وش السلندر طار بعد انتهاء العمرة بيومين يرضى مين ده؟

السلام عليكم

طبعا انا بكتب حاليا وظغط دمى فوق 49097736476/6723647

ده رقم كبير جدا

انا راكب بونتو 94 75 حصان عربيه كويسه جدا ومش بطالة وكانت ماشية معايا كويس اوىى


المهم شديت العربية سمكرة ودوكو وحصلتلى بلاوى هاكيها بعدين عشان مخرجش برا عنوان البوست


عملت نص عمرة للموتور

وغيرت الجوانات وجبت بساتم وبتاع 4 انواع حساسات عمرى ما سمعت هنهم قبل كده لان العربيه فيها يونيت كنترول

المهم دفعت قطع غيار حوالى 3500 ج لانى مبجيبش حاجه مش اصلية
ودفعت المصنعية المطلوبة بدون ادنى نظرة منى بغرض الفصال

استلمت العربية امبير الحرارة فى البونتو الديفولت بتاعه معايا انه فى التلت الاول


خدت العربية الامبير فى النص ولما تسخن قبل ما المروحة تشتغل يبقى فوق النص بشرطتين كده

قولت للميكانيكى قالى لا ده العادى


المهم خدت العربيه ومشيت بيها 54 ك وامبير الحرارة فى معدله الجديد المهم المصيبة الكارثة اتحركت بالعربية من ش التحرير فى الدقى لشارع وادى النيل فى المهندسين راحت العربية بطلت مدورتهاش وجبت الكهربائى قالى جابت وش سلندر مش جوان بس



روحت للميكانيكى وسالنا الميكانيكى عن السبب قالك مشيت بيها سخنة كتير
مع انى قبل ماطلع مشيك على الردياتير وكان عادى قالى كوعة الترموستات مدخلتش مياة لبلوكات الموتور

وانا مالى ذنبى ايه


وقالى معلومة انا مستغربها (محتاجين سبعاوى بعد اذنه طبعاً يفيدنا)

انتا مش محتاج تلين امشى عادى بس غير الزيت بعد الالف


المهم انا طلعلى 100 مصيبة بعد ماخلصت هنحكيهم بالتفصيل فى كام بوست عشان الناس تخللى بالها

العربية كانت زى الفل وكنت تحب تتفرج على الموتور بتاعها ونضافتة لما تفتح الكبوت
قبل العمرة طبعا

صاجها كان وحش وغيرته وسمكرته بس كنت عايش مرتاح

مش عارف يا استاذ هاني اقولك ايه صراحه بس الله يكون في العون و دي طبعاً غلطة الميكانيكي التحفه اللي روحتلوا بس حتعمل ايه

قدر الله و ماشاء فعل

الله يكون فى عونك ........ لا طبعا العيب مش من العربيه .. العيب من الصنايعى الى معندوش اى نوع من الفهم ... او حتى الضمير .. وهو الى بوظ العربيه

ربنا يعوض عليك
دي صوره من صور فتاكه "بليه" المصري
سواء في ورشه او مصنع او توكيل
للاسف

يا جماعه بجد الميكانيكى ده كويس جدا جدا

عبقرى بجد بس ازاى ما يشيكش على العربية فى حاجه زى كده

هو خرط اول امبارح وش السلندر وادهانى بس ان شاء الله يوم السبت هاطلع على التوكيل رغم ان العربية قديمة بس عايز اخد ريبورت بحالتها عشان اخلصها انا بقى بنفسى

ربنا يكون فى عونك و تخلص على خير إن شاء الله

اللهم يجيرك فى مصيبتك و يخلف لك خيرا منها

روح للميكانيكى تانى بس من غير العربية وطلع عينيه واضح انه بيعجن

طيب مادام انتا بتصرف على عربيتك ليه مرحتش بيها اوماترا من الاول على الاقل حيجيبوا قطع غيار مضمونه وشغل توكيل ولو حصل مشكله فيها حترجعلهم العربية تانى على العموم ربنا يسهل وترجع احسن من الاول ان شاء الله

و ليه وجع القلب و دخول في العمره اصلا؟؟
ماكنت تنزل تجيب موتور جديد و تريح دماغك.
و بعدين انت كده عملت عمره كامله
النص عمره بتتقال لما تعمل شنبر و صباب
انما انت داخل في بساتم و اكيد شمايز .
الميكانيكي دا مش بيفهم و حسبي الله و نعم الوكيل
و ربنا يعوض عليك

اقتباس:

---

المشاركة الأصلية كتبت بواسطة hanyboudy

وقالى معلومة انا مستغربها (محتاجين سبعاوى بعد اذنه طبعاً يفيدنا)

انتا مش محتاج تلين امشى عادى بس غير الزيت بعد الالف

---

لو انت خرطت البلوك او عملت شمايز لاااااااااااااااااااازم تلين العربية

لكن لو غيرت شمبر وصباب وسبيكة فقط فيكفى ان العربية تدور لمدة يوم ب 20 لتر بنزين على الواقف، علشان لو فيه عيوب تظهر وعلشان الشمبر والسبيكة والصباب يطبعوا، بشرط ان الصباب يكون معمول له روديه كويس

