-
الخوابير ؟؟؟
السلام عليكم .. يا جماعة انا الحمدلله لسة جايب فلوانس من فترة قريبة و ماشي بيها 1000 كم بس .. النهاردة رحت بنزينة التعاون في مدينة نصر عشان ازود العربية نيتروجين عشان كنت سايبها حوالي شهر مش متحركة .. الواد لسة جاي يزود اول فردة لاقيته بيقولي الفردة دي عايز يتكشف عليها عشان الضغط فيها 15 بس ! قولتله ايوه منا بقالي راكنها فوق الشهر متحركتش بيها و ده طبيعي قالي طيب بص اكسر شمال كده و اطلع بالعربية حبة حبة ( عشان يرش المية بصابون بتاعتهم دي ) عشان اوريك .. عملت زي ما قالي و قالي انزل يا باشا شوف كده .. لاقيته بشاور على حته واسعة كده بين النقشة بتاعت العربية .. قولتله يبني دي النقشة كده الخطوط مش موازية لبعضها دي بتوسع و تضيق .. قالي لأ .. بص تاني كده .. لاقيته بيشاور على شوية فقاقيع صغيرة كده .. قالي لازم خابور .. فأنا عشان اتأكد ان الواد ده نصاب رحت قولتله رش تاني كده على حتة تانية في الفردة لاقيت نفس الفقاقيع الصغيرة .. و اللي هي اصلا ناتجة من الصابون اللي بيحطه مش تسريب هوا .. و عشان اتاكد زيادة قولتله وريني الخوابير كده راح جايبهم و قالي العادي ده ب 10 جنيه والمستورد ب 15 جنيه .. و انا طبعا سمعت قبل كده ان العادي ب 3 جنيه فهل ده صح ولا غلط ؟ و ايه اضرار الخوابير في الكاوتش ؟ طبعا ربنا يهدي الناس دي اللي مبتراعيش ربنا في لقمة عيشها و عايزين ياخدو اي قرش من الناس بالكذب و التدليس
سؤال تاني كده معلش .. هو الكاوتش المفروض يتغير كل 50 الف كم صح ؟ طيب لما يتغير يتغير الاربعة كلهم و لا القدامانيين يرجعو ورا و اجيب فردتين جداد ؟ و لو كده يبقى اللي رجعو ورا دول هيمشو اكتر من 50 الف كم ؟ .. و انا اسف اذا كنت طولت لاني عشمان في اعضاء المنتدى الجميل ده انهم يردو على استفساراتي .. شكرا :)
-
لو ينفع بالعقل كده العربيه تمشى بيها فى البحر مثلا يبقى ينفع تركب خوابير انت شايف انك ممكن تمشى بالعربيه فى البحر على حسب جوابك اعمل الصح وبعدين فى هنا فى المنتدى تسليح كاوتش ونصايح ومميزات وتقولى خوابير ازاى يعنى لو ظروفك مش مساعده على التسليح اعمل بطش من الداخل وبلاش اى غلط وعلى فكره تسلح الكاوتش بعد تحليلى انا شخصيا ممتاز وعملى جدا وتانى مره اوعى تحط خوابير ابدا لانه ده للكاوتش الكبير الخاص بالمعدات الذى لا يتأثر بوجود الخوابير نظرا لاتساع نسيجه لضخامه الكاوتش بعكس كاوتش الملاكى خالص . تحياتى
-
الطبيعي وال متعارف عليه هنا إن الكاوتش بيتغير على 40
بس الصح واللي متأكد منه إن الكاوتش المفروض يتغير لما يتاكل يعني لما يكون عمق النقشه بقى 3 ميللي بس
وفي كل الأحوال الصلاحية بتكون 6 سنين من الإنتاج مهما كانت حالته
لما تغير هتغير ال4 مع بعض مش 2 و 2
موضوع 2 و 2 ده عشان الناس مبتحبيش تدفع فلوس كتير مرة واحدة
الخوابير أنا معرفش إيه ضررها بصراحة بس الناس بتقول وحشة
بس أنا برده شايف إن أحسن حل الليي هو المكوة مضر جدا برده
عشان كده أنا مابستعملش اللا اللزق السريع أو البطشة
ولو رحت عند حد محترم شوية هيحط 2 فوق بعض واحدة صغيرة ودي العادية بتاعت الخرم وعليها واحدة كبيرة عشان إيه معرفش بس زي زيادة أمان كده
والكشف عن الفردة بيكون فالبانيو وسيبك من الإزازة دي
-
روح لحد بتاع كاوتش كويس خليه يكشف علي الفرده وقوله الحمها بالمكوه
مش هتتأثر ب اي حاجه
-
اولا ده نصاب وهيدخل فى 7 او 8 خوبير وتطلع من عنده دافع 80 جنية زى الباشا ويريت كدة وبس والفردة كدة ادمرت لان الخبور خبور فعلا واسال مجرب
تانيا اعتقد ان بروز النقش على الاطار هو الدليل الوحيد لعمر الاطار الا لو انت مخبور العجلة كتير فكدة انت اللى جنات عليها
-
بالمناسبة دي انا بحذر الناس اللي بتمون في البنزينة وبعدين يقولو في كاوتش نايم لان القصة كلها نصب بانصح اي حد لو قالولك الكاوتش نايم انزل وبص علية لقية شكلة عادي او شكيت فية روح لاقرب واحد بتاع كاوتش بس مايكونش في بنزينة انا حصل معايا القصة قبل كدة وحصل مع واحد صحبي وفوجئ بالعامل وهو بيخرم الكاوتش ولما الواد لاحظ انو شافو ارتبك راح صحبي ماسكو لقي الولد بيخبي حاجة بيخرم بيها الكاوتش كان هايضرب الولد وبعدين لقي الولد ساب المحطة و وطلع يجري في الشارع اتصل بالدورية الراكبة وجولوا البنزية واخر الكلام كان الولد خرملة الفردة 7 اخرام وصاحب البنزينة علشان مايتعملش محضر جاب لصحبي فردة جديدة
ثانيا بلاش خوابير اللحام الداخلي افضل وبدون مكواة
-
الخوابير مضرة للكوتشات ... لانك بتدب الخابور فى السلك بتاع الكوتش .. ودا ببساطة بيبوظ الكاوتش
لان الكاوتش بيتكون من خيوط سلك بتمسك الكاوتش دائريا
مازالت اللحامات الداخلية افضل من لحمات الخوابير
-
مافيش كلام يتقال بعد اللي لرجالة قالوه
-
فعلاً الرجالة جاوبو على كل نقطة بالتفصيل أحسن إجابة
وأنا برده حصلى الموضوع ده فى بنزينة موبيل اللى على الدايرى اللى عند المطار قبل الكوبرى اللى بينزلك على النادى الأهلى مدينة نصر وقاللى بردة خابور مستورد وللأسف علشان قلة خبرتى وقتها وعلشان كنت مسافر بالعربية إضطريت أقوله يعمل الخابور .. وبعد ماخلص الخابور الأول قاللى فى خرم تانى أهو .. المهم طلعت بـ 8 خوابير بـ 70 جنية
أفضل حاجة للكاوتش لو كان الخرم صغير هو اللصق
لو كان الخرم كبير شوية يبقى المكواة .. بس عيب المكواة إنها بتقصر العمر الإفتراضى للكاوتش علشان بتسخن السلك المعدن اللى جوه الكاوتش وتخليه يفرق عن بعضه
أما الخوابير فهيه فعلاً خوابير
-
والله فعلاً إنتوا ناس زي العسل والله ينور عليكم جميعاً
Content Relevant URLs by
vBSEO 3.6.0 PL2