التجربه الجنوب أفريقيه - الحلقه الثانيه: العالقون في مطار أديس أبابا
ولما كان قرارنا هو المضي قدما وحجز تذاكر الطائره بحثنا الأول على الإنترنت ولقينا إن أسعار مصر للطيران غاليه أوي بصراحه فقلنا نشوف حظنا كده مع شركات السياحه, وقد كان ...
رحنا شركة سياحه مشهوره أوي في الكوربه وبعد مشاورات ومداولات لقينا إن في رحله كويسه ورخيصه بس غير مباشره على متن الخطوط الجويه الإثيوبيه: القاهره أديس أبابا – أديس أبابا جوهانسبرج
بس إحنا لاحظنا إن وقت الترانزيت في مطار أديس أبابا قليل جداً: 30 دقيقه أو 40 دقيقه نقريباً وده طبعاً وقت غير كاف إطلاقاً للتغيير من طائره لطائره في المطار. بس الموظف في شركة السياحه قال لنا: ما تقلقوش خالص: إنتو أصلاً مش هاتنزلوا من الطياره, دية بس الطياره هاتنزل في المطار وهاتطلع تاني على جوهانسبرج.
سألناه إنت متأكد؟ قال لنا طبعاً ده شغلي. قلنا خلاص طالما الرجل واثق من نفسه يبقى خلاص نتوكل ونحجز.
بس إحنا بصراحه ما كناش مطمئنين: خاصة إن رقم رحلة القاهره – أديس أبابا مختلف عن رقم رحلة: أديس أبابا – جوهانسبرج.
عشان كده كلمنا الخطوط الجويه الإثيوبيه نفسها وسألناهم عن موضوع الـ 30 دقيقه ترانزيت ده، وهنا كانت الفاجعه: الباشا بتاع شركة السياحه كان بيفتي وكان هايخلينا نلبس في الحيط ونبات في مطار أديس أبابا لحد معاد طيارة جوهانسبرج اللي بعديها ما يجي، وده عشان وقت الترانزيت ده كنا المفروض هانغير فيه الطياره مش زي ما قال لنا إنها نفس الطياره، وطبعاً كان من رابع المستحيلات إن إنا نلحق نغير الطياره في 30 أو 40 دقيقه حتى.
طبعاً كلمنا شركة السياحه بعد كده وقلنالهم على اللي عرفناه: قالولنا يا فندم ماهو الـ 30 دقيقة دول ممكن تلحق تغير فيهم الطياره :) (على أساس إن إحنا راكنين كنا راكنين الفيل بره)
طبعاً لغينا الحجز بعد خناقه محترمه
قررنا نحجز مصر للطيران مباشر وخلاص: مش مشكله أغلى 400 أو 500 جنيه بس نضمن إن مش هايحصل مشاكل.
الغريب إننا حجزنا الـ 3 تذاكر بأسعار مختلفه وبطرق مختلفه: بس في النهايه الحمد لله حجزنا التذاكر وإطمأنينا إننا مش هانعاني من أي مشاكل في المطارات بإذن الله.
الحلقه القادمه: المطار القديم اللي بقى جديد :)
