الموضوع: تجربتى فى عالم الاكسسوار و اساليب تعاملهم معايا .

السلام عليكم
انا حبيت انقل تجربتى فى تعديل العربيات و الظروف الحلوه و الوحشه و طريقة التعامل مع محلات بيع الاكسسوار و قطع غيار و تعديلات العربيات
و هقسمها الى كذا قسم
فى محلات مثلا تشترى منها و تكون رخيصه و صينى و معامله عاديه ,و محلات تانيه معامله محترمه جدا و وفوق الوصف وقطع اصليه و اغلى شويه و,و محلات تالته معامله سيئه جدا و تكبر و تبيع البضاعه باضعاف تمنها و ناس ملهاش كلمه و بيبيعوا نفس المنتج بكذا سعر .يعنى كذا زمه .و ناس تانيه بتبيع بزمه وحده و بضاعه رخيصه جدا جدا و تعامل بحدود الاحترام و حدود الشغل .
1-من فتره قرات موضوع الاستاذ محمد ممدوح عن الوصلات الارضى و كده و فايدتهم .شفت محل على النت اسمه كينج دريفت عارض الوصلات و نوع نضيف .
النتيجه :الصور اللى فى النت غير اللى عنده و هما صينى مش اصلى و باعلى فولت استابليزر مستعمل على انه جديد و كمان ناقص بعض الحجات .كلمته اعد يماطلنى و يقفل تليفونه و ميردش شويه و ينكر شويه . و قالى عنده البوجيهات الايريديوم و دبات المشوار لحد عنده و فى الاخر مطلعش عنده اصلا اى حاجه . بالنسبه للمعامله فى المحل كانت معقوله لكن التطنيش فى التليفون او بعد كده لما تشتكى من حاجه شكرا و البيع وش.و كمان لما ركبلى الفولت استابليزر ركبه غلط و كان ممكن يطيرلى الكمبيوتر بتاع العربيه و الضفيره و كل الكهربا كلها.
و ان المفروض واحد كهربائى على الاقل هو اللى يركبها .
نصيحتى: لا انصح بالتعامل معاه طبقا لتجربتى معاهم على الرغم ان لى صديق رشحمهملى قبل ما اتعامل معاهم .هما كانوا فى الاول كويسين و بعد كده بقوا زى ما انتوا شفتوا و بضاعه كلها صينى .او مستعمله .و نفس منتجاتهم موجوده فى التوفيقيه و ارخص كمان .
2-كفرات البريمبو اللى بتركب على الفرامل اشتريتها من التوفيقيه من عند بدر الدين ب 35 جنيه فقط و كانت عند جو اكسسوريز ساعتها ب 75 جنيه . للطقم
و اشتريت من عند بدر الدين سبويلر ب 120 جنيه فيبر فقط و مش مرشوش و ده ارخص سعر لحد دلوقتى لان الاصلى كان ب 550 جنيه و المضروب ب 250, 300 .و اشتريت ليدات للشبوره على شكل حرف L زى بتاع المرسيدس .ب 125 جنيه للطقم .و كان موجود فى شارع دمشق و عند جو و اى حته تانيه من 385 الى 500 جنيه ههههههههههههه اضعاف التمن سبحان الله و نفس المنتج و العلبه و الله .هو بعد كده رخص عندهم بقى اقل و لكن منزلش زى بدر الدين بردوا .و اشتريت طقم سلوك ارضى hks ب 100 جنيه او 120 جنيه طبعا هو صينى و كوبى اوريجينال و لكن نفس الطقم بيتباع فى اى حته تانيه بضعفين او 3 اضعاف التمن و الله .
و اشتريت عربيات ماكيد لعبه ب 30 الوحده و عند جو ب 55 جنيه سبحان الله جو اكسسورزيز لازم اى منتج يبقى ضعف التمن .ليه مش عارف .
و اشتريت غطا عربيه ب 135 تقريبا ,ووتر بروف و وقوى و من جوا قطن كمان .
النتيجه :لما اشترى كذا حاجه بيعملى دسكونت كويس و بضاعه رخيصه و كلمتهم واحد و ناس محترمه . عندهم فانوس الكروز الخلفى ب 1600 جنيه فقط ليدات و حركات جاهز مش عموله .و عندهم بعض الوفنيس المتعدله و بعض البدى كيت فى الفروع التانيه .
نصيحتى .انصح بالتعامل معاهم طبعا .
3- حماده غوزى :راجل محترم جدا هو و اللى شغالين معاه جدا .لسه مشتريتش حاجه بس حاجته اصلى و معاه توكيل k&n ,splitfire ,prempo ,ebc,و كذا حاجه تانيه و بيجيب بودى كيت و فوانيس متعدله و هو عموما راجل برنس و التعامل معاه مثمر و فى ناس كانت لسه بتشكر فيه قريب فى قسم كيا .
