حجزت السيراتو 2008 و حستلمها الأتنين الجاي إن شاء الله

شكراً لكل أعضاء المنتدى و مساعدتهم لي في أختياري لتلك السيارة الرائعة الكيا سيراتو 2008 و بعد تعليقات الأخوة بالمنتدى على استمارة الشراء الخاصة بي وجدت معظم الترشيحات للكيا سيراتو فنزلت اتفرجت عليها وحجزتها و السيارة فعلاً رائعة و انشاء الله بعد الأستلام حكتب تقرير مفصل عنها بس مبدئياً في منها أربع موديلات :-
1. مانيوال + تكييف + زجاج كهرباء + سي دي (أم بي 3) 1600 سي سي 121 حصان (89900 )
2. فتيس ستبترونيك + ما سبق (97000 )
3. فول اوبشنز (مريات كهرباء ، مسند + حليات للمقابض + فوج لايت + ما سبق في نمرة 2 ) (102000 )
4. إضافة فتحة سقف) (106000)

الألوان في منها :- الأسود و الفضي و الأحمر الفاتح و الغامق (بيقولوا عليه نبيتي) و السماوي و الدهبي و الكحلي
أنا أخترت الأسود الفئة التانية (جير ستبترونك)
السيارة لا يوجد بها ايرباجز أو أ بي أس في أي من موديلاتها

الف الف مبرووووك

وربنا يباركلك فيها

اقتباس:

---

إن شاء الله

---

ان شاء الله

1000 مبروك

تستلمها على خير ان شاء الله....العربيه ده هتعمل شغل جامد و هتغطى على النترا و ياريس و حاجات كثير...وربنا يسهل و يكون الوكيل محترم وكفاءه مش زى بوبو(غبور)

1000 مبروك و ربنا يباريكالك فيها على فكره انا كمان هاجيب سيراتو بس انا بقارن بينها و بين النيسان و اللانسر1300 و الياريس مع العلم انى هاجيب اتوماتيك لو حد ممكن يفيدنى ياريت

الف الف مبروك ربنا يحفظهالك من كل شر ويحفظك ويباركلك فيها

اقتباس:

---

المشاركة الأصلية كتبت بواسطة slayer

1000 مبروك و ربنا يباريكالك فيها على فكره انا كمان هاجيب سيراتو بس انا بقارن بينها و بين النيسان و اللانسر1300 و الياريس مع العلم انى هاجيب اتوماتيك لو حد ممكن يفيدنى ياريت

---

شوف الريو اوتوماتيك حاتعجبك جدا

فعلا شوف كيا ريو سبورت
و اياك اياك اياك
و كمان مرة اياك تجييب لانسر 1300 اتوماتيك
بعد الشر عليك حيجيلك شلل رعاش منها

الف مبروك مقدما

الف مبرووووووووووك يا باشا اختيا موفق

الف مبروك ياباشا وتستلم على خير ان شاء الله

1000 1000 مبروك بجد اختيار موفق جدا جدا

فهى احسن عربيه فى فئتها فى السوق من وجهه نظرى كا مكانيات و كاتوكيل وكماركه للعربيه

1000 مبروك يا باشا ..
:):)

الله يبارك فيكم ، بصراحة أنا في غاية الأمتنان لهذا المنتدى الرائع و شكراً لكم جميعاً للتهنئة وعقبال كل واحد فيكم أنشاء الله يجيب العربية اللي نفسه فيها ،،،

تحياتي

د/محمد

Ain Shams University

يا جماعه اللى بيقول كيا ريو سبورت هى اى دى فى من الريو سبورت
و هل تبع التوكيل
و سعرها كام

اللينك بتاع موضوع كيا ريو سبورت اهو

http://www.nilemotors.net/Nile/showthread.php?t=26816

الف مبروك يا باشا ربنا يباركلك فيها ان شاء الله
فعلا عربية جميلة ماشاء الله

الف الف الف الف مبرووووووووووووك هتبقي 3 سيراتو فى المنتدي ان شاء الله

بجد العربية دى هتكيفك اوى ان شاء الله

انا بتاعتى سودا اوتوماتيك و بجد مبسووووووطة موووووووووووت منها و الحمد لله

كان اختيار موفق الحمد لله

ياباشا اخبارك اية استمت واللا لسة

يا ترى العرببيه قطع غيارها متوفره
انا من المنصوره

بس ليه جايبها سودا؟

خد بتاعتيييييييييييييييييييي ييييييييييييي

و انا اجيب حمرا :oops:

