تعليم قيادة السيارات ولا الممارسة والخبرة ؟

السلام عليكم ورحمه الله وبركاته
بصراحه يا جماعه المنتدي أخر روعة ومفيد جدا
اخوكم عضو جديد معكم وان شاء الله سوف أشتري سيارة جديدة خلال شهر
ولكن
أنا مبعرفش أسوق أوي بمعني أني أعرف أطلع بالسيارة وأعطيها جميع غيارتها بس تنقصني الممارسه لعدم وجود سيارة
يعني من الأخر كدة بسوق بنسبه 40% كويس ومعايا رخصة
السؤال دلوقتي هو أروح أتعلم القيادة في مدرسة تعليم ؟ ولا أستني وأتعلم علي السيارة اللي هشتريها واحدة واحدة؟
وهل في قواعد عامة للقيادة أو ممكن أستفيد من من خبراتكم في مجال القيادة ( أرجو ألا تبخلو علي بخبراتكم )
وجزام الله عني خير الجزاء

أهلا بيك منور يا خالد :)

المدرسة فى الأول أفضل طبعا عشان يكون معاك واحد يدربك و بعد كده هاتكتسب الخبرة مع الوقت إن شاء الله :)

أهم حاجة تعلمك السواقة هى التركيز مع أى حد سايق و إنت قاعد بجواره :) ده التعلم بالملاحظة :)

أهلا بك يا خالد ومنورنا ان شاء الله

وفعلا زي ما قالك محمود المدرسه في الاول طبعا بتيجي بفايده انك هتلاقيك عرفت حاجات ممكن تكون مكنتش واخد بالك منها او مش عارفها وهو ده فايدتها وان شاء الله موفق بإذن الله

التعليم الاول....و بعد كده مع نفسك :D

الممارسة هيا اساس القيادة..

لان ما ستتعلمه في المدرسة من قواعد القيادة السليمة ليس له علاقة بما يحدث في شوارع هذه البلد..ولا يوجد من يطبقه

عموما القيادة ليست فقط القدرة على تحريك السيارة ولكن ايضا تركيز و تقدير مسافات وحاسة سادسة و توقع الخ,,,وهذه الاشياء لا تاتي الا بالممارسة..

وبالتوفيق

انا من رايي تشوف سواق تاكسي كويس يدربك احسن و بعلمك ازاي تاخد الملفات و ازاي ترجع بضهرك و الحاجات دي علشان دي روح السواقه .السواقه مش انك تنقل و تجري لاء السواقه اكبر من كده بكتيير و الحاجه الوحيده اللي كل ما بتمارسها بتتعلم منها .
اهم حاجه و انت سايق تبقي عارف عجل عربيتك رايح فين!!!!!!! لو فهمت الجمله دي كويس و حطيتها في دماغك تاكد انك حتسوق كويس من غير اي مشاكل و طبعا الالتزام بالقواعد ممكن يكون نص الشعب مش ملتزم بس اللي ملتزم عمره ما بيجرا ليه حاجه و انت لسه مبتدئ معني كده انك لازم تبقي ملتزم و يا سيدي لما تبقي متمرس ابقي اعمل اللي عاوزه بس خلي بالك ان كل حاجه ليها عواقبها يعني لما واحد يخش في شارع مخالف و يقولك انا عارف انا بعمل ايه و تيجي عربيه في وشه و يخبطها ساعتها مين اللي غلطان؟؟؟؟ ف متحاولش تحط نفسك في وضع يخليك تقول اسف او يخليك تتكلف تصليح عربيتك و عربيه غيرك.
انا مثلا لحد انهارده مهما كان الشارع فاضي لا اكسر اشاره ولا امشي مخالف مش خوف من المرور لا خوف علي ارواح الناس و خوف علي نفسي .و ربنا يكرمك ان شاء الله بس كل حاجه ليها وقتها ما تقولش انا عاوز اجري و كلام من دا الاول تاخدها براحه و بعدين حتلاقي نفسك بعد كده ايدك و رجلك بيتحركو لوحدهم .و الله المستعان