4- عادل وجدى tps :اكتر ناس فاجؤنى بالتعامل معاهم .هما طبعا محترمين جدا جدا جدا و مؤدبين و ناس فاهمه و مهندسين كمان يعنى العربيه لعبتهم و التعديل ده اكتر ناس تقولك ده ينفع و ده مينفعش .و هما ناس امينه جدا .لدرجة انى كنت حاجز معاهم بضاعه و دافع عربون و هما اتصلوا بيا ياكدوا الكلام عشان يتعمل بيهم اوردر و يتجابوا من برا .و انا اعتزرت و وقولت ليهم انى هلغى الاوردر (بس الكلام ده قبل ما الاوردر يتعمل من اصله ,يعنى قبل ما يجيب البضاعه من برا ) هو بكل شهامه قالى يا فندم تقدر حضرتك تتفضل تاخد فلوسك فى اى وقت و تنورنا .و على فكره هما اصروا انهم يدونى وصل بالفلوس اللى دفعتها و انا رفضت و الله بس هما اصروا بشده .ناس بجد محترمه جدا .غير كده لما عرف انى مش معايا فلوس تكمل و كده نصحنى انى اشترى من محل تانى تانى ارخص منه شويه بسبب(ان المحل التانى ده عنده بضاعه و مش عارف يبيعها بقاله فتره و بيخسر ,و بيحرق البضاعه باقل من تمنها وبكده ساعدنى و ساعد المنافس بتاعه .سبحان الله )و طبعا لازم افسر ليه هو البضاعه عنده كانت اغلى شويه و ده انها هيتطلب بيها اوردر من برا مصر و كان الدولار غلى .و اكيد الشحن و الجمارك و الضرايب و سعر المنتج نفسه غلى .يعنى هو مش غالى على الفاضى او بيبالغ فى السعر لا ابدا و الله .دى هى الظروف اللى ظلمته .و هو كمان عشان كده عمل عرض للبضاعه دى التركيب مجانا عشان يعوض دى فى دى .و فعلا لو حد هيركب اى مسمار طبعا هياخد فلوس .هو بقى عملها مجانا .و كل ده و المعامله محترمه جدا .و هما بسم الله ما شاء الله عندهم دينو اللى هو بيقيس الهورس بور بتاع العربيه و كده بالكمبيوتر .و مش موجود عند اى حد تانى اصلا . و لو عاوز لبن العصفور هيجيبهولك .عندهم توكيل الترا ريسينج و k&n , و حجات تانيه كتير و بيتعاملوا فى الاصلى فقط و ناس فاهمه جدا و امينه جدا .و عندهم توكيل D2 للعفشه الرياضيه اللى بتعلى و توطى و فرامل و طنابير اسبور مخرمه و غيرها و غيرها .
النتيجه :ممتازه
نصيحتى :انصح بالتعامل معاهم اكيد و طبعا .
perfict shift -5 ناس محترمه و بضاعه رخيصه و عندهم حجات نادره و اصلى و عندهم تربوا و شورت شفتر و انتر كولر و فلاتر سيموتا اصلى و كراسى ريكاروا و حجات حلوه و نادره و رخيصه ,و معملتهم محترمه جدا جدا و ناس امينه و فاهمه .لو عنده حاجه متنفعنيش او مش هتفيدنى بيقولى دى متنفعكش و بلاش تاخدها .و عارف اغلب المحلات و بينصح بامانه حتى لو الحاجه مش عنده بيقولى اجيبها منان او هو بيجيبها .و اشتريت من عربيات لعبه ب 25 جنيه و فلتر زيت سيموتا ب 110 جنيه تقريبا .و هو ممغنط عشان يشفط الرايش بتاع الموتور و كمان اشتريت منهم الستاير اللى بتطلع و تنزل مع الازاز .نوع نضيف جدا و طقم بيطلع و ينزل مع الازاز زى بتاع المرسيدس او الاوكتافيا بس هو 4 قطع .اربع ابواب .و مركبه و الحمد لله مبسوط بيه جدا و بيحجب الشمس ومدى فخامه للعربيه و شياكه .
النتيجه :مرضيه جدا و ناس محترمين جدا
النصيحه :انصح بالتعامل معاهم .
power zone -6 : مؤمن .ناس محترمه و بيبيعوا الحجات الاصلى و ملهمش فى الصينى او التقليد و فاهمين و بينصحوا كويس و ناس امينه جدا جدا و اشتريت من عندهم بارات الالترا ريسينج بتاعه العفشه و الشاسيه و رخيصه جدا عندهم ,و هو اللى عرفنى عليهم عادل وجدى tps و هى دى البضاعه اللى اشتريتها من عندهم .و عندهم توكيل الترا ريسينج و سيموتا و ليكوى مولى .
