامل المهم ربنا يباركله فيها

علي فكرة مقاس 15 ده مقاس من مقاسات الأفيو حسب الشركة المصنعة وتلاقيه في درج التابلوه من جوه

**Hmatchy** · 20-01-2012 06:22 AM

المشاركة الأصلية كتبت بواسطة heshhesh

الفرامل بتمسك ياباشا بس بتاخد وقت طويل وتزحف عشان تقف عشان لو لا قدر الله حاجه وقفت قدامك مره واحده

والكاوتش انا كنت فاكر زيك كده وتخيل غيرت الفردتين اللى قدام بكمهو برده مفيش فايده

عماتا الحمد لله بس ربنا يسترها بقى لحد كده :)

طب ما يمكن مفيش فرامل بتمسك العجل ورا و ممكن تكون دى المشكله اللى بتخلى عزم العربية كلو على العجلتين اللى قدام بس

-

الموضوع: حياتى مع الافيو 2012

LinkBack

أدوات الموضوع

عرض

حياتى مع الافيو 2012 - انشر الموضوع فى :

-

-

-

المواضيع المتشابهه

مشكله فى كاسيت الافيو 2012

bmw 118i 2012 or sicrocco 2012 or eos 2012 audi a3 2012-مناقشة

مقارنة بين الافيو والبيكانتو الخليجى 2012

مشكله فى عربيتى الافيو 2012

الافيو 2012 هتنزل امتى ؟

الكلمات الدلالية لهذا الموضوع

المفضلات

المفضلات

ضوابط المشاركة