قيادة السيارة عبارة عن توافق عصبي بصري . التوافق ده مش هيجي غير بالممارسة(سواقين الميكروباص والتاكسي ماأعتقدش أنهم راحو مدرسة ولا يعرفوا أصلاً حاجة أسمها قواعد المرور :mrgreen: )
.يعني مثلا علشان تعرف تركب عجلة لازم تمارس ركوب العجل ولو حد قعدمن هنا لغاية بكرة يشرحلك أزاي تركب العجلة نظري مش هتعرف غير لما تجرب .
:idea: بإختصار وبدون تعقيد خذ القواعد الأساسية من أي جهة تدريبية وإشتغل مع نفسك (يعني مثلاً أبتدي أعمل مشواير بالعربية الصبح بدري قوي)حبه حبه هتلاقي نفسك بتعرف نسوق.

:oops:

اكيد المدرسة اولا علشان تاخد القواعد والاسس والازمة للقيادة وبعد كدة ممكن تجرب بنفسك لوحدك فى مشاوير قصيرة وغير اوقات الذروة ومتحاولش تمشى فى شوارع زحمة وضيقة فى الاول عشان متحبطش.

يا جماعة أنا مش عارف أشكركم ازاي علي الأهتمام بموضوعي وسرعة الرد علية
وجزاكم الله كل خير

سيبك من المدارس أنا رحت مدرسة رع مرتين و اتخنقت مع السواق أحسن حل تتعلم على عربية حد تعرفه و هو يكون جنبيك و يستحسن يكون من النوع إلي بيكسر و إلي بيتبلطق علشان تمشي في مصر أنا اتعلمت على الفيرنا بالتجربة و كان معايا ابن خالتي أصغر مني و معهوش رخصة بس بيعرف يسوق كان بيشجعني مرة ورا مرة أتعلمت بالتجربة

عايز نصيحتى....

أهم حاجة تتدرب عليها إزاى توقف العربية فى الوقت المناسب ...
مش ازاى تمشيها.....

غالبا المهارة دى الناس بتاخد بالها منها بعد أول خبطة أو أول حادثة لا قدر الله.

سيبك من المدارس مش هيعلموك اكتر من اللي بتعرفه
علم نفسك بنفسك زي ما انا عملت
شوف يا عم لما تشتري العربيه خد معاك حد بيسوق وابدا اخرج معاه بالليل بعد الساعه 2 وكل يوم حاول تخرج بدري نص ساعة لحد ماتتعلم وربنا يوفقك و يكفيك شر طريقك

اقتباس:

---

علم نفسك بنفسك زي ما انا عملت
شوف يا عم لما تشتري العربيه خد معاك حد بيسوق وابدا اخرج معاه بالليل بعد الساعه 2 وكل يوم حاول تخرج بدري نص ساعة لحد ماتتعلم وربنا يوفقك و يكفيك شر طريقك

---

فكره حلوه جدا

هو تعليم الاساسيات بتاعه السواقه ضرورى جدا حتى لو ما استخدمتهاش، يعنى لازم تدخل المدرسه تتعلم منها اساسيات السواقه وبعدين طبعا لازم التجريه العمليه فى الشارع بقى ولفترات طويله لحد ما تجيد السواقه، لأن زى الاخوه ما قالوا هنا هى مش مجرد انى امشى بالعربيه وخلاص لأ انا عندى اربع اتجاهات لازم اخلى بالى منهم ده غير الحركه بتاعه الفتيس والدركسيون والاقدام فكل ده بيبقى محتاج تركيز عالى اوى فى الاول لغايه لما تلاقى نفسك بتعمله بدون تفكير.

انا عاجبني كلام الاخ m . و هي دي احسن طريقة جربها معارفي لتعلم السواقة . اما عربيتك او عربية حد تعرفه و يخرج معاك حد يكون بيعرف يسوق . بس ليا تعديل على الطريقة: ما تسوقش انت الاول . راقب صاحبك و هو بيسوق فترة كافية . لو ركزت معاه في طريقة الغيارات و الاشارات و الملفات ح تفاجأ انك لما تقعد مكانه كأنك بتسوق كويس من زمان .

