تجربه ترخيص عربيتى النوبيرا
حبيت انقل ليكم تجربه الترخيص الممله جدا علشان غيرى يعرف ايه اللى هايقابلوا من خطوات
1/ نقلت ملكيه لعربيتى لانى بقالى سنه ماشى بالتوكيل دفعت 635 جنيه فى الشهر العقارى وعربيتى موديل 2001 /cc1600 ومعرفتش اجيب شهاده بيانات تثبت ان السياره انتاج محلى لان دى بتفرق فى التسجيل حوالى 200 جنيه
2/ شهاده المخالفات بس الاول جبت رقم العربيه القديم ودى كانت غلسه لان العربيه كانت مرور الحدايق ونيابه الحدايق فى العباسيه والمرور فى حدايق القبه المهم عملناها والحمد لله
3/ ذهبت لأسوء مرور فى مصر مرورى مرور السلام
ورق فحص 27 جنيه ومليته
رفع البصمه فحص الطفايه ولنل معيش طفايه فاشتريت واحد ب121 وبعد كده الفحص الفنى :Copy of majd(4): المهندس قالى ارجع مرور الحدايق علشان مطابقه البصمه وده اجراء جديد عند النقل من مرور لأخر بسبب العربيات الكتير المسروقه
رجعت مرور الحدايق وحصلت مطابقه البصمه من اخر فحص فنى حصل للعربيه
ورجعت مرور السلام اه ونسيت اقول ان من استعجالى وانا راجع خبط موتوسيكل بس بسيطه الحمد لله خدش فى الرفرف بس المهم رجعت بالمطابقه لمهندس مرور السلام الراجل مضى بالموافقه من غير مايشوف العربيه لانه كان شافهه الصبح
4/ اجرى ياعلى ادفع التأمين الأجبارى ودفعت سنتين ب 230جنيه الحق الشباك بقه ابااااااااااااااااا ده مفيش شباك اخر استلام الملفات الساعه 12 ليييييييييييييييييييييييي ه:Copy of majd(4):قال ايه علشان يخلصوا الملفات اللى استلاموها الاول قبل 12 والناس تستلم رخصها كل ده يحصل قبل الساعه 3 قولت ماشى نكمل بكره روحت الساعه 9 صباحا ووقفت فى الشباك
5/ تقدير ضريبه سنتين ب 460 وشراء استمارات بعدد سنوات الترخيص ب 18 جنيه املى ياعم على الورق وارجع الشباك تانى الموظف ادانى 4 ورقات هو ملاهم وقالى روح لللوحات امضيها من الامين ماشى وقفت فى طابور ابن تييييييييييييييييت ووصلت امضى ياعم مضى واخد صوره الرخصه والبطاقه واخد ورقتين وادانى ورقتين قولت لأخويا الصغير روح فك اللوح علشان نبقى جاهزين للتسليم واخويا راح يفك وانا جرى على الشباكاخدت منى الورق وقالتلى استنى تحت المظله علشان تستلم الرخصه قولتلها انا ماسلمتش لووح العربيه قالتلى لا انت هاترخص بنفس النمره واخويا داخل عليا بيهم قولتله ارجع ركبهم تانى لو سمحت راح الراجل وماتأخرش استنى الرخصه بقه
بعد ساعه ونص من الانتظار جت بس تصريح بست شهور بس ايه اجرى على الظابط قالى دا تصريح لغايه لما يجى الملف من مرور الحدائق وتعالى بعد 3 شهور وغير التصريح واستلم الرخصه
وعلى كده والحمد لله خلصت وخلصت