لو ثرموستات الكوعة مش مدخل المية على البلوك حساس الحرارة كان هيضرب فى السماء لأن حساس الحرارة راكب فى وش السلندر، انا متخيل ان مشكلتك دى مشكلة تركيب، جوان مقلوب مثلا ، تراب فى مسارات المية، مسامير جوان مش مربوطة كويس ، تسريب فى مسارات المية فضى المية كلها، اى حاجة من هذا القبيل

علشان كدة دايما لازم العربية تدور على الواقف بعد العمرة يوم كامل، واول مشوار بعد العمرة لازم يكون على الهادئ وحول الورشة لحين الإطمئنان ان كل شئ سليم

اولا يا استاذ هانى انت كده عملت عمره كامله وانا معتقدش ان تكلفة العمرة الكاملة فى التوكيل هتكون اكتر من الـ3500 الى حضرتك دفعتهم يا عم قول 4000 بس كنت هتاخد شغل مضمون لأن صعب تلاقي حد بيفهم في العربيات الجديدة 100% ده انا والله بيبقى عندى مشاكل في العربية ومببقاش عاوز اوديها اعملها عشان ببقى خايف من الصنايعية التعبانين المهم ربنا يعوض عليك وإن شاء الله هتبقى كويسه وقدر الله وماشاء فعل

السلام عليكم

انا استلمت العربية امبارح الساعه 12

وطبعا غيرت كوعة الترموستات تانى وجيبت ترموستات خارجى جديد تانى

وجبت صباع حرارة جديد تانى

بس بصراحه مطيقتش ااقعد عنده المهم ان انا ماشى مبعديش
2.5 على Rbm

ومبعديش 70 ك/س

كده متهيالى مفيش مشكلة او بكرة الجمعه باذن الله تعالى ااقف واحرق صفيحه فيها على الواقف



انا مودتش العربية لاوماترا لانها موديل 94 وهو الميكانيكى ماشى معايا كويس بس النصيب بقى الحمد لله

بجد مع الصنايعية مينفعش الذوق خالص لازم تقف على ودانه ولو فى تراب فى العربية خليه يشيله انما ابقى محترم واروح هناك بالبدلة واشرب الشاى ولما يخلص اخدها بجد مش هعمل كده تانى

ربنا يأجرك في مصيبتك ويخلف لك خيراً منها
انا عملت العمرة الكاملة وبعد 4 شهور اضطريت أسقط موتور لأن الموتور الأولاني اللي المفروض اتعمل له العمرة كان جاب أخره
حسبنا الله ونعم الوكيل

معلش خد الشر ورنبا يعوض عليك
ويجازي الي نعندوش ضمير
http://www.postimage.org/aV1u3XQr.jpg

ربنا يكون فى عونك يا هانى
معلش يا باشا والحمد للة انها جت على قد كدة
بس ابقى عرفنى اخر الاخبار وطمننى

[quote=hanyboudy;290839]السلام عليكم

طبعا انا بكتب حاليا وظغط دمى فوق 49097736476/6723647

==========
أخي العزيز روق دمك وربنا يعوض عليك
المشكلة فينا أحنا ( موظف / دكتور / ضابط / محامي /صحفي / صنايعي / وزير / غفير ....) أي حد ف بر مصر ماهو كلة من الشعب
المشكلة الأساسية هي الفهلوة وأزمة الضمير
لو كل واحد يبدأ بنفسة ممكن نبقي حاجة تانية ؛ ممكنبلدنا تكون أحسن من كدة بكتيييييييييييييييييييييي ييييييييييييييييييييييييي يييييييييييييييييييييير
لكن الناس بقت حاسة بالغربة ف بلدها ؛ وأسأل الأخ اللي بيوقع ف المنتدي بأسم ( جنسية مصرية للتنازل )
قد كدة هانت بلدنا علينا ؟؟؟!!!!!!!!!!!!!!!!!!
بعد كدة توقع كل شئ وأي شئ
==========
يلا بينا نجرب نحب بلدنا ؛
نزرع حبها ف قلوب ولادنا
يلا كل واحد يبدأ بنفسة
يمكن نرجع نقولها تاني (مصر هاتفضل غالية عالينا )
بكدة بكرة- إن شاء الله -بالتأكيد ها يبقي أحلي من النهاردة

معلش يا هاني وكويس انها جت على قد كدة
الحمد لله
عاملة ايه معاك دلوقتي

شكرا يا زياد وشكرا يا استاذ sh و شكرا يا كيمو


يا جماعه انا بعد قصد وش السلندر اللى اتعاد ده وانا مش حاسس ان العربية بتسخن لان العداد كان سليم بس قارى غلط طبعا


غيرت كل دورة التبريد وجبت كلها جديدة براند نيو
بناءا على طلب الميكانيكى

امبارح داخل بالعربية الشغل اشوف القصة يمكن حد يفيدنى قالولى كويس انك جيت دلوقتى

الباشا ناسى مسمار على شداد الكاتينى اكل السير وبوظ الغطا


اشترى جديد واغير


دورة التبريد كامله جديد جبتها ب 1500 ج تقريبا

والعداد لسه فوق



خلصنا الى ان العداد نفسه دلوقتى فى حاجه



ملحوظة صغيرة العربيه خدت كام خربوش فى الجراج على الطاير كده


مفيهمش واحد ينفع يتلمع لانها جايبة المعجون


ولله عز و جل الحمد من قبل ومن بعد