الموضوع: الجواز وسنينه ! محتاج مشورتكم !

ايييييييييييييييييييييه ولا دايم الا وجه الله
وجع دماغ الي يفكر يتجوز من كل ناحية
كان مالي مكونت في حالي متهني بقلبي الخالي
المهم ندخل في الموضوع يا شباب عشان أسمع رايكم
عن طريق زميلتي في الشغل قالتلي ان ليها بنت عمها كويسة وممكن اشوفها -زميلتي مكتوب كتابها-
كلمتهم في البيت وحسيت انهم رافضين الفكرة معرفش ليه -هي والدتي حاطة عينها على بنت اخت جوز خالتي
لفة حلوة صح
المهم بعد عناء ومناورات حربية قاتلة مع والدي ويمكن شدينا مع بعض بسبب الموضوع دا لأني عاوز اشوف البنت وهو بيأجل الموضوع
يمكن يكون من أحد أسبابه اني مش جاهز بس انا مقولتش اني رايح اتجوز بكرة انا لسة هنقرا فاتحة ونخطب والموضوع يطول واشوف دماغ البنت وطريقة تعاملها وكدة وبعد كدة نتجوز يعني مش خبط لزق هنتجوز
المهم قعدت افهم فيه كتير لحد ما وصلنا للمفهوم دا
الحمد لله استقرينا اني اشوفها قلي هاتلي عنوانهم أسأل عليهم
استغربت قلتله احنا مشوفناش البنت عشان نسأل عليهم قلي لا قبل ما نروح المهم جبتله العنوان فعلا
وللأسف مر شهر ومسألش عليهم
المهم بعد ما مر شهر انا اتعللت ان البنت بتمتحن -هي لسة في سنة رابعة مخلصتش- ففات الشهر بتاع الامتحانات فعلا
بعد كدة قلت لوالدي اني هروح اشوفها يوم الجمعة -اللي هو امبارح- وهاخد والدتي معايا عشان الموضوع ميبقاش رسمي اوي بحضوره يعني
اقنعته يعني الحمد لله
المهم جبت علبة شيكولاته -قلت مينفعش ادخل فاضي يعني- وان كنت مش عارف هل فعلا المفروض اخد حاجة واللا لا بس انا باعتبار انها زيارة لأول مرة وبغض النظر عن اني رايح اشوف بنتهم قلت لابد من هدية معايا وانا رايح
روحنا بالفعل وهحكيلكم الحوار اللي دار وقولولي رأيكم ايه:-
*دخلنا واتكلمنا وكدة فأول ما اتكلمنا جت سيرة الشغل والدتي قالت هو شرطه الاساسي انها مشتشتغلش دا شرط ومفيش فيه كلام طبعا مش شرط انتي بس اللي ربنا هيكرمه بيها يعني
*بعد كدة اتكلمنا فانا شقتي في بيت والدي يعني في نفس العمارة لأنها بتاعته فماما بتقلها هي القعدة كلها هتبقا عندنا هتطلع شقتها على النوم بس
طبعا والدتها قالت مينفعش يعني وكدة انا حماتي تعبانة بنزلها في اول اليوم بعملها الفطار ولما بتحتاجني عاملالها جرز جنبها ترن عليا بيه
المهم يعني كل دا انا ساكت فبيقولولي انت ساكت يعني انت المفروض بتتكلم كتير فقلتلهم اه فعلا انا شغلي كلام بس انا مستمع للحوار اللي بيتقال
ماما قالتلهم اه مهو تعبان من الكلام فبيسمع دلوقتي
اتكلمنا عادي الاول وبعدين بقلها انتي ليكي اصحاب ولاد؟!
فقالتلي اه قلتلها اصحاب واللا زمايل دراسة؟!
قالتلي لا اصحاب اخواتي يعني طبعا الموضوع دا لوحده بيضايقني اساسا
قالتلي وانت بحكم شغلك اكيد ليك المهم يعني قلتلها اه طبعا
انا منكرش ان ليا زمايل بنات بطبيعة شغلي ومش بقول اني راهب او الكلام دا بسطبيعي اني اضايق والا مبقاش راجل يعني
المهم الحاجة التانية اللي ضايقتني اوي اني بقلها انتي بتسلمي بايدك؟!
فقالتلي لو حد مدلي ايده بسلم عليه اه عشان ماكسفهوش!
في حين اني وانا داخل مسلمتش على والدتها بايدي خالص لأني بكره السلام بالايد ومش بعمله غير لو حد مد ايده ليا والوضع هنا مختلق مش تناقض بس الوضع مختلف فعلا
المهم قلتلها بس دا ملهوش دخل بالذوق او حاجة دي حاجة والذوق حاجة مش المفروض انك تسلمي على حد بايدك قالتلي مهو عشان ماحرجهوش وكدة حسيت انها هتقاوح فقفلت الموضوع
جينا بنتكلم في نقطة الشغل قالتلي انا بحلم اني اشتغل اه بس يمكن اتخطب او اتجوز الدنيا تتغير قلتلها تمام انا فهمت انتي عايزة تقولي ايه
هنا قاطعتهم عشان ادخل الحمام
لسببين اني كنت محتاج ادخله دا اولا وثانيا اني كنت هدخله هدخله حتى لو مش هحتاجه عشان اعرف شكله ايه ونضيف واللا لا
والدتي قالتلي انها بتحلم انها تشتغل ومعندهاش استعداد تعد في البيت بغض النظر انها قالتلي دا !
بعد كدة جه الكلام عن زيارة الاهل وكدة ماما قالتلهم انا بعد فترة طويلة مش بزور والدتي وكدة فمامتها قالت لوالدتي مبتحسيش بتأنيب الضمير؟!
فماما قالتلها مانا معاها على طول عالتليفون وكدة يعني
المهم دا الحوار اللي حصل
الملخص بقا
والدتي بتقول ان والدها بيشتم -عشان لما جت سيرة الصنايعيه قال انهم زبالة وعايزين قطم رقابيهم -
والدتها هي اللي ممشية البيت عشان والدها منطقش بحاجة
باختصار انا شايف ان والدتي رافضة القصة وفسرت كل حاجة بجانبها السيء!
يمكن انا ملتمس ليهم الاعذار شوية بس مش عارف اعمل ايه
بناء على اللي اتقال دا
انا عرفت ان الناس معندهمش اعتراض لكن معترضين على نقطة ان الاقامة تبقا كاملة في بيت والدي وان بنتهم لازم يكون ليها خصوصيتها وشقتها المستقلة وكدة
من ناحية تانية انهم خايفين اني اخد بنتهم منهم وامنعها من زيارتهم
بس غير كدة هما قالوا اني كويس وكدة !
من اللي حكيته انا ايه رأيكم وايه نصيحتكم أعزكم الله ؟!
انا صليت استخارة قبل ماروح وفي نيتي اصلي استخارة تانية قبل ماخد القرار النهائي
منكرش اني اول ما دخلت البيت حسيت بارتياح وحسيت بارتياح من والدتها برده
منتظر رأيكم يا شباب دوشتكم معلش