مبروووووك :)

اقتباس:

---

المشاركة الأصلية كتبت بواسطة Abohmaid

ياباشا اخبارك اية استمت واللا لسة

---

الحمدلله استلمتها من أسبوع من عند ياسين اللي في روكسي بس انا عدلت الفئة و جبت الفول اوبشنز كاملة و كمان غيرت اللون بدل أسود جبتها اللون الجديد الشامبين الدهبي لون رائع ، معلش يا جماعة على التاخير في التقرير المفصل عن العربية دي ، انا قولت اجربها كويس قبل ما أقول أي حاجة عنها ،،،

أ. أولاً نبدأ بالكلام عن الاوبشنز :
1. الباور = ممتاز لا يختلف عن أي باور أخر
2. التكييف = بصراحة تلاجة (أنا كان معايا النترا 2006 خليجي ) لكن السراتو تكيفها لو حتشغله تاخد معاك بطانية و أنت خارج ، هاهاهاهاا التكييف تتش و بيقيس درجة حرارة الخارج و فيه اوبشن ال auto أو manual adjusment
3. زجاج و مراية كهرباء (تحكم فقط بالنسبة للمرايا و ليست طي)
4. الكراسي يمكن ظبط ارتفاعها و درجة ميلها بذراع بجانب الكرسي ، يمكن طي الكنبة الخلفية لزيادة مساحة تخزين الشنطة اللي هيا أصلاً واسعة جداً
كونصول امامي نيكل و كروم في هذه الفئة فقط و كذلك المقابض شكلها شيك جداً
5. يوجد سنتر لوك و ريموت كنترول و كذلك يمكن فتح الشنطة بالريموت
6. عدة مواضع للتخزين ، منها جراب للنظارة بجانب إضاءة للقراءة وهذه إضافية غير إضاءة الصالون و هي قوية جداُ
التابلوة أكثر من رائع وشيك جداُ

كفاية كده كلام عن الأوبشنز و خلينا في البودي و الموتور ،
أولاً العربية صاجها أتقل من أي سيارة أخرى في فئتها و بابها تقيل جداُ و أعتقد ان ده مخلي للعربية ثبات جامد عى السرعات العاليا، و طبعاً بالنسبة للشكل الجديد 2008 أصبحت السيارة أجمل من الموديل السابق فقد تم زيادة طول السيارة ة تقليص حجم الفانوس الخلفي بعض الشيء اللي كان واكل نص الشنطة تقريباً فأصبحت السيارة أجمل بكثير من قبل
نيجي بقى للحتة المهمة اللي انا محتار في تقيمها :-
أولاً :- الموتور DOHC 121 حصان زي موتور الأنترا الجديدة بالظبط والجير زي ما انتو عارفين ستبترونك ، يعني عايز اوتو حتلاقي عايز مانيوال برضه حتلاقي
- السيارة ناعمة جداً و صوت الموتور يمكن عالي سنة لكن مش ملحوظ بدرجة كافية للإزعاج
- السيارة في الوصول للسرعات العالية ممتازة يعني أنا جبت 170 على طريق الأسماعلية من غير ما أحس بيها يعني العربية ممتازة و ثابنة

لكن :( لو حبيت اسحب بيها و أطلع من أي عربية ما بعرفش بحس العربية بتاخد وقت في التجميع ، يعني بيكون اللي قدامي سبق بمدة عقبال ما أقدر أخد سرعتي و لو زودت دواسة البنزين شوية ألاقي صوت الموتور على و العربية زعقت (الكيك داون على ما أعتقد) زي ما يكون نزلت نقلة و بعدين تبتدي تسحب ، بصراحة انا مش حابب النقطة دي في العربية ، يعني ممكن العربية ما تسعفنيش وفت الزنقة ، و على فكرة محدش يقولي ان الأتوماتك كده ، لأني انا كان عندي أولاُ هوندا أكورد 1986 و كانت اتوماتيك و زي الطلقة و كان عندي قبل كدة شيفرولية كابريس أي نعم 5700 سي سي وتقيلة زي القطر لكن الفتيس بتاعها روعة فانا مش عارف هل اللي بيحصل ده عادي و كمان المانيوال جير بتاعها 4 نقلات فقط .

