اقتراح حانعملو يمكن يقلل حوارات السرقة !

السلام عليكم نظرا للاحداث اللى بتحصل و كل يوم سرقة و حاجات كتير بتحصل كل يوم فى المنطقة عندنا عربية تتسرق يا محل يتكسر و يتقلب فكرنا تفكير الى حد ما كويس شوية قالو احنا حانجيب غفير فى المنطقة يقعد من الساعة 12 لحد 7 الصبح مثلا لحد لما يبقى فى حركة فى المنطقة و الناس تبدا تنزل و كل واحد لى حاجة خايف عليها مثلا عربية او محل و كدة حايدفع معاهم طبعا كل واحد حايديلو اللى فى النصيب بحيث يبقى لى مرتب شهرى .......

اولا: لازم اللى يجى يكون شاب و يعرف يتعامل لو حد جى من الحرامية ميكنش واحد كبير و يجى ينام هنا
ثانيا : حياخدو منه صورة بطاقتة عشان لو حصل حاجة يبقى عارفين طريقه
ثالثا : و دى اهم حاجة يلتزم بالمواعيد

كنت بقى عايز اخد رايكم فى الموضوع ده و لو فى حاجة تانية ممكن نخدها من الراجل ده بحيث لو حصل حاجة نعرف نجيبو....

انا رائي الشخصي بقي انه الغفير يقعد في بلكونه مثلا تكون كاشفه الشارع كله .. و معاه سلاح حتي لو صوت بس .. عشان لوقعد في الشارع عادي ممكن يتثبت ولا ليه اي لازمه ..و ممكن الغفير ده يكون شاب ( عاطل ) من المنطقه .. او تتوزع علي الشباب ورديات

اقتباس:

---

المشاركة الأصلية كتبت بواسطة ahmedsamir5edr

انا رائي الشخصي بقي انه الغفير يقعد في بلكونه مثلا تكون كاشفه الشارع كله .. و معاه سلاح حتي لو صوت بس .. عشان لوقعد في الشارع عادي ممكن يتثبت ولا ليه اي لازمه ..و ممكن الغفير ده يكون شاب ( عاطل ) من المنطقه .. او تتوزع علي الشباب ورديات

---

اصل حيقعد فى بلكونة مين حايدخله يقعد فى بلكونته ده اول حاجة تانى حاجة انا افضل يكون واحد مش من المنطقة عشان اصلا اللى بيسرق من المنطقة و عارفنا كويس اوى و عارف الناس بتوع المنطقة

ماهو عشان كده انا بقول شاب من المنطقه .. بس انتوا كده حالتكم غربيه لان السارق من المنطقه

انت تروح لشركات الحراسة الخاصة ...وتسألهم عن خدمة الحراسة الخاصة المسلحة...وتشوف التكاليف وتقسم علي اصحاب المحلات والسيارات...

الشركة هاتعملك معاينة وتشوف انت محتاج كام حارس مسلح (سلاح ناري مرخص) ...ويبقي كدة انت آمان..

اقتباس:

---

المشاركة الأصلية كتبت بواسطة hero

انت تروح لشركات الحراسة الخاصة ...وتسألهم عن خدمة الحراسة الخاصة المسلحة...وتشوف التكاليف وتقسم علي اصحاب المحلات والسيارات...

الشركة هاتعملك معاينة وتشوف انت محتاج كام حارس مسلح (سلاح ناري مرخص) ...ويبقي كدة انت آمان..

---

احلى كلام
انا عندنا فى البلد طبعا ارياف مظبط الغفره شويه كدا وبيخلوا بالهم من المحل بليل
وربنا يسترها

متابع
حاولنا نعمل كده في الشركه عندنا و الناس ما رضيتشي عشان 20 جنيه في الشهر !

اقتباس:

---

المشاركة الأصلية كتبت بواسطة kareem.elaraby

متابع
حاولنا نعمل كده في الشركه عندنا و الناس ما رضيتشي عشان 20 جنيه في الشهر !