اوتو بست : ناس محترمه و بشترى منهم المنظفات او الاضافات او اى حاجه خاصه بالكار كير او اى اكسسوارات بسيطه .و ناس مؤدبه جدا جدا و بيدونى الحاجه قطاعى بسعر الجمله . و هو تاجر ابن تاجر كبير . و ليهم اسمهم فى التوفيقيه .
7 -جو كار اكسسوريز :محمد عثمان .
البضاعه بضعف التمن او 3 اضعاف التمن .كلها بضاع صينى .معامله اسوأ ما يمكن . الناس اللى شغالين معاه محدش منهم فاهم حاجه و مبيركبوش حاجه .ملهمش كلمه :يتفق معاك على سعر و يرجع يغيره .نفسيه تعبانه . دفعت عربون و مدنيش وصل و لطعنى اكتر من شهرين و نصف و لما طالبته بالفلوس قالى على سعر جديد للبضاعه اكتر من ضعف اللى اتفقنا عليه . و لما قلتله السعر غالى و مش مناسب ,قالى يبقى ملكش عربون عندى .و بعدها خلى واحد من يكلمنى و يقولى تعالى و هنحل المشكله .روحتله انا وواحد صحبى مدنيش الفلوس و قالى اجل الدفع و كده و حتى معرضش على انى اخد بضاعه بتمن العربون حتى .
و بعدها اتصل بيا واحد من اللى شغالين معاه و هددنى و قالى لو جيت ناحية المحل هقطع رجلك و هكسرك انت و صحبك و سب الدين و قالى اللى هيجى ناحية المحل هنسلمه تسليم اهالى و قالى ان هو استدرجنى لحد المحل و خد نمر العربيه و مواصفاتها و مواصفاتى انا و صحبى و بلغها لكل محلات الاكسسوار و التجار اللى بيتعامل معاهم و قال لهم سبتوه لو شفتوه .يعنى اباح دمى سبحان الله .واحد صحبى ادخل و حب يحل الموضوع و بردوا مفيش نتيجه .
نصب على فى الفلوس و ازانى و و هددنى و شتمنى و اتبهدلت خالص بصراحه .
النتيجه :لحد الان بعد مرور عدة شهور لم احصل على فلوسى او حتى اعتزار .و بالكلام مع اصحاب محلات الاكسسوار فوجئت و انا بسال عادى و مقلتلهمش اى حاجه من اللى حصل معايا .قالوا بالحرف الواحد ان التجار و الزباين بيكرهوه . و ناس تانيه قالوا منه لله .
النصيحه :لو عاوز تخسر فلوسك و تهدر كرامتك و تاذى نفسك اتعامل معاه .و ربنا يتولاك برحمته .و احب اقول لمحمد عثمان (((( منك لله ,و ربنا هيجيبلى حقى منك ,يمهل و لا يهمل ,ربنا على المفترى)))).و بسببك عرفت ناس محترمه جدا جدا جدا ,و ربنا يهديك .


الملخص النهائى :
لو عاوز تشترى اكسسوار فى اللزيز .يبقى التوفيقيه فيها حوالى 70 % من اللى ممكن تحتاجه .
لو عاوز حجات اصلى و متميزه و نادره او حتى مش موجوده وهتتجاب من برا .يبقى عليك ب 1- عادل وجدى 2- حماده غوزى 3- بور زون .مؤمن 4- برفكت شيفت و هتلاقى ان شاء الله 100% من اللى هتحتاجه و لو حتى هيتجاب من برا هيجيبوه .

احب اشكر كل المحلات دى بما فيها السىء .لانى بسبب السىء عرفت المحلات المحترمه و ناس كتير وقفت جمبى و عرفت مين اللى بيقف معايا وقت الجد و مين اللى بيهرب من المسؤليه
و بجد انا اتعلمت من كل المحلات دى ان التجاره ادب و احترام و اصول قبل الشطاره .و بجد بحترم كل واحد فيهم ليه موقف كويس معايا .
و معلومه صغيره اوى كده .
الناس التقيله اصحاب المحلات الكبيره .عارفين ان رزقهم مضمون من ربنا و موجود و محدش هياخد .و مبيضربوش بعض فى ضهر بعض بالعكس بيقولوا كلام كويس جدا عن بعض.
و من هؤلاء عادل وجدى و مؤمن و محسن عساف ,التلاته شكروا فى بعض و قالوا كلام كويس جدا على بعض .و بقولهم ربنا يذيدهم كمان و كمان .
و الناس التانيه اللى بتضرب فى ضهر بعض ووش بعض و بيعضوا فى بعض و فى خلق الله . و بيقولوا كلام وحش على بعض
محمد عثمان(go( .و محمد اشرف(drift king )

و السلام ختام .