سين سؤال :- حد يعرف لما أحب انقل من اتوماتيك لستبترونيك لازم لوقف العربية الأول و لا ممكن و انا ماشي ؟؟؟؟


عامة السيارة لا يمكن القول عنها سوى انها ممتازة و تستاهل قيمتها و بالنسبة لأول صيانة بعد 5000 كيلومتر يعني لسة بدري ، أنا يا دوبك عامل 970 كيلو فقط

بالنسبة للتوكيل أو الموزع اللي أنا أشتريت منه هما ناس كويسين لكن ......:embarrassed2: و تعبوا معايا في أختياري للسيارة أولاً انا كنت حأخد سيارة سوداء لكن عند الأستلام لقيتها في بعض التجريحات فمرضيتش أستلمها و رحت المخزن اخد واحدة تانية برضة معجبتنيش فغيرت اللون لانه واضح أن الأسود بيبان فيه التجريحات بسهولة

السيارة اشتريتها كاش لأن التقسيط فعلاً وجع دماغ ملوش لازمة (على فكرة هو توكيل بخيل جداً مفيش ولا هدية مع السيارة و لا حتى معطر جو هاهاهاا بس مش مشكلة هما ناس زوق):confused4:......

ملوظة أخيرة:- الكاسيت سي دي كلاريون الصوت و التوزيع داخل السيارة تحفة ، يعني مفيش داعي تزود لا تويترات و لا صب ووفر :)

أي سؤال للأخوة بالمنتدى عن السيارة أنا في الخدمة و شكراً مرة أخرى لهذا المنتدى العظيم


onna
الف الف الف الف مبرووووووووووووك هتبقي 3 سيراتو فى المنتدي ان شاء الله

بجد العربية دى هتكيفك اوى ان شاء الله

انا بتاعتى سودا اوتوماتيك و بجد مبسووووووطة موووووووووووت منها و الحمد لله

كان اختيار موفق الحمد لله

الله يبارك فيكي يا أونا و الله انا غيرت السودا وجبت الشامبين ، الحمرا فعلاً جميلة جداً والسودا كمان بس بترب جداُ وأي خدش بيبان فيها بس يلا كل واحد بياخد نصيبة و ربنا يباركلك فيها إن شاء الله

د / محمد
أستاذ م. بكلية الطب - جامعة عين شمس
السيارات التي سبق تملكها وذهبت لحال سبيلها بعد ذلك:-
1. 131 ميرافيوري
2. هوندا أكورد 1986
3. كابريس كلاسيك 1992
4. دايو لانوس 2000
5. أنترا 2006
7. سيراتو 2008 (أخر العنقود)

الف مبروووووووووووووووووووووو ووووووووووووووووووووووووو وك:)

مبارك ليك و ربنا يحفظها بس فين الصور ؟!!!
و يا ريت في ضوء النهار
عشان نقيم اللون :)
أنا مستنية أصلي بردو احدد اللون

الف الف الف مبرووووووووووووووك على العربية

بجد تقييم رائع بس انت لحقت امتى عملت 970!!! دة انا جايباها من شهر 4 و يدووووووووووبك عاملة 500 كيلوو م مستكتراااااااهم هيهيهيهيهي

ربنا يديك خيرها و يككييك شرهااا :)

ربنا يبارك لك فيها يا دكتور محمد

بالنسبة للستيبترونيك, انت ممكن تنقل عادى جدا جدا بينهم و انت ماشى

و لما تخليها على الوضع المانوال, برضه تنقل النقلات من غير اما تدوس اى حاجة (علشان فى ناس بتفتى و تقولك دوس فرامل علشان تنقل)

اقتباس:

---

المشاركة الأصلية كتبت بواسطة onna

الف الف الف مبرووووووووووووووك على العربية

بجد تقييم رائع بس انت لحقت امتى عملت 970!!! دة انا جايباها من شهر 4 و يدووووووووووبك عاملة 500 كيلوو م مستكتراااااااهم هيهيهيهيهي

ربنا يديك خيرها و يككييك شرهااا :)

---

ايه يا ستي سلامة ازازك !!!
وكل ده ولسة 500 ك ؟!
ربنا الحفيظ يا بنتي اتحفينا بتقريرك بقى عشان ربنا ياخد بايد عربيتك
وبلاش حتى صور ها !