---

ههههههههههههه هو ده المصري الاصلي. ممكن يكع دم قلبه غصب عنه وييجي عالهايفة ويعمل ناصح:36_2_33:

بصراحة شايف فكرة كويسة و مش كويسة في نفس الوقت كويسة ان فيه شخص هيبقي متابع و ديه تقلق
مش كويسة لأن اللي بيسرق قبل ما يسرق بيتابع المكان اللي هيسرقه يعني هيعمل حسابه ع حاجة زي كده و ممكن غفير واحد يتثبت حتي لو معاه سلاح الادهي انك متضمنش الغفير ده ممكن زي ما بيقولوا حاميها حراميها
مفيش غير انكم تأمنوا العربيات بانذار و قفل دريكسيون او فتيس و شوفوا افكار تانية فصل الكهربا و هكذا
و ممكن تربوا شوية كلاب في الباركينج زي حالاتي هههههههههه ادخل الموضوع ده و انت تعرف قصدي

http://www.nilemotors.net/Nile/266735-a.html

عندنا عربيه في الزقازيق في منطقه فيها غفير مجموعه شاب عدوا بعربيتين العربيه الاولي سالت علي مسجد اسموا السلام قعد يوصفلهم قام الفجر اذن قالو طب تعالي صلي معانا قاموا الشباب الي في العربيه التانيه قام بالواجب
_______________________
عربيتي انا شخصيا بس الكلام ده في 2008 الله يرحمها بقي كانت كورولا 2005 روحت ازور عمتي الساعه 12 بليل علي الساعه 1.5 سمعت دبه جامده وبعديها بشويه صوت متور عربيتنا بعديها بشويه صوتها في الشارع الي قدامي قمت فاتح الشباك بعد كده صوت العقل الباطن بيقلي موصفات الامان في عربيتنا عاليه روح ارجع طبعا بعد ما سمعت جمله العشا جاهز لان والدتي كانت مسافرة اسبوع
نزلت 2.30 بليل فبقول لودي حصل كذا كذا قالي يارجل روح لايكن تدو من غير مفت..... ايده ولاااااا فين عربيتي تقريبا بابا سعتها كان بيكلم نفسه لاني كنت برقع بالصوت في اخر الشارع وبنادي علي ابن عمتي روحنا القسم ورجعنا علي المكان لقيت مكان العربيه قزاز و لقيت الظابط بيقلي هاتولي الراجل ده طلع الغفير هاه ياعم فين العربيه الي كانت هناااااااااااا ااااااااااااااااااااه عربيه ايه يابيه خخخخخخخخخغغغ وكمل نوم والغريب انه كان بعيد عن العربيه ب5 الي 7 متر

احنا عاملين كدة عندنا فى العمارة
جايبيين واحد بيقعد بليل من 9 بليل ل 7 الصبح وبياخد مرتب لحد ما البواب يصحى الصبح ويستلم منه
واحنا عملنا كدة من بعد ما عربيتى اتسرقت

حل جميل بس الحرامي مش هينزل يتوكل علي ربنا واللي يلاقيه يسرقه
دا بيفضل يدرس ويفحص ويعمل اللي عليه وياخد بالاسباب :)
اعتقد لو خفير ممكن عادي يتثبت واكتر من واحد العمليه هتوسع حبتين
في اقتراح قاله احد الاخوه شركات الحراسه المسلحه علشان هوا ده افضل حل
لو الناس اللي معاك في المنطقه منفضه ومش عاوزه تشترك ضيق العمليه علي العماره بتاعتك بس بردو في ناس مرضيتش خلي بالك من عربيتك واقفل الدريكسيون وهاتلها كلبش وانذار واقفل بابك واللي يستنجد بيك بعد كده متعبروش ولو سمعت اي صوت اديها نوم علشان في ناس فعلا بتكره الواحد في عشته

فكرة حلوة انا شفت ناس هنا في اسكندرية عاملينها ... و حتلاقي ناس كتير على فكرة مستعدة تديها فلوس و تعمل كده

مفيش احلا من شركات الامن
ولو جيت بصتلها من العماير الى هتدفع
هتلاقى كل شقة هتدفعلها 20 اوو 25 بالكتير
لكن السكان اغلبيتهم مش بيتدفعوا كويس اوى لو دفعوا الزبالة او النور او البواب

هى الفكرة كويسة بس معتقدش ان الغفير ده ممكن يتثبت لية بقى ؟ لان لو عمل اى صوت و عرفنا اللى فى حرامى مثلا حتلاقى المنطقة كلها نزلت فى الشارع و عموما مافيش حد ممانع من المنطقة انو يدفع و اتفقنا كما ان مثلا كل واحد حايدفع 40 -50 جنية شهريا بس انا اول مرة اسمع عن شركات الامن دى طيب دى اوصلها ازاى و بيبقى نظامهم اية ياريت حد يقولى الموضوع ده لانى مهتم بى اوى...