احسن حاجة انك تاخذ حصتين فى اى مدرسة تعليم قيادة وتطلب انك تمشى فى اماكن مزدحمة

اولا : لازم تتعلم فى مدرسة السواقة

ثانيا : لازم تكون حابب انك تتعلم السواقة وفى عندك صبر

لو عملت كده هتتعلم بسرعه ومش هتحس بوقت السواقة تمام

ثالثا : لما تخلص التعليم وتسوق العربية الجديدة لازم تبتدى بالراحة علشان ماتغلطش

وماتجريش لفترة لما تتعود على العربية ووبعد كده هتحس انك بتسوق عادى جداا

وتجرى ومافيش مشاكل بس طبعا بلاش السرعات العالية اووووى علشان خطر جدااا

حاول دايماً تسوق السيارة في طريق مستقيم قدر الإمكان . بعد هذا ضع في حسبانك وجود مشكلتين رئيستين لازم تتغلب عليهم وبعد أن تتقنهم تماماً تبقى بقيت عرفت تسوق كويس ، والناقص فقط إنك تتودك وتبقى أجرأ .
المشكلتين هما : لما تبقى واقف اعتبر مشكلتك الأساسية انك تتحرك بالعربية ، وقصدي هنا انك تتحرك بها بسلاسة وهدوء . في كل الظروف ، على مطلع على منزل على مطب ...الخ
المشكلة الثانية : لما تبقى ماشي اعمل حسابك ان أكبر مشكلة تقابلك انك توقف العربية ، وفق كل الظروف المحيطة بك . يعني تقف بها في وضع سليم ملائم غير خطر .
شفت المسألة سهلة جداً وممتنعة برضة جداً

السلام عليكم ورحمة الله وبركاته

بعد كل الكلام المفيد اللى قالوه الزملاء مش هاقدر أضيف حاجة لكن...

أنا كمان لسه متعلم سواقة قريب واكبر مشكلتين أو موقفين صعبين واجهونى هما (ودى وجهة نظر شخصية بحتة)

أولا: الركن ودى حاجة ضرورية جدا لإنك لما تاخد العربية وتروح بيها مشوار مش هينفع تسيبها كده فى الشارع من غير ما تركنها كويس. عشان كده لازم تركز على تعلم الركن قبل ما تفكر تطلع أى مشوار بالعربية.

ثانيا: اليوترن أو كيفية الدخول من طريق فرعى إلى طريق رئيسى ودى محتاجة مهارة فى الانتقال من حالة الحركة إلى حالة الثبات والعكس وكذلك محتاجة تقدير سليم لتحركات السيارات الأخرى.


حاول تتمرن كويس على الموضوعين دول فى الأماكن والأوقات الفاضية وربنا يوفقك

والسلام عليكم ورحمة الله وبركاته

اقتباس:

---

أولا: الركن ودى حاجة ضرورية جدا لإنك لما تاخد العربية وتروح بيها مشوار مش هينفع تسيبها كده فى الشارع من غير ما تركنها كويس. عشان كده لازم تركز على تعلم الركن قبل ما تفكر تطلع أى مشوار بالعربية.

---

الركن سواء حتركن العربيه بالطول او العرض بين عربيتين بتعمل حاجه ظريفه و بسيطه و هو انك تقف علي بعد نص متر من العربيه اللي حتقف وراها و تكون موازي ليها و نص عربيتك عند نص العربيه التانيه و تبدا تكسر الدركسيون(لما تقف علي بعد المسافه دي عمر عربيتك ما تخبط في العربيه التانيه مهما كسرت) و بعدين ترجع بضهرك و اول ما تحس ان العربيه حتخبط في الرصيف تبدا تلف الدركسيون علي الناحيه التانيه حتلاقي العربيه دخلت مضبوطه و بالتمرين حتلاقيها جات معاك اضبط و تقدر تقلل الماسافه عن نص متر

اقتباس:

---

ثانيا: اليوترن أو كيفية الدخول من طريق فرعى إلى طريق رئيسى ودى محتاجة مهارة فى الانتقال من حالة الحركة إلى حالة الثبات والعكس وكذلك محتاجة تقدير سليم لتحركات السيارات الأخرى.

