اروح مرسى مطروح بالعربية ولا اتوبيس

**moudy2002** · 28-05-2008 05:51 PM

اخوانى الكرام
ان شاء الله رايح مرسى مطروح مصيف كمان اسبوع
محتار اروح بالعربية انا واسرتى (المدام وطفلين 4 و 1.5 سنة ) ولا اروح بالاتوبيس المكيف 6 ساعات لغاية هناك
الاتوبيس بيبقى مكيف بس العيل معايا يعنى انتو عارفين الحمام يابابا وكدة . وكمان قعدة الاتوبيس رخمة لازم البنت على رجل مامتها والولد يقعد على كرسى وانا على كرسى .. انا كل سنة بطلع بالاتوبيس لانى مكنش معايا العربية بس 6 ساعات لاغية الواحد ما بيزهق من القعدة ..

انا عارف ان اكتر حاجة هناك التكسيات الاكسنت مغرقة الدنيا . بس الفندق الى هنزل فية فى وسط البلد وانا مش برتاح غير لما اروح شاطئ الفيروز ودة فى اخر البلد لانة هادى و مفيش موج هناك .. يعنى كل يوم هشيل البنت الصغيرة وامسك ايد الواد والمدام هتشيل الشنط وعربية البنت ونشوف تاكسى ياودينا ويجبنا تانى ..

مميزات العربية انى مع نفسى بقى وروح زى ما انا عايز من غير شييل وحط ووجع القلب دة والولد يعيط عايز اروح الحمام يا بابا وكمان الاولاد هيبقوا مسترحين فى القعدة فى العربية عن الاتوبيس طبعا
العيوب .. الطريق حوالى 5 ساعات سواقة متوصلة .. يعنى الواحد عقبال ما هيوصل عايز حد يشيلة من العربية على السرير عدل من تعب وطول الطريق ..
تانى حاجة انا حجزت الفندق لمدة اسبوع شامل المواصلات رايح جاى .
وطبعا موضوع زيادة البنزين هيكلفنى فلوس اكتر

مش عارف .. العربية راحة للاولااد ومش هبهدلهم فى موضوع الانتقالاات هناك
بس تعب وطريق طويل ومصاريف عليا انا وكمان ..

شوروا عليا ماذا تفعل لو كنت مكانى ؟؟
ومصيف سعيد ليكوا جميعا

**sniper2010** · 28-05-2008 06:03 PM

جرب قطر النوم
مش هتندم
أنا رحت مره بيه ومره بالطيارة
بس قطر النوم كان أكثر متعة

**Hossam_Hassan** · 28-05-2008 06:06 PM

صحيح ان اللى هتوفره فى البنزين هتصرفه على التاكسيات، بس انا شايف انك تسافر بالأتوبيس و تاخد اجازة من السواقة و حرقة دمها

**MoToRiZeR** · 28-05-2008 06:14 PM

لو انت من محبي سواقة المسافات الطويلة ( انا بستمتع بيها و راشق في اي سفرية بسببها ) اطلع بالعربية .. انما لو عايز تاخد اجازة من كل حاجة بما فيها السواقة روح الأتوبيس .. و زي ما انت عارف لأنك بتروح مطروح من زمان .. مطروح المواصلات فيها حلوة مش هتغلب يعني .. و اهو فرصة تركب الأولاد الطف طف اللي هناك و مواصلات جديدة .. خاصة ان مطروح بالليل مش محتاجة مواصلات خاصة ان الفندق في وسط البلد .. كله عالرجلين و بتبقي ممتعة

و انت رايح بدري فا مش هتبقي زحمة :)

اعتقد اديها اوتوبيس و توكل علي الله

**AhmedGen2** · 28-05-2008 06:21 PM

المشاركة الأصلية كتبت بواسطة sniper2010

جرب قطر النوم
مش هتندم
أنا رحت مره بيه ومره بالطيارة
بس قطر النوم كان أكثر متعة

ممكن معلومات أكتر ؟

**wisambasha** · 28-05-2008 06:25 PM

انا بحسبها في راحتي انا والاسرة (تنزل الاولاد الحمام او تنزل تشرب شاي) ويا سلام لو العيل عيط من الزهق داخل الاتوبيس هتلاقي كل الركاب صدعت ومحدش هيستحمل عيال غيره ابدا
انا عن نفسي لازم اسافر بالعربية طالما مع الاسرة وبعدين السواقة في الطرق السريعة مافيهاش حرقة دم دا يا دوب رجل علي البنزين وعينك علي الطريق وبعدين هناك هتبقي براحتك (تخرج تتاخر اولادك يناموا في العربيةبراحتهم)
بلا اتوبيس بلا وجع قلب يا راجل

**wild_man** · 28-05-2008 06:27 PM

طب انتا ما قلتلناش الأول يا moudy2002 عربيتك نوعها ايه و كام سي سي؟

**moudy2002** · 28-05-2008 06:37 PM

شكرا ليكم جميعا يا رجالة
انا فعلا ميال انى اسافر بالعربية بس موضوع طول الطريق هو الى مديقنى .. دانا سافرت من القاهرة للعجمى . روحت خلصان ونمت اليوم كلة
بس فكرة ان طريق السفر كويس وبلاخص طريق وادى النطرون هو الى مشجعنى على انى اسافر بالعربية ...
انا عربيتى اكسنت الشكل القديم 1500 cc

ايه موضوع قطر النوم دة ؟؟ وهل فية كباين وكدة ولا اية
كمان هيخد وقت اد اية ؟

**TAG_Turbo0** · 28-05-2008 06:53 PM

انا عن نفسى لما كنت بروح كنت بروح بالعربية
علشان انا بحب السواقه وبيفرأش معايا المسافه

**sokasoon** · 28-05-2008 07:17 PM

العربية اريح واحسن طبعا

والطريق بياخد 4 ساعات ونصف بالكتير

وبلاش قطر النوم ركبتو قبل كده بالليل الساعة 10:30 وصلت الساعة 6

صباحا بياخد وقت وصوت مزعج طول الطريق

بالنسبة للارهاق من السواقة انا كمان بحس بيه خصوصا فى السفر

لفترة طويلة جسمى بيريح وبنام مابقدرش اقاوم النوم بس ده لساعات

مش على طول يعنى من ثلاث الى اربع ساعات وبعدين بفوق

الموضوع: اروح مرسى مطروح بالعربية ولا اتوبيس

LinkBack

أدوات الموضوع

عرض

اروح مرسى مطروح بالعربية ولا اتوبيس - انشر الموضوع فى :

-

-

-

-

-

-

المواضيع المتشابهه

* اجازة 7 ايام في مرسى غبور --- اقصد مرسى مطروح *

سفر مرسى مطروح بالماروتى .. !!

انا مسافر مرسى مطروح

رحلة مرسى مطروح

مرسى مطروح !! هام جدااا

الكلمات الدلالية لهذا الموضوع

المفضلات

المفضلات

ضوابط المشاركة