توكيل هيعمله ايه يعنى ؟!!!!!!!!
استعوض ربنا واهى تاخد العين
سيبها كدة نصيحة
عرض للطباعة
توكيل هيعمله ايه يعنى ؟!!!!!!!!
استعوض ربنا واهى تاخد العين
سيبها كدة نصيحة
بص يا باشا ..... أولا قدر الله وما شاء فعل .... غيرك بياخد العين في حاجات أكبر من كده وتأذي العربية ....
أما بخصوص الخرابيش فانا هاجيبلك من الأخر ...
أولا لو الخرابيش دي شالت طبقة البوية من على الصاج .... يبقي ولا أي بوليش يرجعها تاني عن تجارب بالهبل ...فتأكد بنظرك إن طبقة البوية اتشالت ولا لأ.ثانيا لو فعلا طبقة البوية اتشالت ورأيت هذا بعينك .... يبقى مفيش غير حل واحد فقط وطبعا نتيجته مش هترضيك بنسبة 100 في ال 100 وهي أن تشترى قلم دوكو بنفس لون العربية وده موجود في أي مكتبة بحوالي 3 جنيه فقط بس تأكد من درجة لون القلم لأن ألوانه محدودة جدا ثم بيد فنان تمشي بالقلم بعد رجه جيدا على الخرابيش (ماتنساش بيد فنان حساسه جدا) بكده هتداري الشكل اللي ظهر تحت الخرابيش ومش هاتبان إلا من قريب وبالنهار كمان ... أما من بعيد محدش هيأخد بالله وباليل مش هاتبان أصلا ... وعلى فكرة كان في موضوع هنا من سنة تقريبا على موضوع القلم ده وبالصور كمان ...جرب البحث.... عبالرحيم من السويس
ربنا يكرمكم ويجازيكم ألف خير
أنا يوميها طبعا قاعد مفروس من الغيظ ... لأن إللي عمل كدة ملوش أي مصلحة غير إنه يأذي الخلق ... يعني أنا ممكن مزعلش لو العربية إتخبطت ... بس إن العربية تبقى واقفة في أمان الله وواحد يعمل كدة ... ليه !!!!
كنت بكلم واحد صاحبي فبيقولي العلامة إتسرقت ... قلتله والله أهون ... على الأقل إللي سرقها ممكن يبيعها ... حيطلع بأي مصلحة ... إنما إيه الفايدة إللي حتعود عليه لما يعمل كدة في العربية ... ومش خربوش واحد ... ده بهدلها
المهم
أنا روحت جيبت COMPOUND POLISH أمريكي ... ب35 جنيه تقريبا .... وجيبت كيس قطن ... وقعدت أدعك بحركة دائرية منتظمة بصبر وإحتساب أجر ... والحمد لله النتيجة كانت أحسن من الأول بمراحل ... يعني تقريبا 60% أو 70% راحت ... وروحت مدي بقى الكبوت WAX ماركة Armour ... والحمد لله الدنيا ظبطت شوية
النتيجة : إن الخدوش مش باينة بليل بنسبة 99% ... ومش باينة في النهار في الظل بنسبة 80% .... وفي الشمس بنسبة 70% .... الحمد لله أحسن كتير ...
وحسبي الله ونعم الوكيل في إللي عمل في العربية كدة .... والله قاعد بقالي بتاع 3 سنين عشان أجيب العربية وبعد لما أجيبها يكدر فرحتي ... ربنا يعامله بما يستحق بقى
وربنا يكرمكم ياجماعة شكرا على ذوقكم وإهتمامكم
مفيش غير أنك تحتسب ........ و الشعب للآسف معقد نفسيا (كله - المتعلم و الجاهل و الغني و الفقير - فيه حاجة مش مظبوطة في دماغنا !!! )
و كويس أن الملمع جاب نتيجة معاك .
حسبي الله ونعم الوكيل في البهيم اللي عمل كده وربنا يعوض عليك ويكفيك شر عيون الناس
قلة (تربية ودين) وحقد وحسد
وتعريف الحاسد هو من يتمني زوال النعمة عن غيره ولو لم تأت له -----يعني بجاحة مع ربنا ليه بتديله وانا لا او مش عايز حد تاني يبقي عنده الخير الا هو نقص وقلة رباية ربنا يعوض عليك ومتزعلش اللي يشوف بلوة غيرة تهون عليه بلوته
عيشت اغلبية عمري خارج مصر و وقتها كنت فاكر اننا الشعب الخلوق اللي فيه رجاله واللي عينه مليانه واللي مليان نخوة و شجاعه ولما رجعت اتصدمت صدمة ما بعدها صدمة .. الناس بتكره بعضها ومحدش طايق التاني و الوصولية والتسلق عادي جدا للوصول لاي غرض ..
ربنا يشفينا جميعا
جيب غطاء للعربيه النهارده قبل بكره .. نصيحه من أخ .. بجد مش هتبان العربيه و لا حد هيعرف ديه بتاعت مين .. أنا بندم إنى مجبتوش من بدرى
ربنا يكرمكم يارجالة
وأنا فعلا دلوقتي مغطي العربية ... يارب ما يتسرقش بس الغطاء
بص بقى علشان مايتسرقش الغطا .. إعمل الحركه ديه:
لما تغطى العربيه بالكامل .. جيب قطعة خشب صغيره طولها بتاع 40 سم كده (شبه العصايا بتاعت المقشه) و إفتح باب السواق .. و دخل شويه من الغطا جو العربيه و بعدين حط الخشبه جوا و إقفل الباب .. دلوقتى لو حد فكر إنه يسرق الغطاء مش هيعرف يشده لأنه مزنوق جو العربيه بالخشبه :d .. و ممكن تعملها كمان فى الباب المقابل و تبقى كده زنقت الغطا زنقة معلمين
الحاجه الثانيه .. إكتب رقم العربيه على الغطا .. و بكده هتبقى بوظته و مش هيفكر يسرقه لأن الى بيسرق الغطا بيبقى عايز يبيعه .. و مش هيعرف يبيعه طالما الغطا مكتوب عليه ..
يعنى حاجات بسيطه بتقلل الريسك ... بس لو عايز يسرقه بعد كل ده يبقى إبن تيت بقى