انقذو هذه اليمامة

**Ralliart** · 21-01-2012 09:02 PM

كنت طالع البيت لقيت يمامة صغيرة العيال ماسكينها بيلعبو بيها وهيموتوها فأخدتها منهم وحطيتها في كرتونة ودفيتها وجبتلها شوية قمح وميه
طبعاً باين عليها انها صغيرة جداً فمعرفتش تاكل ولا تشرب لوحدها فعملت شوية سيرش عالنت عرفت اني لازم ازغطها زي توفيق عكاشة كدة وبعدين اكتشفت اني لازم بعد ما تاكل احط مية في بقي واحط منقارها في بقي واشربها يععععععععععععع
انا جبت علبة وخرمت غطاها على قد منقارها ومليتها شوية مية وحطيت منقارها في العلبة وضغطت وشربت الحمد لله

السؤال هنا ااكلها ايه بالظبط علشان حاسس ان القمح قاسي عليها لان اصلاً المفروض امها بتاكل وتهضم وبعدين تديلها الاكل مهضوم انا جربت اكلتها رز مطبوخ بس مش عارف غلط عليها ولا لأ؟
والسؤال التاني هو ااكلها كام مررة في اليوم والكمية اد ايه؟؟
السؤال التالت هي امتى هتكبر وتعرف تاكل وتشرب لوحدها علشان اطيرها وانا مطمن انها متموتش؟

**aif** · 21-01-2012 09:13 PM

انا للاسف مش ح اقدر افيدك لاني معنديش خبرة في الموضوع ده لكن انا داخل ابلغك اعجابي بتصرفك الذي ينم عن رحمة ورفق بالحيوان كما اوصانا الله والرسول عليه الصلاة والسلام
..
..
فيه منتديات مخصوصة لتربية الحيوانات زي ده
نادى محبى الحيوانات الاليفة

**mr_vampire** · 21-01-2012 10:01 PM

جزاك الله خير بجد. بس السؤال الذي يفرض نفسه بقي افرض حيت تطيرها لقيتها رجعتلك تاني لانك عوضها حينان الام ساعتها هتعمل ايه. انا اعرف ان لحم اليمام حلو وطعمه حلو اوي . ده لو فكرت يعني ههههههههههههه

**medo_2060** · 21-01-2012 10:15 PM

فكرتنى مع انى مش غاوى بصراحه الحاجات دى بس لقيت عصفوره صغيره مره خدتها وكانت اول مره اهتم بحاجه زى كدا عايز اقلك عندنا جنينه صغيره جنب البيت لما عرفت تطير كانت بتروح الشجر ولما اطلع من الشباك اصفر تطير عليا اجيبلها اكل كدا فتره طويله لحد ما يوم اختفت يلا تلاقى صقر أكلها ولا حاجه المهم انا عملت الى عليا هههههههه

**mr_vampire** · 21-01-2012 10:23 PM

المشاركة الأصلية كتبت بواسطة medo_2060

فكرتنى مع انى مش غاوى بصراحه الحاجات دى بس لقيت عصفوره صغيره مره خدتها وكانت اول مره اهتم بحاجه زى كدا عايز اقلك عندنا جنينه صغيره جنب البيت لما عرفت تطير كانت بتروح الشجر ولما اطلع من الشباك اصفر تطير عليا اجيبلها اكل كدا فتره طويله لحد ما يوم اختفت يلا تلاقى صقر أكلها ولا حاجه المهم انا عملت الى عليا هههههههه

مين اللي قال ان دورك انتهي كدة. ابسلوتلي.

كان لازم تشوفلها عصفور وتجوزهاله

عشان تطمن عليها. وكماااااااااااااان تشوف الفرح علي انهي فرع شجرة وتحضره وتصوصلهم كمان

بس من تحت الشجرة بدل ماتاخد الفرع بالفرح بالمعازيم ورشق فالارض

.

**medododo** · 21-01-2012 10:28 PM

وديها عند فرارجي وهو هيتصرف

**Ralliart** · 21-01-2012 10:38 PM

شكراً على ردودكم بس انا آخر حاجة ممكن اعملها في حياتي اني ادبحها انا فاكر وانا عندي 10 سنين اشتريت 3 كتاكيت وابويا وامي كانو فاكرين انهم شوية وهيموتو انما انا حوشت واشتريت قفص وربيتهم وكانو بياكلو اي اكل فاضل في البيت وكبرو وبقو اكبر من اللي بيتباعو في المحلات بكتير ولما اتدبحو قدامي حصلتلي عقده كأنهم دبحو اخواتي وقعدت سنين مبدوقش طعم الفراخ
مع العلم ان اليمام عكس الحمام لا يستأنس ومبيرجعش البيت تاني ويعتبر طير مهاجر

المشاركة الأصلية كتبت بواسطة medododo

وديها عند فرارجي وهو هيتصرف

معلش اعذر جهلي مين الفرارجي ده ؟؟؟

لو الكلمة دي تعني الراجل بتاع الفراخ فهو اكيد هيدبحها لان اليمام مبيترباش وده مبدأ مرفوض

**rompo10** · 21-01-2012 10:41 PM

جزاك الله خيرا اول ماتبدي تطير سبها وهي هاتتعامل

**Ralliart** · 21-01-2012 10:55 PM

المشاركة الأصلية كتبت بواسطة rompo10

جزاك الله خيرا اول ماتبدي تطير سبها وهي هاتتعامل

هي بتطير بالعافية على قدها كدة في الشقة ،المشكلة اني سبتها يوم كامل وقدامها اكل وميه ومداقتهمش ،وكنت شفت في موقع اجنبي انها لو مبتعرفش تاكل لازم ااكلها بنفسي والا هتموت