موقعة الجمل اتكررت تاني بس المرة دي على الدايري ! !

السلام عليكم ورحمة الله وبركاته

وانا وراجع النهارده من الجامعة

باخد الدايري من عند دريم بارك ومش بحب انزل نزلة الصحراوي عشان اتفادى زحمة شارع فيصل وبنزل اما نزلة جامعة القاهرة او نزلة شارع مراد

المهم قبل ماتدخل على الدخلة اللى بتدخلك على نزلة الجامعة وبولاق وشارع مراد

بتطلع من على كبري كدة بيكون على اليمين

طالع الكبري في امان الله

الاقي انتظارات وابص جمل نازل جري من النزلة

وصاحب الجمل بيجري وراه :grinder:

الجمل فلت ازاي او وصل للدايري ازاي ؟ ماتفهمش

طبعا العربيات كلها حدفت شمال لان الجمل كان نازل من اليمين

وانا شايف الجمل اول ماقرب عليا روح دايس بنزين وجاري :crashcomputer4:

كان ودي اصورلكم الموقف لكن للاسف ماكنش فيه وقت

وحاولت ابص عليه في المرايا اشوفه عمل ايه وهل خبط عربية او تسبب في ايذاء حد ولا لاء بس المرايا ماكنتش موضحة بشكل كويس

طبعا انا مش هتكلم في ان الجمل فلت من صاحبه ازاي

بس ده ازاي طلع على الدايري وكان طالع يعمل ايه ؟

الطريق كان اصلا فيه زحمة عشان كدة الحمد لله ماحصلش حاجة لكن لاقدر الله لو كان نزل ومافيش زحمة في الطريق كان هيتسبب في كارثة ! !

لا حول ولا قوة الا بالله ربنا يحفظنا

أوعى يكون رايح على التحرير شكله كده جمل فلول :breakpc2:

ربنا يستر على العربيات اللى ماشيه

اكيد كان طالع الكوبري يشوف سرعته قد ايه ويعترض على ان قوة العربيات بتقاس بالاحصنة مش بالجمال
:D :lol:

ايه اللي ودا الجمل هناك ؟ :))))))))))))))))

بيستغل انو مش عنده النمر الجديدة ومش هيتلقط رادار :))

اقتباس:

---

المشاركة الأصلية كتبت بواسطة Ahmed.Fahmy

بيستغل انو مش عنده النمر الجديدة ومش هيتلقط رادار :))

---

+
:hlopaet_prv::hlopaet_prv:

ربنا يستر ويحفظ مصر وابنائها

تلاقيه كان رايح المدبح بتاع الوراق وسأل حد قاله على العنوان غلط وقاله ارجع تانى فبدل ما يرجع قالك انزل بوشى لان المرايا مكسوره

الجمل كائن يخوف اوي..ونا ف الكلية كان كل يوم واحد بيعدي من علي كوبري الجامعة بتلاتين جمل تقريبا اول مرة شفته ف سنة اولي لقيتهم جيين ف وشي هم طبعا عارفين طريقهم انا رحت رجعة جري كنت مرعوبة لحد مبقو ورايا بالظبط رحت ماسكة ف حديد السور جامد اوي ومغمضة عيني وقعدت اقول يارب يارب..انا لو بس حسيت بجمل لمسني اكيد كنت هنط وش

زمان ايام القطر قبل مترو الانفاق كان فى مجزر جمال فى جسر السويس وكان كل يوم عشرات الجمال بتعدى من مزلقام الحلميه وفى يوم مجموعه من الجمال هيست وبدل ما تعدى المزبقان اتخضت من زمارة القطر ودخلت على القضيب والمصيبه ان كان قطر السويس جاى من عين شمس فى اتجاه رمسيس وهو طبعا مش هيقف فى الحلميه والجمال فى التص بين القطرين ومنظر بصراحه ميتحكيش اشلاء جمال وبنى ادمين وقطر خرج من على القضيب ومصيبه كبيره قعدت كذا ساعه لما شالوا الاثار لان الجمل ناشف جدا وقوى جدا والخبطه منه على طرق السعوديه بمصيبه او بمعنى اصح كارثه قلما ينجو منها احد -ربنا يسلم

هى جت على الجمل تلاقيه بيقلد سواقين الميكروباص

ربنا يستر على الناس اللى كانت ماشيه اخطر حاجه الجمال حصلت معايا على طريق وادى النطرون وربنا ستر ووقفت قبليها بكام متر وعدت على خير

بيفكرني الموقف ده باول اجازه ليه في مصر كنت صغير وشقي شويتين ونزلت البلد وولاد عمي اخدوني معاهم الارض والمهم وقفين جمب طرمبة مايه وجاموسه بتشرب وصاحبها واقف وانا بظلطه صغيره في رسها تقريبا جت في عنيها وعربيه جايه علي الطريق والجاموسه جريت العربيه خبطتها العربيه اتفرتكت

ههههههههه جمل فلول

يا عم و انت ايه اللى يوديك الجامعه اصلا :) احنا فى اجاااااااااااااااازه

اقتباس:

---

المشاركة الأصلية كتبت بواسطة icehearted girl

الجمل كائن يخوف اوي..ونا ف الكلية كان كل يوم واحد بيعدي من علي كوبري الجامعة بتلاتين جمل تقريبا اول مرة شفته ف سنة اولي لقيتهم جيين ف وشي هم طبعا عارفين طريقهم انا رحت رجعة جري كنت مرعوبة لحد مبقو ورايا بالظبط رحت ماسكة ف حديد السور جامد اوي ومغمضة عيني وقعدت اقول يارب يارب..انا لو بس حسيت بجمل لمسني اكيد كنت هنط وش

---

طب لما الجمل بيخوف الصرصار يعمل ايه