قـفـشـت عـربـيـتـيـن بـيـسـرقـوا شـكـايـر سـمـاد عـنـدنـا
بسم الله الرحمن الرحيم
السلام عليكم و رحمة الله و بركاته
نازل انهاردة الصبح الساعة 6 و انتوا عارفين الواحد خلاص دخل العسكرية بعيد عنكم
و عندنا في حزام اخضر في المنطقة ( من سكان القاهرة الجديدة )
كانت فيه عربية منزلة اساسا ليلتها شكاير سماد و طين للزرع عشان يظبطوا الزرع طبعا كنت فرحان
المهم نازل الصبح و ماشي الاقي عربية هيواندي اكسنت فضي و راجل شكله محترم و لابس نضيف فلتتخيلوا بيعمل ايه ؟؟ صح زي ما انتوا افتكرتوا
كان عمال يعبي في الشكاير في الشنطة فاستغربت انا لسه صاحي الصبح و مش مجمع قولت بيعبي حاجة بتاعته مشيت بعده بكام متر و ببص افتكرت موضوع الشكاير بتاعت السماد اللي نزلت عشان الزرع
قولت بس هو نهاره ملون معايا و هقفشه ديه حالة تلبس رسمي و تفتيش وقائي و اسلمه للشرطة ( بالمناسبة التفتيش الوقائي اللي هو تتحسس هدوم الشخص عشان لو معاه سلاح او اي حاجة ميعملش فيا حاجة او يعمل في نفسه حاجة و يلبسهاني و ديه مفيش محامي يقدر يطعن بالبطلان فيها لأنه مش تفتيش ذاتي )
المهم بدور ع عربية الدورية مش لاقيها مع انهم شغالين لف ع مدار الساعة في المنطقة ليل نهار
بعدها مفيش كام متر قبل الملف اللي هرجع للراجل منه لقيت عربية بيجو نازل منها اتنين و واحد جاهز اللي سايق و تقريبا واحد قاعد قدام جنب السواق
و اللي نازلين عمالين يعبوا في الشكاير طب دول هعمل معاهم ايه لوحدي طب الراجل و اقدر امسكه و اسلمه اومال دول هعمل ايه دول هيثبتوني انا و يقلبوني
لقيت امن بيحرس كومباوند سكني قدامي اسمع انه تبع الامن و الامن اللي هناك معاهم لاسلكي و موتسيكل دورية شرطة و معاهم سلاح بقولهم فيه عربيتين بيسرقوا الشكاير اللي هنا اللي واقف كأنه اعلن حالة الطوارئ و باللاسلكي و بيجري ع الاتجاه اللي قولتله عليه و مشيت بعدها لقيت البيجو جاية بتجري من جنبي و طالعة ع مخرج التجمع قولت بس جوم في ملعبي فيه هناك عربية دورية واقفة طول الوقت هسبقهم و هقفشهم هناك طلعت جري وراهم لقيت بوكس الدورية اللي بيلف عندنا جاي ورايا بطأت و جيت جنبه قولتلهم فيه عربية بيجو قدامنا و رقمها كذا كذا بيسرقوا السماد اللي محطوط هنا
اللي سايق متكلمش لأنه سقط نقله و في نفس اللحظة اللي بقوله فيها كده لقيت البوكس كأنه مركب نيتروس و طاير و كلهم جهزوا السلاح ورا في البوكس و انا وراهم
فيه مثل بيقول : الطمع يقل ما جمع و عصفور في اليد و لا 10 ع الرصيف
و ده اللي عملوه الباشوات بتوع البيجو ركنوا و قعدوا يلموا في باقي الشكاير اللي قدام مش كام واحدة بس و لا في الشنطة و بس لأ المرة ديه طمعم وداهم في داهية اكتر حاطين الشكاير ع الشنطة و السقف و الله اعلم فيه جوة و لا لأ و حظهم ان اللي في البوكس شايفين يعني حالة تلبس رسمي برده و ده بيأكد كلامي اكتر كمان
المهم و احنا شايفينهم كانوا بيركبوا العربية و ماشيين و البوكس أمرك ( من امركة ) قدام العربية بتاعتهم وقفهم و نزلوا اللي في البوكس حاصروهم و رافعين السلاح في وشهم و كل اللي جوة البيجو رفعوا ايديهم و هم مصعوقين و السواق بيبصلهم و بيبتسم و كان نفسي استني اعرف ايه اللي حصل
بس للأسف انتوا عارفين تأخير دقيقة في العسكرية هتنفخ و في نفس الوقت خلينا من بعيد لبعيد الواحد عمل اللي عليه و خلاص و هم يتعاملوا
و بعدها و انا طالع ع مخرج التجمع لقيت الدورية واقفة زي مهي قولتلهم حصل كذا كذا من صاحب الاكسنت و لسه مبلغ الدورية عن عربية تانية بلغوهم عند الاكاديمية بالاسلكي معرفش بقي بلغ و لا لأ
و مشيت فرحان اني قفشتهم و بلغت عنهم و فرحت اكتر ان الدوريات شغالة عندنا ليل نهار
بس اللي قاهرني
يعني حتي السماد مش معتوق
و الادهي بتوع البيجو طب دول شكلهم صنايعية
طب الراجل صاحب الاكسنت و الراجل شكله محترم جدا و لابس نضيف ايه اللي يخليك تنزل تعمل كده ده احنا ما بنصدق ينزلوا حاجة و يزرعوا المناطق
و من الواضح ان الراجل ده من سكان التجمع عندنا و الله اعلم يعني مش عارف اقوله ايه و شكله قالك الصبح محدش موجود و محدش هياخد باله في الخباثه
و للأسف معرفش رقم عربيته عشان كانت نيتي الف امسكه في حالة تلبس و اسلمه للشرطة لكن بتوع البيجو لخموني اكتر
و طبعا كلنا عرفنا موضوع البنك اللي حصل عليه سطو مسلح في التجمع الخامس و الحمد الله اني مخدتش طريق الــna و انا نازل عشان باخده من الخامس من ورا و الا مكنوش هيعدوني عشان قفلوا الشوارع هناك و كنت هتكدر
و ربنا يستر طريق الجميع