الموضوع: الخدمات الطبية لأعضاء المنتدى

شكرا يا أدميرال على التوضيح وعلى الصورة اللي مشخصة نفسها
المرض ده اسمه حزاز جلدي وكل مشكلته انه بيضايق و يخليك عايز تهرش فيه ببطن إيدك زي ما حضرتك تكرمت وقلت ولكنه مرض بسيط بيروح لوحده لو عايز تصبر عليه أما لو هو قارفك قوي ممكن تستعمل له كورتيزون موضعي زي مثلا كريم بردرم وما تقلقش ما لوش الأعراض الجانبيه بتاعة أقراص الكورتيزون

بص يا سيدي الفاضل و ببساطة شديدة عشان كل الاعضاء يستفيدوا

فيه طرق كتير للتحكم في ألام الوضع و الولادة

أكثرهم فاعلية و أمانا هي البنج النصفي أو Epidural
بطريقة معينة يتم الوصول إلي منطقة في الظهر قريبة من النخاع الشوكي و يتم إعطاء جرعات محسوبة من الأدوية عن طريق قسطرة مثبتة تؤدي إلي تخدير الجزء الأسفل من الجسم أثناء الوضع و حتى الولادة
طبعا الموضوع ده كبير قوي و يطول شرحه انما الطريقة ديه منتشرة جدا بره و اثبتت فعالية و أمان

الطريقة التانية هي إعطاء أدوية عن طريق الوريد لتقليل الأحساس بالالم ....عادة الأدوية ديه بتبقى أدوية مخدرة ...Narcotics و ديه كانت مشاكلها كتيرة و ممكن تأثر على الوليد انما مؤخرا ظهرت أدوية أعراضها الجانبية أقل كتير من الأجيال القديمة و فيه أبحاث كتير اتعملت على الجرعات المناسبة و طريقة و توقيت اعطائها

فيه إتجاه للتقليل من أي تدخل في الولادة و ده ما يطلق عليه الولادة الطبيعية ....مجموعة من تمرينات التنفس و التأمل "للسيطرة " على الالم ..(تجربتي الشخصية إنه ما بينفعش و بتحتاج الأم لأي حاجة تساعدها لمجابهة الألم و كتير بتنتهي بماسك نيتروس اوكسايد .....مش فعال قوي بس أحسن من مفيش )

حكاية الولادة الملكية ديه ليه أصل ....الملكة فكتوريا استدعت الطبيب بتاعها (John Snow) وقت الآم الوضع و كانت في حالة يرثى لها فقام باعطائها غاز كلوروفورم فكانت ولادة بدون الم و لما انتشرت الحكاية ديه الناس إطمنت و ابتدت تطلب التخدير

طبعا طريقة كلها مخاطر على الأم و البيبي بس بتتعمل في مصر كتير لغاية دلوقتي بادوية مختلفة منها وريدية و منها إستنشاقيه .....جزء من المهازل اللي بتحصل في المحروسة في كل أوجه الحياه