كلام دكتورة ضحي مظبوط و تقريبا نفس المقلب اللي انا اخدتة
طلعت انا و مراتي بنحلم بشلالات وادي الريان زي ما بنشفها في الافلام و الصور
طبعا الطريق بياخد حوالي ساعة و نص الي ساعتين من القاهرة لحد ما توصل لبداية دخول المحمية
قبل الدخول للمحمية هاتلاقي نفسك ماشي في حتت مجهولة و منحيات خطرة جدا جدا تكاد توصل لزاويه حادة
توصل لباب المحمية و تدفع تذكرة 10 جنية للفرد و ممكن تشتري خريطة معرفش بكام و مالهاش لازمة ماتشتريهاش
تدخل من باب المحمية تلاقي طريق طوييييييييييييييييييييييي يييل اسفلت بتاع 3 كيلو مثلا
و بعدين يخلص الاسفلت فجأة و تلاقي نفسك ماشي في مدق رمل متحجر و المدق ده فعلا بيخلي العربية عاملة زي Vibration في الموبايل ( عبارة عن امواج صغيرة جدا من الرمال المتحجرة ) عاوزة عفشة متينة يعني
المنظر اللي هايعجبك في الطريق ده فعلا هو شكل الكثبان الرملية و تكويناتها
بعد كده هاتوصل لمنطقة البحيرة ( بحيرة جميلة و هادية جدا من بعييد )
لكن كل ما تقرب منها هاتكتشف الحقيقة
انها اشبة بالبركة .. المياه اللي فيها خضراء و رائحة المياه مش لطيفة خالص .. بسبب انه بيتم الصرف فيها
حلو لحد كده ؟؟؟
طيب فين الشلالات يا جماعة ... تسأل اي حد هناك هاتلاقية بيشاورلك علي مكان هناك كده و يقولك اهي هناك اهي
انت تبص طبعا و والله العظيم ما هاتشوف اي شلال نهائي
هاتسألة فين ده انا مش شايف حاجة هايقولك روح هناك كده و انت هاتلاقية
المهم هاتروح في المكان اللي بيقولك علية ده هاتبتدي تكتشف ان الشلال اصلا تحت مستوي رجليك ( تحت مستوي الارض )
يعني انت بتكون واقف فوق الشلال اصلا
من ضمن الاكتشافات اللي هاتكتشفها ان الناس الي انت مشوفتهمش خلال الرحلة دي كلها هاتلاقيهم كلهم واقفين جوة الشلال و ان الشلال فعلا زحمة اوي
و طبعا اي صورة هاتحب تاخدها هاتلاقي ناس كتير ماتعرفهمش بيشاركوك في الصورة
طبعا هاتنبهر من نظافة المكان ( سيئة جدا )
و كمان هاتنبهر من حجم الشلال ( الواحد كان فاكر ان شلال عملاق بقي زي ما بنشوف في الافلام ) هاتكتشف انه بالكتير بحجم دور او دور و نصف في اي عمارة سكنية
الكافيتريات هناك والله انا قرفت اشرب فيها شاي حتي
لازم يبقي معاك كل حاجتك ( مياه - اكل - شاي - حلويات - سناكس ) كل اللي نفسك فيه خده معاك عشان هناك مفيش اي حاجة خالص
لو عاوز تدخل الحمام انصحك نصيحة لوجة الله تعالي انك تكتم نفسك جامد جدا جدا و تحاول تتغاضي عن اي حاجة هاتشوفها في الحمام و يستحسن تغمض عنيك احسن كمان و لو اني ارشحلك تلبي نداء الطبيعة في اي مكان بعيد عن الناس و خلاص هايبقي اريحلك نفسيا
بص
بوجة عام كده الرحلة دي هاتستفيد بيها بمنظر الكثبان الرملية ( و ماتتخيلش انك هاتلاقي حاجة وهمية ) اضحك علي نفسك و استمتع بيها
هاتشوف الشلال ده لاول و اخر مرة في حياتك
هايبقي عندك خبرة لو حد سألك عن وادي الريان بعد كده