---

دا بقي لازم تقف خالص و تشوف الطريق كويس و لما تطلع تحاول تطلع بسرعه و تاخد سرعتك مش تطلع براحه علشان ما يجيش حد يخبطك و خصوا لما تبقي علي السريع.و لما تلف شمال تاخد الملف علي الضيق و لما تلف يمين تاخد الملف علي الواسع

السلام عليكم ورحمة الله وبركاته

شكرا يا أستاذ حازم على النصائح المفيدة بصراحة المشكلتين دول كانوا هما العقدة عندى لكن بفضل الله اتحلوا

وكمان الحمد لله مع الميرا ماعدش فيه مشكلة فى الركن :D :D :D

وجزاك الله خيرا

اقتباس:

---

لما تلف شمال تاخد الملف علي الضيق و لما تلف يمين تاخد الملف علي الواسع

---

سوري يا جماعه انا اتلخبط و انا بكتب المفروض لما تدخل يمين تاخده علي ضيق و الشمال تاخده علي واسع .\
و لما تبقي علي السريع المفروض لما تلف اكيد حتلف يوترن علي الشنال ف بتاخد علي واسه برضه علي اخر حاره علي اليمين علشان المفروض اليمين هو للسرعات البطيئه بس برضه لما تدخل تخش باقصي سرعه تجيبها ما ينفعش تاخد اليوترن بسرعه قليله وو بعدين تاخد سرعتك و تنقل علي الشمال عادي بعد ما تبص في المرايه طبعا

اقتباس:

---

شكرا يا أستاذ حازم على النصائح المفيدة بصراحة المشكلتين دول كانوا هما العقدة عندى لكن بفضل الله اتحلوا

---

العفو يا استاذ عزيز دا اقل حاجه المشكله ان الواحد في دماغه قواعد كتير و مهارات كتير بس من كتر الممارسه الواحد بيفتكر انها عاديه و بينساها و يا ريت لو حد عاوز يسئال عن اي حاجه يسالني و انا ان شاء الله اجاوبه.انا كنت باخد حصص سواقه علي حلبه اتودرم بدبي لتعليم القياده الرياضيه و و في حاجات كتير ان شاء الله احاول اجمعها في موضوع واحد للناس

والله يا جماعة أنا مش عارف أشكركم ازاي علي النصائح الغالية دي

المدرسة اولا و يا حبذا لو لقيت فيها نفس ماركة السيارة التى ستشتريها
بمعنى ان انت لو ناوى على شراء سيارة فيرنا مثلا يبقى تحاول بقدر الامكان لو لقيت مدرسة بها هذه السيارة لكى تقوم بقيادتها اولا و التعرف عليها عن قرب و بوجود مرشد او معلم و ده حايديلك فرصة كبيرة من الالمام بها و ابعادها و فراملها و اجهزتها قبل ان تقوم بالقيادة بمفردك
و اخيرا الممارسة هى التى تصقل خبرة القيادة
و كل موقف تتعرض له يعطيك خبرة اكثر و ربنا يوفقك ان شاء الله و مبروك مقدما العربية

ممكن ياجماعه تقولولى اسم مدرسه لتعليم السواقه و نظامها اه فى الوقت والفلوس

هي المفروض الواحد يطلع الرخصة وبعدين يبتدي يتعلم
بأمانه تحيا مصر
انا بردة واحد صاحبي عمل كدة
بس بجد نصيحه اخوية يا اخ خالد اتعلم الاول كويس جدا
وحاول تمشي بالعربية كتير قوي وفي اوقات الشوارع فاضية الاول
واتعود علي العربية ومتستعجلش في تعلم السواقة
عشان السواقه ممارسة وبعدين ابتدي سوق
عشان صاحبي طلع رخصة وركب العربية وبهدلها اخر بهدلة

روح مدرسه ..
هتخبط في عربياتهم شويه ..واوعى تتعلم على عربيتك ياراجل
حرااااام عليك

موضوع قديم بس جيد , الإثنين مع بعض طبعا , المدرسة ثم الممارسة والخبرة