الحمد لله.......أخيرااااااااااا....... العربيه اتظبت وبدأت رحلة الإستمتاع
السلام عليكم ورحمة الله وبركاته ،،،،،،،
مقدمه لابد منها كده فى الأول برده :-.
بعد ما عملت الموضوع اللى فات "الإنطباع الأول بعد تسقيط موتور 1400 إنجكشن لعربيتى"
http://www.nilemotors.net/Nile/265980-1400.html.
- كنت قفلت الموضوع إنى سقطت الموتور 1400 للعربيه بتاعتى، بس كانت العربيه فيها 3 عيوب كانت مجننانى جدا ومكنتش عارف أستمتع خالص بالعربيه وهى كالتالى:-
1) سحب العربيه - بعد لما أوصل ل 2 RPM - على أى غيار بيكون سىء جدا جدا جدا وبيطلع عينى عشان يوصل ل 3 RPM وأقدر أنقل للغيار اللى بعده ، بيسموه إن العربيه " بتشحط " ومحدش يقولى يعنى إيه لأنى مش فاهم معناها فى القاموس.
2) لماأكون ماشى على سرعات عاليه ( 60،70،80،........) وأجى أمور العربيه قبل مطب مثلا او ملف لااااااااااااازم وحتما ولابد العربيه تبطل لوحدها.
3) نفس النقطه رقم (3) ونزود عليها إن ال RPM بيقعد يرقص - مش بيتحزم ويرقصلى أكيد يعنى - بيقعد يعلى ويوطى لوحده لما أمور العربيه.
-رحت طالع على " الدكتور عصام " الشهير ب "الأسطى عصام " قلتله ياعمنا أنا قربت أتخنق من العربيه بجد والله وزهقت ومليت منها ، راح عمنا عصام قلى ليه يا هندسه إن شاء الله خير تعالى نطلع نجربها.
طلمبة البنزين وبداية الرحله :-
-طلعت مع " الأسطى عصام " نجرب العربيه لسه هطلع على شارع الهرم وأدوس بقى بالعربيه قلى خلاص خلاص خلاص خلاص ياهندسه لف وإرجع ، قلتله يا عم هوا إحنا لحقنا نجرب حاجه ، قالى خلاص ياباشا دى طرمبة البنزين اللى عامله ده.
-بمنتهى الصراحه أنا رجعت معاه على الورشه وأنا مش مقتنع خالص إنها طرمبة البنزين ، بس برده من جوايا عارف كويس أوى إن " الأسطى عصام " ده دكتور ولا غبار عليه برده.
-رجعنا على الورشه ، وبمنتهى الصراحه قلتله يا " أسطى عصام " لو أنا رحت إشتريت طلمبة بنزين ومطلعتش هيا السبب، يبقى كيف العمل يا هريدى ساعتها ؟؟؟؟؟؟؟؟، راح "الأسطى عصام " رد عليا بمنتهى الثقه برده قالى ( يبقى ألبسها أنا ياباشا ) وهديلك فوق حقها ( ألف جنيه ) قلتله كلام رجاله قالى ولو رجعت فى كلامى يبقى انا مش راجل تمام يا هندسه .
رحلة البحث عن طرمبة بنزين تعجب " الأسطى عصام ":-
- زى ما قلتلكم إتفاقنا كان إيه ، بس كان " الأسطى عصام " ليه شرط واحد بس وكنت أنا مستغربه جدا جدا جدا وهو - إنه لازم يشوف الأول بعينه طرمبة البنزين اللى هنشتريها تتحل من تنك عربيه قدامه - متكونش يعنى مركونه أو متخزنه عند حد بتاع إستيراد.
-قعدنا ندور أنا و "الأسطى عصام " على طرمبة البنزين اللى تكون راكبه فى تنك عربيه دى عشان يكون ملهوش حجه بقى - وزى ما أنا قلتلكم إنى مكنتش مقتنع إطلاقا إنها طرمبة البنزين السبب - لحد لما ربنا كرمنا ودخلت محل بسال على طرمبة بنزين ابيزا 98 ، لقيت لاراجل بيقولى ( مفيش غير وحده بس لازم تجيب ميانيكى يحلها من تنك لاعربيه لاننا لسه مقطعناش العربيه.
-كده بقى يبقى ملكش اى حجه يا " أسطى عصام " ولو روحنا ركبناها فى العربيه وفضلت العربيه زى ما هى - هيلبس هوا تمن الطرمبه ويدفعلى ألف جنيه عدا ونقدا.
أنا اســـــــــف يا " دكتور عصام ":-
- فى خمس دقايق بالظبط كان " الأسطى عصام " مركب الطلمبه فى العربيه بتاعتى ، وبصلى وهوا بيضحك وقالى يلا يا هندسه اطلع جرب عربيتك على بال ما أنا أحضرلك الألف جنيه بتوعك، ركبت العربيه وأنا غير مقتنع تماما تماما إنى هلاقى أى فرق.
- انا اتمسمرت فى مكانى العربيه ما شاء الله ولا حول ولا قوة الا بالله بقت بتسحب كأنها طالعه من المصنع لسه ، العربيه مش بتبطل خاااااااااااالص ،برده أنا لسه مش مقتنع طلعت بالعربيه علىطريق هايبر وان وطررررت بالعربيه وأهدى مره وحده لا العربيه بتبطل زى ما كانت ولا ال RPM بقى بيتحرك من مكاااااااااااانه خاااااااالص.
-رجعت على الورشه وأنا فى قمة السعاده - خسرت الرهان بس كسبت العربيه بقى - قلتله ياباشا اللى تقول عليه انا مش هراجعك فيه ولو قلتلتى عاوز ( 500 جنيه ) هدفعهم ومش هفاصلك ، الراجل ( ربنا يبارك فيه غير إنه صنايعى دكتور بس بيراعى ربنا جدا) قالى هاخد حقى وبعد كده لما أقولك حاجه تانى تسمع كلامى.
الإنطباع الثانى للموتور الجديد بقى :-
- بسم الله ما شاء الله فرق رهيييييييييييييييييب فى الطلعه ، والغيار التانى بقى مشوار طوييييييييل..
- العربيه بسم الله ما شاء الله من ساعة لما إشتريتها ما استمتعتش بيهاخالص غير النهرده بس.
-يارب يارب يارب ما يحصلش أى حاجه تانى ويستر طريقكم وطريقى يارب.
أخيرا بقى وكفايه كده عليكم - كتر خيركم أوى أوى - ألف شكر ليكم على سعة صدركم وشكر كبير أوى أوى أوى ( للمهندس / محمد سيد ) إنه عرفنى على " الأسطى عصام ".
