الموضوع: غيرت زيت الفتيس Valvoline فى البيت :)

السلام عليكم

بقالى فتره عايز أغير زيت الفتيس لانى عامل 37 الف ومغيرتوش فى ال 30 ومكنتش عارف بصراحه اعمل ايه احجز ميعاد مخصوص فى التوكيل ولا اغيره بره

المهم شوفت اعلان فالفولين فى المنتدى والخدمة اللى عاملينها توصيل الزيت وتغييره كمان لو عايز مجانا هاتدفع تمن الزيت بس

توكلت على الله واتصلت اول امبارح الاربعاء وحجزت ميعاد النهارده الجمعه بعد الصلاه

جالى شاب ومعاه الحاجه وغيرلى الزيت وبصراحه الشغل فيه ضمير واحترافيه وذوق ومعتقدتش لو كنت رحت التوكيل كان هايتغير بالاهتمام دا طبعا فى التوكيل اى حاجه واقلب

النوع المتوافق مع فتيس الاوبترا اسمه MaxLife ATF العلبه لونها احمر فيها 1 لتر ب 70 جنيه , العربيه خدت 3 لتر وشويه حوالى 3.2 وباقى العلبه الرابعه تنفع لو عايز تزود زيت الباور هو هو

ومش عايز اقولوكو على منظر الزيت وهو نازل من العربيه اسود جدا بدرجة فظيعه الراجل اللى غيره بيقولى المفروض مينزلش اسود كدا المفروض ينزل احمر زى الجديد

المهم دفعت تمن 4 علب 280 وبرضه كنت طالب مية تبريد عشان كانت ناقصه عندى طلعت غاليه شويه ب 175 بس مش مشكله اهى تنفع والعبوه 5 لتر

وادانى ظرف فيه كارت عضويه مؤقت والكارت الاساسى هايوصلنى بالبريد عشان بعد كدا هايعملى 5 % خصم على كل تغييره وكمان فى الظرف معطر وستيكر عربية فالفولين شوية حركات كدا

انصح اى حد عدى ال 30 الف يغير الزيت سواء فالفولين فى البيت او فى بنزينه او التوكيل المهم تغيره حفاظا عالفتيس

وشكرا