الموضوع: فرحان بالاسترا أوي

اشتريت استرا من سنة تقريبا موديل 2000 ماشية 135000 كيلو تقريبا. بصراحة عربية تقفيل ألماني عجباني جدا. المهم من كام شهر كده لاحظت أن السحب بيقل ومش هو، وكمان دواسة الدبرياج مبقتش ناعمة وكمان في صوت كده في المارشدير. بصراحة دخلت على المنتدى وقعدت اقرا المشاركات لحد ما توصلت ان المشكلة في الدبرياج. فرحت من اسبوع للميكانيكي وجربها واكد لي نفس التشخيص قلتله يالا بينا نظبط. روحت جبتله اسطوانة وديسك ماركة ساش ألماني ب 800 جنيه وجبتله البلية لوحدها ماركة Valeo ب 900 جنيه. وقلت بالمرة اغير جوز الطنابير اللي قدام ب 320 جنيه الماني والتيل ب 190 جنيه اسباني. وجبت كمان جوز فوانيس خلفي تايواني ب 300 جنيه. انا ساعات بجيب حاجات استيراد بس في الحاجات دي قلت الجديد احسن. على فكرة انا كنت سالت في توكيل منصور على الطقم بالبلية قالي 2500 جنيه. المهم قعدت على ايد الميكانيكي يوم ونص تقريبا واستلمت العربية طبعا حسيت بفرق كبير جدا في السحب والنقل وفي دوسة الفرامل مبقتش فيه هزة الطنابير خالص. المهم اخدتها يوم التلات. ووديتها الجراج وطبعا علشان القلق بتاع يوم الاربع مطلعتش بيها بس نزلت الجراج بليل اركب الفوانيس وقلت بالمرة اشيل المفتاح الاصلي بتاعها واستخدم المفتاح اللي انا كنت عملته عند بتاع مفاتيح من شهرين (عمله عن طريق انه اتصل بحد معرفة في التوكيل واداله كود المفتاح وجربته ساعتها ودور العربية ومشيت بيها كمان ومفيش مشكلة واخد 175 جنيه). المهم طلعت يوم الخميس بالعربية عادي الصبح بالمفتاح اللي انا كنت عمله وشلت الاصلي روحت كام مشوار بس جيت في اخر مشوار وبدور العربية حلفت ما تدور ابدا. فيها مارش وبنزين والبطارية شغالة ومش عايزة تدور. المهم كلمت الميكانيكي ييجي فعلا مفيش نص ساعة لقيته جه كشف على طلمبة البنزين لقاها مش واصللها كهربا ولا الموتور ولا البوجيهات. العربية فاصلة كهربا خالص. المهم قعد ساعة بحاله يجرب ويقولي هو في مفتاح يقفل الكهربا قلتله لا. قالي يبقى يا اما حساس الكرنك يا اما اسوا حاجة الكارته فيها حاجة. طبعا الدنيا اسودت لاني عارف يعني ايه كارته تتحرق مش اقل من 3000 جنيه ومستعملة لانها في التوكيل ب 5000. اتصل بكساحة علشان تيجي تاخد العربية. مش عارف ازاي ربنا الهمني ان يمكن المفتاح فيه حاجة. روحت ركبت تاكسي وطيران على البيت اجيب المفتاح الاصلي وفعلا بدور به لقيت العربية دارت ومفيش مشاكل. طبعا الحمد لله. انا بس بسال كام سؤال:
1- هو ده من ضمن وسائل الامان والحماية ولا جت معايا كده
2- لو حبيت اعمل مفتاح تاني في التوكيل بكام وبرة لو حد كويس بكام
وشكرا بجد على احلى منتدى عرفت منه معلومات قيمة جدا جدا