الموضوع: حد راح وادى الريان

أنا رحته قبل كده مرتين...مرة بالعربية و مرة بأوتوبيس هو و وادى حيتان.

وادى حيتان أنساه شوية...........طريقه صعب شوية و بعد وادى الريان.

وادى الريان...........الطريق كله زى الفل و عادى جداً............ما عدا أخر كيلو أو أتنين دول عبارة عن مدق مش طريق أسفلت.....بس ولا فيه غرز و لا حاجة........كل ما فى الموضوع أنه مكسر شوية.

و زى ما قالك أبو صلاح........الموضوع محتاج صحبة و لمة علشان يبقى ظريف.

هناك مفيش حاجة تتعمل زى ما قالك ما عدا أنك تتفرج على الشلال و ممكن تاخد مركب تلف بيك فى البحيرة شوية.

قبل ما توصل لوادى الريان فيه حاجتين تانين يستحقو الزيارة.............قصر قارون........او بالأصح ما تبقى منه و بحيرة قارون........و دى فيها بعض القرى السياحية البسيطة جداً .........ممكن تأجر فيها شاليه يساع فردين ب 180 جم على ما أذكر........بس تكون مظبط قبلها علشان القرى صغيرة و كل اللى فيها 7 أو 8 شاليهات.

و فيه برضه قرية (عادية مش سياحية) تانية بس مش على البحيرة و أسمها قرية تونس..........القرية دى مشهورة جداً بصناعة الأوانى الفخارية......و فيها بعض القرى السياحية البسيطة قوى........على ما أذكر كان فيهم واحدة فيها حمام سباحة حوالى 20 متر مربع :)

راجع الموضوعين دول لمزيد من التفاصيل

http://www.nilemotors.net/Nile/335765-post36.html

http://www.nilemotors.net/Nile/33701-a.html

المشاركة الأصلية كتبت بواسطة icehearted girl

انا اقول لحضرتك...انا شغلي قبل مدخل ابشواي والاوبرج دا بشوية فساعتها رحت بعد الاوبرج لحد البحيرة وقلنا بالمرة نروح وادي الريان سألنا كام كيلو؟؟ لقينا ناس متطوعين بيقولولنا 20 كيلو

وعنكم بقالي بعد 20 بنسأل يقولوا 40..مشينا مسافة بشعة وطبعا الطريق بين الزراعة والترعة رايح جاي ومطبات ما انزل الله بها من سلطان غير كمية الحوادث ف الطريق وصمدنا وكملنا لحد ملقيت البنزين يادوب يرجعني بلعافية ادور علي بنزين بح مفيش غير 80

طبعا رجعت وكلنا أمل نكرر التجربة مرة تانية...وفعلا فولنا التانك من وطنية قبل مدخل ابشواي ودخلنا مشينا بلاد تشيلنا وبلاد تحطنا...

لحد موصلنا فعلا المدخل ودفعنا رسوم تقريبا 10 جنيه جاجة كدا... ودخلنا مشينا ف رمال مسافة 12 كيلو ربك والحق منظر الرمال نفسها ومرتفاعتها ومنخفضاتها هو دا المنظر الوحيد اللي شدني وعجبني سبحان الخالق..بعد كدا بتمشي ف مدقات وبتتحول العربية ل vibration من الطوب والزلط لحد متوصل قرب البحيرة..هتلاقي كمية باصات ورحلات ما انزل الله من سلطان

مفيش غير كافتريتين ف منتهي السوء والحمامات انسي تماما

منظر البحيرة مشوة من كتر الناس اللي نازلة تغسل همومها _وهدومها برده_

بقينا بنتسائل طب فين الشلالات دي..مش شايفنها فعلا...لقينا حتة مقطوعة كدا فيها شوية زرع .. والمفروض الصخرة اللي نازلة دي شلال

شلال؟؟ ينهار ابيض دنا ريحة وعاملة حسابي ابص برقبتي لفوووووووووووووق

اقوم ابص تحت؟؟ اتصدمت بصراحة..دا غير كمية للناس اللي قعدة جوا عشان المية تنزل عليها ولا كأنه حمام كليوباترا مثلا..فكرتني بماسورة مجاري ضاربة ف ش من شوارع القاهرة

دي نافورة اللي ورا تمثال نهضة مصر احلي ميت مرة منها

من ساعتها كرهت كلمة شلال..وكرهت فيلم تامر حسني اكتر من كارهه تامر شخصيا

وكرهت الفيوم اكتر واكتر وندمت جدا ع اليوم اللي باظ

تقريباً دة إلي حصل معايا بالظبط بس من غير حتة البنزيين

كنت طالع الفيوم يومين و نازل في هلنان ، المهم طلعت في دماغي أنا و أصحابي اننا نطلع نشوف وادي الريان ، و كان أكبر مقلب الواحد اخده .... احنا قعدنا هناك بظبط أقل من 10 دقائق....

مستوى المكان ضايع ، الناس هناك ولا كأنهم في المولد ،الناس نزلة المياه بهدمهم و فيه ناس بتغسل هناك كأنهم قاعدين على الترعة ، أنا كل إلي عملته هناك اني ركنت العربيه و إتمشت لحد ما وصلت للشلالات و شفت المنظر و رجعت تاني