اة والله يا روضة اتقهرت
بس الحمد لله :)

اخويا لسه رايح يوديها عند بتاع تصليح الازاز و عملهاله الله اعلم باة هتمشى ولا هضطر اغير من اول و جديد

عامة انا شايباها كدة و خلاص شوية لحد ما اقي اغيره بأة فى التوكيل

الحمد لله :)

اقتباس:

---

المشاركة الأصلية كتبت بواسطة onna

اة والله يا روضة اتقهرت
بس الحمد لله :)

اخويا لسه رايح يوديها عند بتاع تصليح الازاز و عملهاله الله اعلم باة هتمشى ولا هضطر اغير من اول و جديد

عامة انا شايباها كدة و خلاص شوية لحد ما اقي اغيره بأة فى التوكيل

الحمد لله :)

---

ما هو بيحصلنا كده عشان نقول الحمد لله ودي أجمل حاجة , ربنا يخلف عليك ان شاء الله

الف الف مليون مبروك والله تقييم رائع
انا لسه عامل بيها حوالى 150 ك لحد دلوقتى والصراحة هى عربية ممتازة من حيث الشكل والاداء


- السيارة ناعمة جداً و صوت الموتور يمكن عالي سنة لكن مش ملحوظ بدرجة كافية للإزعاج
اتفق معاك فى هذة النقطة

بالنسبة للتوكيل أو الموزع اللي أنا أشتريت منه هما ناس كويسين لكن ......:embarrassed2:
هما ناس محترمة على الاخر بس عملوا معايا فصل مش ظريف وكمان هما بخلا جدا زيماانت قولت
وانت نسيت حاجة مهمة جدا ان العزل داخل العربية اكتر من ممتاز

على العموم الف مليون مبروك ياباشا

الف الف مبروك وياريت لو سمحت تليفون المعرض الى اشتريت منه لاني مش لاقي العربيه خالص في اسكندريه وياتري خلصوا الاوراق بعد كام يوم والمواعيد مضبوطة ولا اية وانا بادور علي الexفول اوبشن فضى وربنا يبارك لك في سيارتك و يحميك من شرها وعقبالنا يا رب

اقتباس:

---

المشاركة الأصلية كتبت بواسطة onna

الف الف الف مبرووووووووووووووك على العربية

بجد تقييم رائع بس انت لحقت امتى عملت 970!!! دة انا جايباها من شهر 4 و يدووووووووووبك عاملة 500 كيلوو م مستكتراااااااهم هيهيهيهيهي

ربنا يديك خيرها و يككييك شرهااا :)

---

شكراً يا أونا بصراحة انا عمال ألف بيها من ساعة ما جبتها رايح جاي وبفكر أسافر بيها الغردقة كمان علشان ألحق أعمل أول صيانة فبل ما أسافر برة (ناوي أقعد فنرة طويلة)

اقتباس:

---

المشاركة الأصلية كتبت بواسطة معاذ الشرباصى

ربنا يبارك لك فيها يا دكتور محمد

بالنسبة للستيبترونيك, انت ممكن تنقل عادى جدا جدا بينهم و انت ماشى

و لما تخليها على الوضع المانوال, برضه تنقل النقلات من غير اما تدوس اى حاجة (علشان فى ناس بتفتى و تقولك دوس فرامل علشان تنقل)

---

شكراُ أستاذ معاذ وجاري التجربة بس لو الفتيس وقع على الأرض يبقى انت السبب ، هاهاها

اقتباس:

---

المشاركة الأصلية كتبت بواسطة Abohmaid

الف الف مليون مبروك والله تقييم رائع
انا لسه عامل بيها حوالى 150 ك لحد دلوقتى والصراحة هى عربية ممتازة من حيث الشكل والاداء


- السيارة ناعمة جداً و صوت الموتور يمكن عالي سنة لكن مش ملحوظ بدرجة كافية للإزعاج
اتفق معاك فى هذة النقطة
على العموم الف مليون مبروك ياباشا

---

الله يبارك فيك
شكراً جزيلاً يا أبوحميد و الف مبروك ليك ربنا يديك خيرها م يمنع عنك شرها أنشاء الله

اقتباس:

---

المشاركة الأصلية كتبت بواسطة mohamed ali

الف الف مبروك وياريت لو سمحت تليفون المعرض الى اشتريت منه لاني مش لاقي العربيه خالص في اسكندريه وياتري خلصوا الاوراق بعد كام يوم والمواعيد مضبوطة ولا اية وانا بادور علي الexفول اوبشن فضى وربنا يبارك لك في سيارتك و يحميك من شرها وعقبالنا يا رب

---

الله يبارك فيك أ/ محمد الاوراق خلصت بعد خمس أيام و التسليم في ميعاده وطلبك عندهم إن شاء الله هو المعرض قدام نادي هليوبوليس في روكسي وبكره أجيبلك تليفونهم إن شاء الله